Jesusqa atska milagrukunatam rurarqan

Jesusqa Diospa Gobiernumpita alli noticiakunata willakoqmi Patsaman shamurqan. Y Jehoväpa podernin santu espïritum yanaparqan milagrukunata ruranampaq. Tsënömi rikätsikurqan Diospa Gobiernunchö imakunata ruranampaq kaqta. Jesusqa qeshyëkaqkunatam alliyätsita puëdeq, tsëmi mëtsëchö rogakuyaq qeshyëkaqkunata alliyätsinampaq, y pëqa llapankunatam alliyätseq. Wiskukunata, mana wiyaqkunata y kuyukuyta mana puëdeqkunatam alliyätseq. Y nunakunapitam demoniukunata qarqoq. Wakinnäqa röpampa kuchunta yatëkurllam alliyäriyaq. Tsëmi nunakunaqa mëpa ëwaptimpis Jesusta qatiräyaq, pëqa utishqa o pishipashqa këkarpis llapankunatam yanapaq.

Juk kutim kuyukuyta mana puëdeq nunata chuskoq nunakuna pëman apayarqan. Peru mëtsikaq nunakuna tsëchö kayaptinmi Jesus kaqman yëkatsita puëdiyarqantsu. Tsëmi Jesus këkanqanman yëkatsiyänampaq, wayipa tëchunta kichëkur, kirmawan shumaqlla bajatsiyarqan. Tsënam Jesusqa kënö nirqan: “Sharkuy, kirmëkita aparkur wayikita ëwakuy”. Y purir qallëkuptinmi nunakunaqa alläpa espantakuyarqan.

Juk caserïuman yëkuykarnam, lepra qeshyayoq chunka nunakunawan tinkurqan. Peru pëkunaqa karullachömi shäkuriyarqan. Y fuertipam kënö niyarqan: “¡Jesus, Maestru, yanapëkayämë!”. Tsë witsanqa Leychömi neq, lepra qeshyayoq nunakunaqa pimampis mana witiyänampaq, y alliyäreq kaqkunaqa templuman ëwayänampaq. Tsëmi Jesusqa nirqan, “rikäyäshunëkipaq sacerdötikunaman ëwayë”. Tsënam ëwëkarnin leprankunapita alliyäriyarqan. Llapankunam cuentata qokuyarqan alliyärishqa kayanqanta, peru jukllëllam kutirqan Jesusta agradecikunampaq y Diosta alabanampaq.

12 watapana yawar ëwëwan qeshyëkaq warmim, nunakuna chowpimpa Jesus ëwëkaptin, qepampa witïkur röpampa kuchunta yatëkurqan. Y tsë höram tsë warmiqa alliyärirqan. Tsënam Jesusqa kënö nirqan: “¿Pitan janan kaq röpata yatamushqa?”. Tsë warmiqa alläpa mantsakarmi karkaryëkarqan, y Jesusman witïkurmi qonqurikuykur llapanta willarqan. Tsënam Jesusqa kuyëllapa kënö nirqan: “Hïja, markäkurmi o yärakurmi qeshyëkipita alliyarqunki yamëna ëwakuy”.

Jairu jutiyoq gobernadorpis, kënö nirmi Jesusta rogakurqan: “Warmi wamrallämi grävi këkan. Wayiman shamuykullë”. Peru wayinman manaraq chäyaptinmi wamranqa wanurirqan. Chärirqa, tsë wamrapa familiankuna y mëtsika nunakuna waqar këkäyaqtam Jesusqa tarirqan. Tsëmi nirqan, “ama waqayëtsu, pëqa punuykanllam”. Y wamrata makipita aptarkurmi, “wamra, ¡sharkamuy!” nir qayarqan. ¡Y kawarkamurmi tsë höra sharkurqan! Jesusqa imallatapis qarayänampaqmi nirqan. Tsëta rikëkurqa, ¿imanöraq teytankuna sientikuyarqan?