Lección 15

Nunakunata yanapashun Diospa voluntadninta rurayänampaq

¿Imanirtaq parlankiman yachakïkanqekipita? (1)

¿Pikunataraq alli willakita yachatsinkiman? (2)

¿Imanöraq alli portakiniki yanapanman wakinkunata? (2)

¿Imepita patseraq yarqur qallëkunkiman predicacionman, llapan congregacionwan? (3)

1. Qamqa atska allikunata yachakorqonkinam Bibliapita. Kë yachakonqekim yanapashunkiman mushoq cristianona kanekipaq (Efesios 4:22-24). Hinamampis tse yachakïnikiwanmi tarinki wiñeypaq kaweta (Juan 17:3). Nuna mayikipis wiyananmi, tse alli willakïkunata salvakuyänampaq. Llapan razompa cristianokunaqa yachatsikuyänanmi. Tseqa Dios mandakonqanmi (Romanos 10:10; 1 Corintios 9:16; 1 Timoteo 4:16).

2. Llapan reqenqekikunatam willapankiman alli yachakïkanqekikunata. Hina willape amiguikikunata, kastekikunata, escuelacho yanaqikikunata, uryaq mayikikunatapis. Yachatsi, kuyellapa mana piñakushpa (2 Timoteo 2:24, 25). Yärpe nunakunaqa rikayan imanöpis kanqantsiktam, manam parlanqantsikllatatsu. Tsemi alli portamientontsik yanapamashun, yachatsikïnintsikta wakin nunakuna wiyayänampaq (Mateo 5:16; 1 Pedro 3:1, 2, 16).

3. Biblia nenqanta alli yachakurïkurnenqa, itsapis qallekunkimanna predicaq yarqurnin, Jehovapa testigonkunapa congregacionninwan. Keno ruraptikiqa allapa allim kanman (Mateo 24:14). ¡Imano kushikipaqraq kanman, pillatapis Jehovapa nunan kanampaq yanapëkuptikiqa, tsenopa wiñeypaq kaweta tarinampaq! (1 Tesalonicenses 2:19, 20.)