¿Pitan Jobqa karqan?

Jehoväta adoraq juk nunam, Uz niyanqan markachö tärarqan, y jutinqa Jobmi karqan, pëqa rïcu y atska familiayoqmi karqan. Jobqa alläpa alli nunam karqan. Tsëmi waktsakunata, viudakunata y papäninnaq y mamäninnaq wamrakunata yanapaq. Peru tsënö kaptimpis Jobtaqa imëka mana allikunam pasarqan.

Satanas Diabluqa Job llapan ruranqankunatam rikëkarqan. Tsëmi Jehoväqa Satanasta kënö nirqan: “¿Rikarqunkiku sirwimaqnï Job imanö kanqanta? Pënöqa manam ni pï Patsachö kantsu. Pëqa culpannaqmi, alli kaqllatam ruran y respetamarmi mana allikunataqa rurantsu”. Satanasnam kënö nirqan: “Pëqa cuidaptiki, bendiciptiki, chakrankuna y animalninkuna atska kanampaq permitiptikillam cäsushunki, peru llapan kapunqanta ushakätsiptikiqa, manam adorashunkinatsu”. Tsënam Jehoväqa kënö nirqan: “Llapan kapunqanmi makikichö këkan. Peru pëtaqa ama imanëtsu”. ¿Imanirtan Jehoväqa permitirqan Jobta Satanas pruëbaman churananta? Jehoväqa musyarqanmi sufrirpis o imëkapa pasarpis Jobqa cäsukunampaq kaqta.

Satanasqa imëka mana allikunawanmi Jobta pruëbaman churarqan. Puntataqa sabeukuna niyanqan nunakunam wäkankunata, törunkunata y ashnunkunata suwapuyarqan. Tsëpitanam llapan üshankunata ninawan ushakäratsirqan. Y juk grüpu Caldëu nunakunam camëllunkunata suwar apakuyarqan, y animalninkunata mitseqkunapis wanuyarqanmi. Peru tsëpitaran mas llakikuypaq desgraciaqa pasarqan: Mikur juntarëkäyanqan wayi juchuptinmi llapan wamrankuna wanuyarqan. Jobqa alläpa llakikurmi waqarqan, peru Jehoväta adorëtaqa manam dejarqantsu.

Satanasqa Job masraq sufrinanta munarmi entëru cuerpunchö qerita yuritsirqan, y tsëqa alläpam nanaq. Jobqa manam musyarqantsu imanir mana allikunapa pasëkanqanta, peru Jehoväta adorëtaqa manam dejarqantsu. Tsëta rikarqa Jehovä alläpachi kushikurqan.

Y Jobta sufritsir sïguinampaqmi Satanasqa kimaq nunakunata mandarqan, pëkunam Jobta kënö niyarqan: “Jutsata rurëkurmi qamqa pakëta munëkanki, tsëmi Diosqa castiguëkäshunki”. Jobnam nirqan, “noqaqa manam ni ima mana allitapis rurarqötsu”. Peru tiempu pasariptinqa, Jehovä pruëbaman churëkanqanta, y culpannaq këkaptin sufrikätsinqantam pensarqan.

Tsëchömi Elihü jutiyoq jövinpis këkarqan y llapan parlayanqantam wiyëkarqan. Tsëmi kënö nirqan: “Qamkunaqa llapëkim mana allita pensëkäyanki. Jehovä puëdeq kanqantaqa manam entiendïta puëdintsiktsu, pëqa manachi ni imëpis mana allitaqa ruranmantsu. Pëqa llapantam rikëkan, y problëmakunapa pasaqkunataqa yanapanmi”.

Jehoväpis Jobtaqa parlaparqanmi, y kënömi nirqan: “¿Mëchötan karqëki ciëluta y patsata ruranqä höra? ¿Imanirtan imatapis decidinqä mana alli kanqanta pensanki? Imatapis mana musyëkarmi qamqa parlëkanki”. Tsënam Jobqa pensanqan mana alli kanqanta cuentata qokurir, kënö nirqan: “Mana allitam parlarqö, parlanqäpita perdonëkamë. Qampaq parlayanqanllatam wiyarqö, peru kananqa nawïwanmi qamta rikarqoq”.

Pruëbakuna pasariptinllam Jehoväqa Jobta qeshyampita alliyätsirqan, y unë kapunqampitapis masmi bendicirqan. Jobqa unëran kushishqa kawakurqan, y imëka pruëbakunapa pasarpis cäsukoq kanqampitam Jehoväqa Jobta bendicirqan. ¿Y qamqa? ¿Jobnötsuraq kanki? ¿Imëka mana allikunapa pasarpis sïguinkitsuraq Jehoväta adorarnin?