Diosqa ollquta y warmitam rurarqan

Eden niyanqan sitiuchömi Jehoväqa juk huertata rurarqan. Tsëchöqa mëtsika wëtakuna, plantakuna y animalkunam karqan. Tsëpitaqa Adan jutiyoq nunatam puntata rurarqan. Allpapita rurarirmi, kawar qallanampaq senqanman pükëkurqan. Jehoväqa tsë huertata cuidanampaq y animalkunapa jutinta churanampaqmi Adanta mandarqan.

Jehoväqa kënömi Adanta nirqan: “Huertachö këkaq plantakunapa frütantaqa mikuyta puëdinkim. Peru ima alli kanqanta y ima mana alli kanqanta musyatsikoq plantapa frütantaqa ama mikunkitsu, mikurqa wanunkim”.

Tsëpitanam Jehoväqa, “Adanta yanapanampaq yanaqin o wallkin” rurashaq nirqan. Tsëmi Adanta punukäratsir, juk costillanta jipirir, tsë costillampita warmin rurapurqan. Y warmimpa jutinqa Ëvam karqan. Pëkunam Jehovä puntata kamanqan kaq familia kayarqan. ¿Imanötan Adanqa sientikurqan warminta rikëkur? Alläpa kushikurmi kënö nirqan: “¡Pëtaqa costilläpitam Jehovä rurashqa! ¡Kananqa manam japallänatsu kashaq!”.

Adantawan Ëvataqa wamrankuna kanampaq y Patsa juntanqanyaq mirayänampaqmi Jehoväqa nirqan. Ishkan kushishqa trabajarnin entëru Patsata Eden huertatanö tikratsiyänantam Jehoväqa munarqan. Peru manam tsëta lograyarqantsu. Qateqnin kaqchömi imanir mana lograyanqanta yachakushun.