8 KAQ YACHATSIKÏ
Juk desgracia pasakuptin
“Qamcuna cushishqa[m] quecayanqui. Capasmi que bidacho imapis nacaquicunata pasayanqui, peru tsecunaqa rasllam pasarenqa.” (1 Pëdru 1:6)
Casädu kawakïniki y familiëki kushishqa kanampaq imëkata ruraptikipis, höraqa itsa illaqpita imallapis pasakurnin kushikïnikita ushakäratsinman (Eclesiastes 9:11). Peru Diosmi imëkanöpa yanapamantsik mana allikunapa pasashqa. Bibliapa musyatsikïninkunata wiyakurninqa, qam y familiëkipis imëka problëmakunapa pasëkarpis alleqmi tsarakuyanki.
1 JEHOVÄMAN MARKAKÏ
BIBLIA YACHATSIKUNQAN: “Imapis yarpacachëniquicunata Diosnintsicpa muneninman jaqiriyë. Pëqa cuyecamantsicmi” (1 Pëdru 5:7). Yarpë, problëmëkikunapita Dios mana culpayoq kanqanta (Santiägu 1:13). Pëman witiptikiqa, yanapashunkim (Isaïas 41:10). “Llapan shonqikïkunawan pëta parlapäyë.” (Salmu 62:8.)
Jina, llapan junaqkuna Bibliata leyinqëki y yachakunqëkipis yanapashunkim. Tsënö rurarqa, Jehovä ‘nacaquinintsiccunacho shoqamaqnintsic’ kanqantam rikanki (2 Corintius 1:3, 4; Romänus 15:4). Pëqa änishunki ‘shonqïki y pensamientïki mana llakikushpa’ kanampaq yanapashunëkipaqmi (Filipensis 4:6, 7, 13, NM).
ITSA KËNÖ RURANKIMAN:
Jehoväta mañakï yamë këta qoshunëkipaq y alli pensanëkipaq
Llapan akranëkipaq kaqkunata alleq rikë y mas yanapashunëkipaq kaqta akrë
2 KIKIKITA Y FAMILIËKITA CUIDË
BIBLIA YACHATSIKUNQAN: “Entiendeq nunaqa alli yachëtam tarin. Yachëyoq nunaqa alli yachëtam wiyëta procuran” (Proverbius 18:15). ¿Imatataq wanayan familiëkichö cada ünu? Llapan wanayanqanta musyëta procurë. Pëkunawan parlë y niyäshunqëkita wiyë (Proverbius 20:5).
¿Imanötaq sientikunki pï kuyanqëkipis wanuptin? Ama penqakïtsu imanö sientikunqëkita willakïta. Yarpë, hasta ‘Jesuspis waqarqanmi’ (Juan 11:35; Eclesiastes 3:4). Jina precisanmi jamanëki y alleq pununëkipis (Eclesiastes 4:6). Tsëmi, imëka problëma kaptimpis alli tsarakunëkipaq yanapashunki.
ITSA KËNÖ RURANKIMAN:
Ima desgraciapis manaraq pasakuptin familiëkiwan shumaq parlayë. Tsënöpam, problëmakuna kaptimpis mana mantsakushpa qamwan parlayanqa
Parlari tsënö problëmakunapa pasashqa kaqkunawan
3 WANANQËKI YANAPAKÏTA ASHI
BIBLIA YACHATSIKUNQAN: “Llapan tiempuchömi rasumpa amïguqa kuyakun. Y llakikï tiempuchö yanapamänapaq yurishqam” (Proverbius 17:17). Amïguïkikunaqa yanapashïnikitachi munayan, peru itsa musyayantsu imanö rurëta. Qamrëkur imata rurëta puëdiyanqanta willë (Proverbius 12:25). Jina Bibliapita alli yachaqkunata Diospa kaqchö yanapayäshunëkipaq ashi. Bibliawan consejayäshunqëkita wiyakurqa allim tsarakunki (Santiägu 5:14).
Diosman rasumpa creikoq y änikunqankunaman markäkoq nunakunawan imëpis juntakurqa, wananqëki yanapakïtam tarinki. Wakinkunata llakikïninchö yanapanqëkiqa, qamtapis yanapashunkim. Jehoväman markäkunqëkipita y änikïnimpita parlapë. Wakinkunata yanapar ocupädu kë y qamrëkur yarpachakoqkunapita y kuyayäshoqnikikunapita ama karupäkuritsu (Proverbius 18:1; 1 Corintius 15:58).
ITSA KËNÖ RURANKIMAN:
Alli kaq amïguïkiwan parlë y yanapashunëkita jaqi
Imata wananqëkitapis rasumpa kaqllata willë