Jehoväpa contranmi churakäyarqan

Tsunyaq sitiuchö israelïtakuna këkäyaptinmi Corë, Datan, Abiram y 250 nunakuna Moisespa contran churakäyarqan. Kënömi niyarqan: “¡Qamkunaqa alläpanam cölerëkatsiyämanki! ¿Imanirtaq qam pushayämaqnïkuna kanëki? ¿Y imanirtaq mandakoq sacerdötiqa Aaron kanan? Jehoväqa llapantsikwanmi këkan”. Tsënö niyanqanqa Jehoväta manam gustarqantsu. Pëkunaqa Jehoväpa contranmi churakëkäyarqan.

Moisesqa Corëtawan yanapaqninkunatam kënö nirqan: “Carbon puritsinaman inciensuta winarkur Teyta Jehoväpa rikëninman apayë. Tsëchömi Jehovä rikätsimäshun pikunata pëpaq akranqanta”.

Waränin junaqqa Corëwan 250 nunakunam ëwayarqan, Diospa carpa wayinman Moiseswan juntakäyänampaq. Tsëchömi sacerdöti tukur inciensuta kayayarqan. Tsënam Jehoväqa Moisestawan Aaronta kënö nirqan: “Corëpita y yanapaqnin nunakunapita witikuyë”.

Corëqa Moises ninqannöllam Diospa carpa wayinman ëwarqan. Peru Datan, Abiram y familiankunaqa manam ëwëta munayarqantsu. Tsëmi Jehoväqa israelïtakunata kënö nirqan: “Corëpa, Datanpa y Abirampa carpa wayinkunapita witikuyë”. Tsënam israelïtakunaqa jinan höra witikuriyarqan. Peru Datanwan Abiramqa, warminkunawan y tsurinkunawanmi carpa wayinkunapa punkunchö quedakuyarqan. Tsënam illaqpita patsa kichakar llapanta ushakäratsirqan, y Diospa carpa wayinchönam, ciëlupita nina urämur Corëtawan 250 nunakunata ushakäratsirqan.

Tsëpitanam Jehoväqa Moisesta kënö nirqan: “Kastankunata dirigeqkuna juk tukruta apayämunampaq israelïtakunata nï. Tsë tukrunkunamanmi kastankunata dirigeqkunapa jutinkunata qellqanëki. Peru Levïpa kastankuna apamunqan tukruchöqa Aaronpa jutintam qellqanëki, y llapan tukrukunatam Sagrädu Cäjapa rurinman churanëki. Y noqa akranqä nunapa tukrunqa wëtaramunqam”.

Waränin junaq Sagrädu Cäja këkanqanman Moises yëkuskirqa, Aaronpa tukruntam tseqllishqata, wëtëkaqta y poqushqa almendrakunayoqta llapan dirigeqkunata rikätsirqan. Tsënömi Jehoväqa cläru rikätsikurqan mandakoq sacerdöti kanampaq Aaronta akranqanta.