Jeftëpa änikïnin

¿IMËLLAQA änikonqëki cumplinan sasa kashqaku? Tsëshi dibüjochö llakishqa këkaq nunata pasanaq. Këqa israelpa valiente jueznin Jefté nishqan nunash.

Jehoväta israelïtakuna manana adorayanqan tiempochöshi kawanaq Jeftëqa. Yapëshi mana allikunata rurëkäyan. Tsëshi, Amón markapa nunankuna imëka mana allikunatapis israelïtakunata rurayänampaq Jehová haqirin. Tsënash, ‘alläpam hutsallakuyarqö. ¡Salvëkalläyämë!,’ nishpa mañakuyänaq israelïtakunaqa Jehoväman.

Tsë mana alli rurëninkunapitash alläpa lamentayan. Tsënash yapë Jehová Diosta adorar qallëkuyan. Tsëta rurayaptinshi yapë yanapan Jehová.

Y mana alli amonïtakunawan peleayänampaqshi israelïtakuna akrayan Jeftëta. Tsëshi tsë peleachö Jehová yanapananta alläpa munanaq Jefté. Tsëshi, ‘qam peleata ganatsimaptikeqa, puntata wayïpita chaskimaqnï yarqamoqtam qoykushqëki,’ nishpash äninaq Jehoväta.

Jefté änikonqantash Jehová wiyanaq, y tsëshi yanapanaq peleachö gananampaq. ¿Piraq puntata yarqaramorqan Jefté chaskeq wayinman kutiriptin? Hapallan warmi tsurinshi. ‘¡Ay, warmi wambrallä! ¡Imëka llakikïtam qoykamanki!,’ nishpash waqanaq Jefté. ‘Pero Jehovätam anikushqä, y cumplinämi tsë änikonqätaqa.’

Tsë papänin änikonqanta musyarirshi alläpa llakishqa tikrarinaq Jeftëpa tsurin, papäninta y amïgonkunata haqirinan kaptin. Pero Siló tabernäculochöshi Jehoväta sirvenqa wanonqanyaq. Tsënash, ‘cumplinëkim Jehoväta änenqëkitaqa,’ nishpa ninaq papänin Jeftëta.

Tsënönash Silöta ewkun Jeftëpa tsurin tabernäculochö wanonqanyaq Jehoväta servinampaq. Y cada watash chusku hunaq israelita warmikuna watukayan tsëman animayänampaq. Jehoväpa alläpa alli sirveqnin kaptinshi israelïtakuna alläpa kuyayan Jeftëpa tsurinta.