Manam yachatsikuyta dejayarqantsu

Yurikunqampita cöju nunam templuman yëkunanchö limushnata mañakur täraq. Juk tardim, Pëdruwan Juan templuman yëkuyänampaqna këkäyaptin, tsë nunaqa pëkunata limushnata mañakur qallëkurqan. Tsënam Pëdruqa kënö nirqan: “Plätawan öruqa manam kapamantsu, peru kapamanqantam qaraq. ¡Nazaretpita Jesucristupa jutinchö, puri!”. Tsënö nirmi derëcha makimpita aptarkur sharkatsirqan, tsë höram sharkur saltar qallëkurqan. Y llapan nunakunam tsë milagruta rikëkur alläpa kushikuyarqan, y mëtsikaqmi Señorman creikur qallëkuyarqan.

Peru mandakoq sacerdötikuna y saduceukunaqa alläpa cölerarmi, Pëdrutawan Juanta tsarïkurnin Judïukunapa Jatun Cortinman apayarqan. Tsëchömi, “¿ima poderwantan o pipa jutinchötan tsëta rurayarqunki?” nir tapupar qallëkuyarqan. Y Pëdruqa kënömi nirqan: “Qamkuna wanutsiyanqëki Jesucristupa jutinchömi”. Tsëmi tsë nunakunaqa fuertipa kënö niyarqan: “Jesuspa jutinchö, amana yachatsikuyëtsu”. Tsënam Pëdruwan Juanqa kënö niyarqan: “Noqakunaqa Jesuspa jutinchö yachatsikuytaqa manam dejayäshaqtsu”.

Tsënam Pëdruta y Juanta libri dejariyarqan. Y pëkunaqa jinan höram Jesuspa wakin qateqninkuna këkäyanqanman ëwarnin, mandakoq sacerdötikuna y markachö dirigeqkuna niyanqanta willayarqan. Y llapankuna juntum Jehoväman kënö mañakuyarqan: “Yanapëkayämë mana mantsakur qampa palabrëkipita parlar sïguiyänäpaq”. Tsënam Jehoväqa santu espïritunwan yanaparqan yachatsikur y nunakunata alliyätsir sïguiyänampaq. Y mas nunakunam Jesuspa qateqnin tikrayarqan. Tsëmi saduceukunaqa cölerakurnin apostolkunata yapë carcelatsiyarqan. Peru tsë paqasmi Jehoväpa angelnin carcelpa punkunkunata kicharqan, nïkurmi kënö nirqan: “Templuman yapë ëwar, nunakunata yachatsir sïguiyë”.

Waränin junaqqa judïukunapa Jatun Cortinchö carguyoq nunakunatam kënö nir willayarqan: “¡Carcelqa wichqashqa y segurashqam këkan, y rurichöqa manam pitapis tariyarqötsu! ¡Tsë carcelatsiyanqëki nunakunaqa templuchömi nunakunata yachatsir këkäyan!”. Tsënam apostolkunata yapë tsarïkurnin Judïukunapa Jatun Cortinman apayarqan. Tsëchömi mandakoq kaq sacerdöti kënö nirqan: “Tsë nunapa jutinchö mana yachatsikuyänëkipaq cläru mandëkäyapteqmi yachatsikur sïguikäyanki”. Tsënam Pëdruwan wakin apostolkunaqa kënö contestayarqan: “Nunakunata cäsuyänäpa rantinqa, gobernaq Teyta Diostam cäsukuyänä”.

Tsëmi mandakoq religiösukunaqa alläpa cölerarnin apostolkunata wanutsita munayarqan. Peru Gamaliel jutiyoq fariseum sharkurnin kënö nirqan: “¡Cuidädu kayë tsë nunakunata imata rurëta munayanqëkiwan! Capazchi kë nunakunataqa Dios yanapëkan, tsëqa capaz kikin Diospa contrampis pelyar këkäyankiman”. Tsëmi pë ninqanta rurayarqan. Apostolkunata qayëkatsirmi maqar ushayarqan, y Jesuspa jutinchö manana yachatsikuyänampaq nïrirmi ëwakuyänanta dejayarqan. Peru apostolkunaqa manam yachatsikuyta dejayarqantsu. Mana mantsapakurmi templuchö y wayin wayin yachatsikur sïguiyarqan.