Wamrëkikunata imanö yachatsinëkipaq

Jehoväqa familiata kamarir, teytakunatam cargunkuna qorqan wamrankunata cuidayänampaq (Colosensis 3:20). Teyta karninqa, qammi yachatsinëki wamrëkikuna Jehoväta kuyayänampaq y poqurirnin imatapis yachëwan rurayänampaq (2 Timoteu 1:5; 3:15). Jina shonqunchö ima kanqantapis musyanëkim. Alläpam precisan rurënikiwan yachatsinëki. Tsëpaqqa, Diospa Palabranmi shonqïkichö kanan, tsënöpa wamrëkikunata yachatsinëkipaq (Salmu 40:8).

1 WAMRËKIKUNATA YANAPË QAMWAN PARLAYÄNAMPAQ

BIBLIA YACHATSIKUNQAN: ‘Alliraq wiyayë; ama manaraq alli cäyir, imatapis apurepa parlayëtsu’ (Santiägu 1:19). Wamrëkikuna pensayanqanta willayäshunëkita munanqëkiqa allillam. Peru tsëpaqqa, parlëta munayanqan höra wiyanëkipaq listu këkanqëkitam rikätsinëki. Familiachö yamë y shumaq kawakï kanantam procuranëki, wamrëkikuna mana mantsakushpa pensayanqanta parlakarayämunampaq (Santiägu 3:18). Tsënö mana kaptinqa, itsa pensayanqanta llapantatsu willayäshunki. Pacienciakoq kë y kuyanqëkita imëpis musyëkätsilla (Mateu 3:17; 1 Corintius 8:1).

ITSA KËNÖ RURANKIMAN:

• Wamrëkikuna parlëta munayanqan höram wiyanëkipaq listu këkänëki

• Ama problëmakuna kaptinllaqa wamrëkikunawan parlëtsu, sinöqa imëpis parlëlla

2 IMA NÏTA MUNAYANQANTA ENTIENDITA PROCURË

BIBLIA YACHATSIKUNQAN: “Alli tantiyëkur-raq ima asuntutapis rikaqqa allimanmi chanqa” (Proverbius 16:20). Imanö sientikunqanta entiendinëkipaqqa, imanir tsënö nishunqëkitam entiendita procuranëki. Jövinkunaqa mana pensayanqantam höraqa parlariyan. “Pipis manaraq wiyarnin ima asuntupaqpis raslla contestarqa, upa kanqantam rikätsikun.” (Proverbius 18:13.) Tsëmi, rasllaqa piñakunëkitsu (Proverbius 19:11).

ITSA KËNÖ RURANKIMAN:

• Wamrëki imatapis willashuptiki kallpachakï mana pantatsinëkipaq y mana piñakunëkipaq

• Yarpëta procurë wamra kar imanö sientikunqëkita y imakuna qampaq mas precisanqanta

3 JUK PENSËYOQLLA KAYË

BIBLIA YACHATSIKUNQAN: “Kuyashqa wamrä, teytëkipa yachatsikïninta wiyakï, y mamëkipa leyninta ama jaqitsu” (Proverbius 1:8). Teytatawan mamatam Jehoväqa cargun qoshqa wamrankunata cuidayänampaq. Ishkankunam wamrankunata yachatsiyänan respetakoq y cäsukoq kayänampaq (Efesius 6:1-3). Pëkunaqa cuentata qokuyanmi teytankuna ‘juk pensëyoqlla’ mana kayanqanta (1 Corintius 1:10, NM). Tsëmi imachöpis acuerdu mana karninqa, wamrëkikunapa nöpanchö ama plëtuyëtsu, tsë pasakuptinqa itsa respetayäshunkinatsu.

ITSA KËNÖ RURANKIMAN:

• Wamrëkikunata imanö corrigiyänëkipaq kaqta decidiyë

• Wamrëkikunata imanö wätayänëkipaq kaqta majëkiwan igual mana pensarpis, imanir tsënö pensanqanta entiendita procurë

4 IMANÖ RURAYÄNËKIPAQ KAQTA PATSATSIYË

BIBLIA YACHATSIKUNQAN: “Wamrata yachatsi alli nänipa ëwanampaq” (Proverbius 22:6). Wamrëkikuna alli nuna kayänanta munarqa, alleqmi yachatsinëki. Imanö yachatsiyänëkipaq kaqtam puntallapitana shumaq patsätsiyänëki (Salmu 127:4; Proverbius 29:17). Alli kaqta ruranampaq yanapëqa manam castigananllatsu, sinöqa imata ruranampaq kaqta, imanir ninqëkita entiendinampaq yanapëmi (Proverbius 28:7). Jina yachatsi Diospa Palabranta kuyanampaq y tsëchö këkaq yachatsikïkunata tantiyanampaqpis (Salmu 1:2). Tsënöpam alli concienciayoq kayanqa (Hebrëus 5:14).

ITSA KËNÖ RURANKIMAN:

• Kallpachakï wamrëkikuna Dios rasumpa kanqanman creiyänampaq y pëman markäkuyänampaq

• Alli portakïninta peligruman churaq Internetchö imëka mana alli yarqamoqkunata alli tantiyanampaq, y tsëkunaman mana ishkinampaq yanapë. Wamrakunata violaqkunapa makinman mana ishkiyänampaq yachatsi