Diabluqa Jesustam tentëta munarqan

Jesus bautizakuriptinllam santu espïrituqa tsunyaq sitiuman pusharqan. Tsëchömi Jesusqa 40 junaq y 40 paqas ayunashqa kar, alläpa mallaqar këkarqan. Tsënam Diabluqa pëman witïkur tentëta munar kënö nirqan: “Diospa tsurin karqa, kë rumikunata nï tantaman tikrayänampaq”. Jesusnam kënö nirqan: “Qellqarëkanmi: ‘Nunaqa manam pachata mikurllatsu kawan, sinöqa Teyta Jehovä ninqanta wiyakurmi’”.

Tsëpitanam Diabluqa Jerusalenchö templupa mas altu kaq perqanman aparqan, y kënömi nirqan: “Diospa tsurin karqa, mä këpita jeqarkuy, qellqarëkanmi: Diosqa ‘Angelninkunatam mandamunqa’ salvashunëkipaq”. Jesusnam kënö nirqan: “Kënöpis qellqarëkanmi: ‘Ama Jehovä Diosnikita pruëbaman churëtsu’”.

Tsëpitanam Diabluqa jatun jirkaman apëkur Patsachö llapan gobiernukunata y riquëzankunata rikätsirqan, y kënömi nirqan: “Qonqurïkur juk kutilla adorëkamaptikiqa, kë llapanmi qampaq kanqa”. Tsënam Jesusqa nirqan: “¡Këpita yarquy Satanas! Qellqarëkanmi: ‘Teyta Jehovätam adoranëki, y pëllatam sirwinëki’”.

Tsënam Diablu ëwakuptin, angelkuna shamur Jesusta atiendiyarqan. Tsëpitanam Diospa Gobiernumpita alli noticiakunata yachatsikur qallëkurqan. Tsëta ruranampaqmi Jehovä mandamushqa karqan. Nunakunaqa kushishqam wiyakuyaq Jesus yachatsikunqanta, y mëpa ëwaptimpis qatirmi ëwayaq.