Testïgukunata Pushaqkuna apatsiyämunqan carta

Jehovä Diosta y Palabran Bibliata kuyaqkunatam,

Jesusqa nirqan: “Rasumpa kaqtam reqiyanki, y rasumpa kaqmi librariyäshunki” (Juan 8:32). Bibliapita yachakurqa kushikurqëkim. Më tsëchö nunakuna ulikur o llullakur kayaptimpis, Diospita rasumpa kaqta yachakurqa kushikurqantsikmi (2 Timoteu 3:1).

Teytantsik Jehoväqa, pëpita yachakunatam munan. Y noqantsikqa, Diosnintsikta kuyarmi pï më nunata yachatsikoq ëwantsik. Tsënö kaptimpis, Diospa sirweqnin kanapaqqa mastaran ruranantsik. Jesusmi kënö nirqan: “Mandakunqäkunata wiyakurqa, kuyakïnïchömi imëpis kayanki, noqapis Teyta mandakushqankunata wiyakushqa kar, kuyakïninchö imëpis kanqänö” (Juan 15:10). Bibliachö yachakunqantsik imëkachö yanapamanqantsikta rikarmi, Jehovä Dios munanqannö kawakunapaq kallpachakuntsik.

Jesusqa Teytanta kuyanmi y llapan ninqantam cäsukun. Tsënölla noqantsikpis rurashqaqa, Teytantsik Jehoväqa kuyamäshunmi y kushishqam kashun. Jesusmi nirqan: “Tsëkunata musyarqa, kushishqam rurarninqa kayanki” (Juan 13:17).

Kë libruqa, Bibliachö yachakunqëkinö kawakunëkipaq y Teyta Dios kuyashunëkipaqmi yanapashunki. Jehovä Diosta mas kuyanëkipaq y ‘imëyaqpis kawakïta’ chaskinëkipaqmi, Diosman mañakëkäyämü (Jüdas 21).