¿Imanötaq cristiänu mayïkuna sufriyaptin yanapayä?

Ima desgraciakuna pasakuptinqa Testïgukunaqa rasmi cristiänu mayïkunata yanapayä. Tsënö kayanqämi rikätsikun rasumpa kuyanakuyanqäta (Juan 13:34, 35; 1 Juan 3:17, 18). ¿Imanötaq tsëta rurayä?

Necesitäyanqanchömi yanapayä. Antioquia cristiänukunam, Judëachö mallaqë kaptin cristiänu mayinkunata yanapar qellëta apatsiyarqan (Hëchus 11:27-30). Tsënö kaqllam cristiänu mayïkuna täräyanqanchö ima desgraciakuna kaptin necesitäyanqanta musyarirqa, congregacionchö tukïta juntëkur pëkunapaq ras apatsiyä (2 Corintios 8:13-15).

Ëwëkurmi yanapayä. Desgracia kanqan sitiuchö këkaq anciänukunaqa congregacionchö kaqkunata llapantam ashiyan imanö këkäyanqantapis musyayänampaq. Desgraciakunachö yanapakoqkunam rikäyan mikïninkuna, yakunkuna, röpankuna, jampinkuna y mëchö punuyänampaqpis ashiyäpunqa. Atskaq Testïgukunaman viajayan desgracia kanqan sitiuman, tsëchö cristiänu mayinkunapa wayinkunata o Yachatsikuyänan Wayikunata altsar o maskunachöpis yanapakuyänampaq. Jukllëllanö kayanqäpita reqishqa kar y juntu trabajayanqämi yanapayäman desgraciakuna pasakuptin ras yanapanakuyänäpaq. Diosman (yärakoq) ‘marcäcoq mayïcunata’ yanaparpis, puëdiyanqämannömi yanapayä tukï religionyoq nunakunata (runakunata) (Gälatas 6:10).

Diospa kaqchö y alli kayänampaqmi yanapayä. Desgraciakunata pasaqkunaqa shoqanatam mas necesitäyan. Y tsëkunata pasaqkunataqa ‘shoqacoq Dios’ Jehovämi kallpata qon (2 Corintios 1:3, 4). Tsëmi, Diospa Gobiernunlla llapan sufrimientukunata ushakätsinampaq kaqta Biblia willakunqanta llakikushqakunata yachatsiyä (Apocalipsis 21:4).

• ¿Imanirtaq Testïgukunaqa desgraciakuna kaptin ras yanapanakuyä?

• ¿Imanötaq Diospa kaqwan desgraciakunachö salvakoqkunata yanapayä?