Llapan mana allikunapa ushakënin

¿IMATATAQ këchö rikanki? Yulaq cabällonkuna montashqa soldädokunatam. Pero ¿mëpitaraq shamïkäyan? ¡Cabällokunaqa pukutë rurimpitash ciëlopita patsë raslla shamïkuyan! ¿Kantsuraq cabällokuna ciëlochö?

Manam, manam rasumpëpa cabällokunatsu kayan këkunaqa. Cabällokunaqa manam pukutëchö ëqiyantsu, tsëmi kënö nintsik. Pero Bibliaqa ciëlochö cabällokunapaqmi parlan. ¿Imanir-raq musyankiku?

Unë guerra peleakunachö alläpa cabällokunata inshiyashqa kayaptinshi. Tsëshi kë Patsachö mana alli nunakunawan Teyta Diospa guërran kanqanta rikätsimantsik, Bibliachö ‘ciëlopitam nunakuna cabällokunachö yarpayämun,’ nishpa nimarnintsik. ¿Mëchöraq kanqa kë guërraqa? Armagedón nishqanchöshi, y kë Patsapitash llapan mana allikunata ushakätsenqa.

Kë Armagedón guërrachöqa Jesusshi pushanqa kë peleataqa. Gobiernompa reynin kanampaqqa Jesusta Jehová akranqanta yarpë. Tsëshi peqanchö corönayoq Jesusqa. Y llapan Teyta Dios chikeqkunata ushakätsimunantash rikätsimantsik espädayoq shamïkanqanqa. ¿Espantashwantsuraq Teyta Dios llapan mana alli nunakuna ushakätsimunanta?

Chunka Willakïta ashirïkï. ¿Imatataq tsëchö rikanki? Llapan mana alli nunakunata wamayëpaq tamya yaku ushakëkatsimonqantam. ¿Piraq tsë wamayëpaq tamyataqa tamyëkatsimorqa? Jehová Diosshi. Kananqa 15 Willakïta ashirïki. ¿Imaraq tsëchö pasëkan? Sodoma y Gomorra markakunatash ninawan Jehová ushakëkätsin.

Y kananna 33 Willakïman pasarïkï. Egipciokunapa guerra cärronkunata y cabällonkuna pasëkanqanta rikärïkï. ¿Piraq hanankunaman yakuta kutirkatserqan? Jehová Diosshi kanaq. Markanta salvanampaqshi rurëkunaq. Kananqa 76 Willakïta ashirïkï. Tsëchömi mana alli tikrakuriyaptin akrashqa markan këkaptimpis ushakäratsiyänampaq haqirenqanta rikanki.

Tsëmi mana espantashwantsu, kë Patsaman mana allikunata ushakäratsimunampaq ciëlopita patsë Jehová angelninkunata kachëkamunanta. ¿Imaraq tsëpitaqa pasanqa? Waqtan päginachömi masllata yachakurishun.