Lección 4

¿Pitaq Diablo?

¿Imanöraq yurerqan Satanás Diablo? (1, 2)

¿Imanotaq nunakunata ulipan? (3-7)

¿Imanirtaq qam alleq tsarakunkiman mana Diablopa makinman ishkinekipaq? (7)

1. “Diablo” ninanqa, wakin nunakunapaq mana allikunata ulikurkuryan parlaq, ninanmi. “Satanás” ninanqa chikikoq, contrakoq, ninanmi. Kenomi Bibliachoqa shutitsin Diospa principal chikeqninta. Qallananchoqa huk alli angelmi karqan, cielocho Dioswan taraq, tsepitanam Diosllata adorana këkaptin, kallpayoq tukurnin, yachaq tukurnin, shumaq tukurnin, munarqan nunakuna Diostano adorayänanta (Mateo 4:8-10).

2. Kë ángel, Satanás shutiyoqmi, huk culebrata insherqan Evata parlapänampaq, tsenomi ulikininwan hutsaman ishkiratserqan. Tsenopam Diospa “llapampitapis hatun Autoridadninta”, Más Hatun kenintawan, Satanás pepaq munarnin contrarqan. Tseno karmi pekunata dudatserqan, Dios Nunankunapaq alli gobernamunanta. Hina nerqanmi manam ni pi nuna Diosta kuyanqatsu. Tseno karmi Diospa chikeqnin tikrarerqan. Tsepita patsemi Satanás Diablo shutita chaskerqan (Génesis 3:1-5; Job 1:8-11; Revelación 12:9).

3. Nunakuna ulipetam tïran Satanasqa, peta adorayänampaq (2 Corintios 11:3, 14). Tsetaqa ruran ulikoq religionta inshirninmi. Huk religioncho Diospita ulipäkuyaptenqa, Satanaspa munënintam rurëkayan (Juan 8:44). Ulikoq religionkunapa nunankunaqa Diostam adoraya niyanmi, razompëpaqa, Satanastam adorekayan, ‘pëmi kë tiempopa diosnin’ (2 Corintios 4:4).

4. Hina brujeriakunatam inshin Satanás, makincho nunakunata tsaränampaq. Wakinqa mañakuyan espiritukunatam, mana allikunapita tsapekuyänampaq, wakinnam chikeqninkunata mana allikunata rurayänampaq, llapan shamoq kawekunata musyayänampaq, ima milagrokunatapis rurayäpunampaq. Kë llapan mana alli rurëkunapa qepanchomi Satanás kekan. Diosta kushitsita munarqa manam ashishwantsu ni imanopa brujeriakunata (Deuteronomio 18:10-12; Hechos 19:18, 19).

5. Satanasqa nunakunatam ulipan allapa orgulloso razankunawan kayänampaq, politicakunaman markakuyänampaq. Wakin nunakunam creiyan pekunapa markankuna, razankuna, wakimpitapis más alli kanqanta. Tseqa manam razompatsu (Hechos 10:34, 35). Wakinnam shuyaräyan politicokuna llapan sasa kawekunata altsayänanta. Tsenopam Diospa Reinompita wiyakita munayantsu, tse Reinolla llakikïnintsikta altsamunan këkaptin (Daniel 2:44).

6. Hina Satanasqa nunakunata ulipan mana alli rurëkunata munapätsir. Ama mana allikunata rurayetsu nimantsikmi Jehovaqa, hipatsimänantsikta musyarnin (Gálatas 6:7, 8). Wakinkuna munayanmanchi mana alli rurëninkunata qampis ruranekita. Yarpänekim, tse mana allikunata ruranekitaqa munan, Satanasmi, manam nunakunatsu (1 Corintios 6:9, 10; 15:33).

7. Jehovata haqinekita munarmi Satanasqa inshinman chikikoqkunata, qatikachäkoqkunatapis. Quizasmi wakin kastekikuna munayanmantsu Bibliapita yachakunekita. Wakinnam ashayäshurniki asikuyanqa qampita. Yarpänekim ¿pïrekurtaq kawanki? Satanasqa mantsakätsishinikitam munan, Jehovapita mana yachakunekipaq. Ama vencishitsu (Mateo 10:34-39; 1 Pedro 5:8, 9). Diablo munanqanta mana rurarnenqa, Jehovatam kushitsinki, tsenopam Autoridadninta respetanqekita rikarätsinki (Proverbios 27:11).

[9 kaq päginachö dibüjukuna]

Uli religión, brujeriakuna, nacionninrekur wanutsikoqkunam, ulipayan nunakunata

[9 kaq päginachö dibüju]

Jehovapita alleq yachakurmi tsarakunki, Satanás munanqanta mana ruranekipaq