Juk mushoq juez y ishkë valienti warmikuna

Josuëqa mëtsika watapam Jehoväpa sirweqninkunata dirigirqan, y 110 watayoq këkarmi wanukurqan. Pë kawanqan witsanqa Jehovätam israelïtakuna adorayaq, peru wanuriptinqa Canaanchö täraq nunakunanömi santukunata adorar qallëkuyarqan. Tsënö mana cäsukoq kayaptinmi Jehoväqa Canaanpa gobernaqnin Jabin sufritsinanta permitirqan, tsënam israelïtakunaqa yanapëkunampaq Jehoväta rogakuyarqan. Tsëmi Jehoväqa Baracta akrarqan dirigeqninkuna kanampaq, y Baracmi israelïtakunata yanaparqan Jehoväta yapë adorayänampaq.

Diospa willakoqnin Dëboram Baracta qayatsirqan Jehovä kënö ninqanta willanampaq: “Jabinpa soldädunkunawan pelyanëkipaq 10.000 nunakunata pusharkur Cison mayuman ëwë. Tsëchömi soldädukunata mandaq Sïsarata vencinki”. Tsënam Baracqa kënö nirqan: “Noqawan ëwaptikiqa, ëwashaqmi”. Dëboranam kënö nirqan: “Awmi, ëwashunmi, peru Sïsarataqa manam qamtsu wanutsinki. Juk warmi wanutsinampaqmi Jehoväqa nishqa”.

Dëborawan Baracqa soldädukunata pusharkurmi Tabor jirkaman witsäyarqan. Y tsëta musyarirmi Sïsaraqa guërrapaq carrëtankunata y soldädunkunata Cison pampaman pusharqan. Dëboraqa kënömi nirqan Baracta: “Kanan junaqmi Sïsarata wanutsinëkipaq Jehovä Dios yanapashunki”. Tsënam Baracqa 10.000 soldädunkunata pusharkur Sïsarapa mantsëpaq soldädunkunawan pelyaq urarqan.

Tsënam Cison mayuta Jehovä atskayäratsiptin më tsëpa yaku ëwar entëruta leqitäratsirqan, y Sïsarapa carrëtankunaqa yakakarmi ushayarqan. Sïsaraqa carrëtampita yarpurirmi qeshpir ëwakurqan. Tsënam Baracwan soldädunkunaqa Sïsarapa soldädunkunata llapanta wanutsiyarqan. Peru Sïsaraqa Jael jutiyoq warmipa carpa wayinmanmi chärirqan. Tsënam Jaelqa lichita qararir frazädawan qatarkurqan, y Sïsaraqa alläpa pishipashqa karmi punukärirqan. Tsëmi Jaelqa carpapa estäcanta y taksha combata aptarkur yachëllapa witïkur peqampa o umampa estäcata clavëkurqan, tsënömi wanuratsirqan.

Tsëpitanam Baracqa Sïsarata ashir Jaelpa carpa wayinman chärirqan, tsënam Jaelqa kënö nirqan: “Shamuy, ashikanqëki nunatam rikätsishqëki”. Y yëkurirqa wanushqa jitarëkaqtam Sïsarata rikärirqan. Baracwan Dëboraqa chikeqninkunata venciyänampaq Jehovä yanapanqampitam cantarnin alabayarqan. Tsëpitaqa 40 watapam israelïtakunaqa yamë kawakuyarqan.