¿Imachötaq siervu ministerialkuna yanapakuyan?

Bibliaqa willakun ishkë grüpu nunakuna o runakuna congregacionta atiendiyanqantam, pëkunatam Jehoväpa testïgunkunaqa “anciänukuna y siervu ministerialkuna” nir reqiyä (Filipensis 1:1, NM). Kënö cristiänukunaqa congregacionchö atskaqmi kayan. ¿Imakunata rurartaq siervu ministerialkunaqa yanapakuyan?

Congregacionchö anciänukunatam yanapayan. Siervu ministerialkunaqa jövin y mayorpis Diospa kaqchö poqu, alli yanapakoq y confiakïpaq cristiänukunam kayan. Pëkunaqa congregacionchö llapan cargu qoyanqantam cumpliyan, kaqllata rurarpis alläpa precisaq trabäjutam rurayan. Tsënöpam anciänukunapaqqa tiempunkuna kan congregacionta yachatsiyänampaq y cristiänukunata watukar yanapayänampaq.

Precisaq kaqkunatam rurayan. Wakin siervu ministerialkunaqa reunionman shamoqkunatam shumaq chaskiyan y maskunachöpis yanapakuyan. Wakinkunanam yanapakuyan reunionchö llapan alli wiyakänampaq, publicacionkunachö, congregacionpa cuentankunachö y congregacion mëchö yachatsikunampaq kaqkunata alistarpis. Jina yanapakuyanmi Yachatsikuyänan Wayita altsëchö, y edäyashqa cristiänukunata imanö yanapayänampaq anciänukuna niyanqanta rurarpis. Ima trabäjuta rurayänampaq churayashqa kayaptimpis, gänas gänaslla rurayanqampitam respetashqa kayan (1 Timoteu 3:13).

Poqu cristiänu kayanqantam rikätsikuyan. Diospa kaqchö alli kayanqampitam siervu ministerialpaq akrashqa kayan. Discursar yachatsikayämunqanmi alli yanapayäman, yachatsikur punta puntachö kayanqanmi tsënölla rurayänäpaq yanapayäman, y tukïchö yanapakuyanqanmi yanapayäman Diosta jukllëllanölla kushishqa sirwiyänäpaq (Efesius 4:16). Tiempuwanqa pëkunapis anciänu këta puëdiyanmi.

• ¿Imanö nunakunataq siervu ministerialkunaqa kayan?

• ¿Imanötaq siervu ministerialkuna yanapakuyan congregacion alli kanampaq?