Diosta reqita puëdinkim

Nunakunaqa unë tiempupitanam santukunata Diostanö adorayan. Peru Bibliachöqa kënömi nin: “Diosnïkunawanqa manam ima diospis igualantsu” (2 Crönicas 2:5). ‘Diosnïkuna’ nirqa, ¿pipaqtan parlëkan? Këchömi yachakunki Bibliachö willakunqan Dios pï kanqanta, reqinëkita munanqanta y santukunapita jukläya kanqanta.

1 KAQ: ¿Imatan Diospa jutin? Y, ¿imanötan musyantsik jutimpa reqinata munanqanta?

Diosnintsikqa Bibliachömi kënö nin: “Noqaqa Jehovämi kä, tsëmi jutï” (leyi Isaïas 42:5, 8). Hebreu idiömachöqa Jehovä jutiqa “llapan munanqanta rurëta puëdeq” ninanmi. Jehoväqa jutimpa reqiyänantam munan (Exodu 3:15). Tsëmi Palabran Bibliaman 7 mil kutipitapis mas qellqatsishqa.a “Patsachö y ciëluchöpis” Teyta Diosnintsikpa jutinqa Jehovämi (Deuteronomiu 4:39).

2 KAQ: Bibliachöqa, ¿imatataq Jehovapaq willakun?

Santukunata Diostanö nunakuna adorayaptimpis, Bibliachöqa nin Jehovälla Diosnintsik kanqantam. Pëllam llapampitapis mas puëdeq, tsëmi Bibliachöqa nin pëqa “Llapanta Gobernaq Poderösu Dios” kanqanta (leyi Salmus 83:18). “Llapanta Gobernaq Poderösu Dios” karmi llapan munanqanta rurëta puëdin. Ciëluchö y Patsachö llapan rikanqantsikkunataqa Jehovämi kamashqa. Tsëmi Bibliachöqa pëpaq nin ‘llapan imëkata kamashqa’ kanqanta (Apocalipsis 4:8, 11). Jehoväqa imëpis kashqam y imëpis këkanqam (Salmus 90:2).

3 KAQ: Diospa jutinqa jukllëllam

Nunakunata doctor, abogädu, profesor o teyta nir reqiyaptimpis jutinkunaqa kanmi, tsënöllam Diospapis jutin kan. VIDEUTA rikäyë y këpaq parlayë:

VIDEU: Tukuynöpa reqiyaptimpis jukllëllam jutinqa (0:41)

• Diosta Señor nirnin o juknöpa qayarpis, ¿imanirtan jutimpa qayëqa mas alli kanman?

Bibliachöqa willakun nunakuna santukunata Diostanö adorayanqantam. Leyiyë Salmus 136:1-3 ima ninqanta y këpaq parlayë:

• “Llapan dioskunapitapis mas poderösu” y ‘Gobernaqkunapa Gobernantin’ nirqa, ¿pipaqtan parlëkan?

4 KAQ: Jehoväqa jutimpa reqinëkitam munan

VIDEU: ¿Diospa jutin kanku? (wakin kaqlla) (3:11)

• ¿Imanirtan Jehoväqa jutimpa reqiyänanta munan?

Jehoväqa jutimpa reqiyänantam munan. Leyiyë Romänus 10:13 ima ninqanta y këkunapaq parlayë:

• ¿Imanirtan Diosta jutimpa qayanantsik?

• ¿Imanötan sientikunki jutikipa qayayäshuptiki?

• ¿Imanöraq Jehovä sientikun jutimpa qayaptiki?

5 KAQ: Jehoväqa reqinëkitam munan

VIDEU: Rasumpa kaq Diostam ashirqä (8:18)

• Soten jutiyoq warmitaqa, ¿imanötan yanaparqan Diospa jutinta yachakunqan?

Pitapis reqita munarqa puntataqa jutintam tapurintsik. Leyiyë Santiägu 4:8a ima ninqanta y këkunapaq parlayë:

• ¿Imata ruranëkitataq Jehoväqa munan?

• Diospa jutinta musyanqëki y jutimpa qayanqëkiqa, ¿yanapashunkimantsuraq pëta mas reqinëkipaq? ¿Imanir?

KËTAM YACHAKURQUNKI

Diospa jutinqa Jehovämi. Pëqa munan amïgun kanëkitam, tsëmi jutinta musyanëki y jutimpa qayanëki.

¿Yarpankiku?

• ¿Imanirtan santukunataqa Diostanö adorashwantsu?

• ¿Imanirtan Diostaqa jutimpa qayanëki?

• ¿Jehoväqa munanku pëta mas reqinëkita? ¿Imanötan tsëta musyanki?

MASTA YACHAKUY

Dios rasumpa kanqanta creinëkipaq yachakuy.

“¿Dios kanqanta creinkiku?” (jw.org päginachö yarqamoq)

Diosqa imëpis kashqam, tsëta yachakuy.

“¿Pitaq Diosta rurarqan?” (Täpakoq, 1 de septiembri 2014)

Manam musyantsiktsu unë witsan hebreu idiömachö Diospa jutinta imanö parlayanqanta. Tsëqa, ¿imanirtan Diosta jutimpa qayashwan? Tsëta yachakuy.

“¿Pitan Jehovä?” (jw.org päginachö yarqamoq)

Diospa jutin ima kanqanta y imanir jutimpa qayanantsikpaq kaqta yachakuy.

“¿Atska jutiyoqku Diosqa?” (jw.org päginachö yarqamoq)