Gobernanti Davidqa jutsatam rurarqan

Saul wanuriptinqa Davidnam 30 watayoq këkar gobernanti këman chärirqan. Juk kutim Davidqa tardi höra palaciun jananchö purikar juk shumaqllan warmi bañakuykaqta rikärirqan. Tsënam mandakurqan tsë warmi pï kanqanta musyayämunampaq, y musyaq ëwaqkunanam, “pëqa hitïta Urïaspa warmin Bat-Sebam” nir willayarqan. Tsënam wayinman qayëkatsir pëwan punukuykurqan, y Bat-Sebaqa qeshyaqmi tikrarirqan. Davidqa jutsanta mana willakuyta munarmi, soldädunkunapa mandaqninta nirqan guërrachö këkaq soldädukunapa puntaman Urïasta churëkur japallanta dejariyänampaq. Tsëchömi Urïasta wanuratsiyarqan, y Davidqa Bat-Sëbawanmi casakurirqan.

Peru Jehoväqa llapantam rikëkarqan. ¿Y imatataq rurarqan? Willakoqnin Natantam Davidman mandarqan. Y Natanqa kënömi Davidta nirqan: “Juk rïcu nunapam mëtsika üshankuna karqan, y waktsa nunapaqqa, rantinqan jukllëlla üshanmi karqan. Peru tsë rïcu nunaqa kikimpa ushanta visïtampaq pishtanampa rantinmi, tsë waktsa nunapa jukllëlla üshantam pishtarirqan”. Tsënam Davidqa alläpa cölerakur kënö nirqan: “¡Tsëta ruraq nunataqa wanutsiyänanmi!”. Y Natannam nirqan: “¡Qammi kanki tsë mana allita ruraq nunaqa!”. Tsëmi Davidqa alläpa llakikur “Jehoväta cöleratsirmi jutsata rurëkurqö” nirqan. Jutsata ruranqampitam Davidqa imëka mana allikunapa pasarqan, y familiampis sufrirqanmi. Jehoväqa Davidta castigarqanmi, peru arrepentikushqa kaptin y humildi kaptinmi kawar sïguinanta permitirqan.

Davidqa Jehoväpaqmi juk templuta rurëta munarqan. Peru Jehoväqa Davidpa tsurin Salomontam akrarqan tsë templuta ruratsinampaq. Tsëmi Davidqa Salomon templuta ruranampaq imëkata alistapakur qallëkurqan. Y kënömi nirqan: “Jehoväpa templunqa alläpa shumaqmi kanan. Salomonqa jövinllaran, peru llapanta alistarmi yanapashaq”. Tsëmi Davidqa tsë templuta rurayänampaq mëtsika qellëta entregarqan. Y trabajëta yachaq nunakunatam ashirqan, örutawan pläta metaltam alistarqan y Sidonpita y Tïrupitam cedru qerukunata apatsimurqan. Y wanukunampaqna këkarmi templuta ruratsinampaq Salomonta plänuta entregarqan y kënömi nirqan: “Imanö rurakänampaq kaqta dibujëkur entreganäpaqmi Jehovä nimashqa. Valienti kë y ama mantsapakuytsu. Jinan höra ruratsir qallë”.