Jesusmi Diospa Akrashqan karqan

Juanqa kënö nirmi willakurqan: “Noqapitapis mas puëdeqmi ichikllachöna chämunqa”. Jesusqa 30 watayoqnö këkarmi Galilëapita Jordan mayuman ëwarqan, y nunakunata bauticëkaqtam Juanta tarirqan, y pëtapis bautizanantam munarqan. Peru Juanqa kënö nirmi michëta munarqan: “Noqam bautizamänëkitaqa wanä, tsëqa, ¿imanöparaq qamta bautizaqman?”. Tsënam Jesusqa kënö nirqan: “Kananlla tsënö katsun, tsënö ruranqantsikmi Teyta Dios munanqan rurakänampaq yanapakunqa”. Tsëmi Jordan mayuman ishkan yëkuyarqan, y tsëchömi yakuman tullpur Jesusta bautizarqan.

Y Teyta Diosman mañakuykaptinmi ciëlu kichakärirqan, y santu espïritum paluma niraq pëpa jananman urämurqan, y ciëlupitam kënö neq wiyakarqan: “Qammi kuyë Tsurï kanki, qampaqmi alläpa kushikü”.

Tsënömi Jesusqa Jehoväpa podernin santu espïrituta chaskirqan. Y tsë hörapitam Cristu o Diospa Akrashqan këman charqan. Y listunam këkarqan Jehovä llapan mandanqanta Patsachö ruranampaq.

Tsëpitanam Jesusqa tsunyaq sitiuman ëwarqan, y tsëchömi 40 junaq karqan. Kutiramurqa Juanta rikaqmi ëwarqan, y Juanqa shamuykaqta rikëkurmi kënö nirqan: “¡Rikäyë, taqëmi nunakunapa jutsanta ushakätsinampaq Teyta Dios mandamunqan Orqu Üsha!”. Tsënöqa nirqan, Diospa Akrashqan Jesus kanqanta nunakuna cuentata qokuyänampaqmi. ¿Y musyankiku tsunyaq sitiuchö këkaptin Jesusta ima pasanqanta? Tsëtaqa qateqnin kaqchömi yachakushun.