Änaqa wamrayoq këta munarmi Diosta mañakurqan

Elcanä jutiyoq nunaqa ishkë warmiyoq israelïtam karqan. Juknin kaq warmimpaqa Änam jutin karqan, y juknimpanam Peninä. Peru Elcanäqa Änatam masqa kuyaq. Peninäpaqa atskam wamrankuna karqan, peru Änaqa qolloqmi karqan, tsëmi Peninäqa Änapita burlakoq. Elcanäqa Jehoväta carpa wayinchö adorayänampaqmi Silö markata wata wata familianta pushaq. Juk kutim Änata alläpa llakishqata rikärqan, tsëmi kënö nirqan: “Ama waqëtsu Äna. Noqaqa läduykichömi imëpis këkäshaq, y musyankim alläpa kuyanqaqta”.

Tsëpitanam Änaqa Diosman mañakoq japallan ëwarqan y waqarninmi yanapëkunampaq Jehoväta rogakurqan. Kënömi nirqan: “Jehovä, wamrä këkunanta permitïkuptikiqa, qampaqmi kanqa y wanukunqanyaqmi o wañukunqanyaqmi sirwishunki”.

Waqëkaqta y shiminlla kuyuykaqta rikëkurmi mandakoq sacerdöti Elïqa machashqa këkanqanta pensarqan. Peru Änaqa kënömi nirqan: “Manam teytallë, manam machashqatsu këkä. Sinöqa alläpa llakishqa karmi Jehoväta parlapëkä”. Tsëran Elïqa pantanqanta cuentata qokurirqan y kënö nirqan: “Mañakunqëkinö Israelpa Diosnin bendicïkushuy”. Tsënam Änaqa yamëna kutikurqan, y manaraq juk wata cumpliptinmi wamran yuririrqan, y Samuel nirmi jutin churarqan. Änaqa alläpachi kushikurqan.

Änaqa yarparëkarqanllam Jehoväta äninqanta, tsëmi Samuelta wasqirirlla Diospa carpa wayinman aparqan. Y kënömi Elïta nirqan: “Teyta Jehovätam mañakurqä wamrayoq këta munar, y pëmi bendicimashqa wamrayoq kanäpaq. Tsëmi Jehoväta Samuel wanunqanyaq sirwinampaq apëkämü”. Elcanäwan Änaqa wata watam Samuelta watukaq ëwayaq, y mangannaq röpantam apayaq. Tiempu pasariptinqa, Jehovä bendiciptinmi Änapaqa kima o kimsa ollqu wamrankuna y ishkë warmi wamrankuna kapurqan.