DIOS MUNANQANNÖ KAWANAPAQ
Chikishqa këkaq cristiänu mayintsikkunapaq mañakushun
Bibliaqa willakushqanam karqan yachatsikïnintsikta michämänantsikpaq, Satanas tukïta ruranampaq kaqta (Jn 15:20; Rev 12:17). ¿Imataraq rurashwan chikishqa këkaq cristiänu mayintsikkunata yanaparinapaq? Diosmanmi mañakïta puëdintsik. Alli ruraqkunapa mañakïninkuna alläpa precisaq kanqantam Bibliaqa willakun (Snt 5:16).
¿Imakunataraq mañakushwan? Mana mantsapakushpa markäkïninkunachö sinchi tsarakuyänampaqmi Jehoväta mañakushwan (Isa 41:10-13). Jinamampis, autoridäkuna Diospita yachatsikur sïguinapaq jaqimänapaqmi mañakunantsik, tsënöpa “llapan shonquwan Diosta sirwirnin y imatapis gänas gänaslla rurar shumaq y yamë kawakur sïguinantsikpaq” (1Ti 2:1, 2).
Chikeqninkunam apostol Pablutawan Pëdrutaqa chikir sufritsiyarqan, tsëmi cristiänu mayinkunaqa pëkunapaq mañakuyarqan jutinkunapa (Hch 12:5; Ro 15:30, 31). Jina noqantsikpis, itsa höraqa musyashwantsu chikiyanqanrëkur sufrikaq cristiänu mayintsikkunapa jutinkunata, peru congregacionnimpa o llawirëkäyanqan nacionnimpa jutintam mañakïnintsikchö nirishwan.