Wanukushqaqa, ¿rasumpatsuraq almantsik mëtapis ëwakun?

Kuyashqa familiëki wanukuptin capazchi kënö pensarqunki: “¿Imëllapis pëwan yapë tinkushaqtsuraq? Wanukushqaqa, ¿rasumpatsuraq almantsik mëtapis ëwakun?” nirnin. Këchö y qateqnin kaqchömi Bibliachö ima ninqanta yachakunki.

1 KAQ: ¿Imatan wanukushqa pasamantsik?

Jesusqa nirqan wanushqakunaqa punuykaq cuenta këkäyanqantam. Musyanqantsiknöpis, pasëpa punukashqa karqa manam läduntsikchö imata rurayaptimpis cuentata qokuntsiktsu. Tsënöllam wanushqakunapis mana nanatsikuyantsu ni sufriyantsu. Tsëmi Bibliachö nin: “Wanushqakunaqa, manam ni imatapis musyayannatsu” (leyi Eclesiastes 9:5).

2 KAQ: ¿Imanötan yanapamantsik wanukushqa ima pasamanqantsikta musyanqantsik?

Mëtsika nunakunam wanuyta y wanushqakunata mantsayan. Qamqa, ¿mantsankiku? Mantsaptikiqa wanushqakunapaq Bibliachö ima ninqanta yachakunqëkim yanapashunki. Jesusmi nirqan: “Rasumpa kaqtam yachakuyanki, y tsë yachakuyanqëkim [...] libri kayänëkipaq yanapayäshunki” (Juan 8:32). Wakin religionkunachöqa yachatsikuyan almantsik aparti kanqantam, peru Bibliachöqa clärum rikätsikun almaqa kikintsik kanqantsikta. Wanukushqaqa manam almantsik yarquntsu ni sufrintsiktsu, manam imatapis musyantsiknatsu ni pitapis mana allita rurantsiktsu. Tsëmi wanushqakunataqa rezapänantsiktsu ni mantsanantsiktsu.

Wakin nunakunaqa wanushqakunawan parlëta puëdiyanqantam niyan, peru tsëqa manam rasumpatsu. “Wanushqakunaqa, manam ni imatapis musyayannatsu”. Wanushqakunawan parlayanqanta pensaqkunataqa demoniukunam engañayan wanushqa familiankuna o amïgunkuna tukurnin. Wanukushqa ima pasamanqantsikta musyanqantsikqa demoniukunapita cuidakunapaqmi yanapamantsik. Tsëmi Jehoväqa demoniukuna mana engañamänata munar wanushqakunawan mana parlanapaq nimantsik (leyi Deuteronomiu 18:10-12).

3 KAQ: Wanukushqa ima pasamanqantsik

Wanukushqa ima pasamanqantsikpaq parlarqa imëkatam niyan. Peru manam llapan niyanqantsu rasumpa.

• ¿Wanukushqa ima pasamanqantsiktataq markëkichöqa niyan?

VIDEU: ¿Nunaqa rasumpatsuraq almayoq? (wakin kaqlla) (1:19)

Leyiyë Eclesiastes 3:20 ima ninqanta y këkunapaq parlayë:

• Wanukushqaqa, ¿ima pasamanqantsiktataq Bibliachö nin?

• Wanukushqaqa, ¿rasumpatsuraq almantsik o espïrituntsik mëtapis ëwakun?

Bibliachömi willakun Jesuspa amïgun Läzaru wanunqanta. Läzaru wanunqampaq parlar, ¿imatataq Jesus nirqan? Leyiyë Juan 11:11-14 ima ninqanta y këkunapaq parlayë:

• Wanushqakuna, ¿imanö këkäyanqantataq Jesus nirqan?

• Wanushqakuna punuykaq cuenta këkäyanqanqa, ¿imatataq yachatsimantsik?

• ¿Creinkiku wanukushqa ima pasamanqantsikpaq Bibliachö willakunqanta?

4 KAQ: Wanukushqa ima pasamanqantsikta musyanqantsikqa yanapamantsikmi

Wanukushqa ima pasamanqantsikta musyanqantsikmi yanapamantsik wanushqakunata mana mantsanapaq. Leyiyë Eclesiastes 9:10 ima ninqanta y këpaq parlayë:

• ¿Imanirtan wanushqakunata mantsashwantsu?

Wanushqakunata ima pasanqanta yachakunqantsikqa yanapamäshun mana mantsanapaq y mana rezatsikunapaqmi. Leyiyë Isaïas 8:19 y Apocalipsis 4:11 y ima ninqanta y këpaq parlayë:

• ¿Imanöraq Jehovä sientikun wanushqakunapaq misata ruratsishqa, rezatsikushqa o yanapamänapaq mañakushqa?

5 KAQ: Wanushqakunata ima pasanqanta musyarqa manam alläpa llakikushuntsu

Mëtsikaq nunakunatam creitsiyashqa mana allikunata rurashqa karqa wanurpis sufriyänampaq kaqta. Peru wanushqakunaqa mëläya jutsata rurashqa karpis manam sufriyannatsu. Leyiyë Romänus 6:7 ima ninqanta y këpaq parlayë:

• Bibliachöqa nin juk nuna wanurqa, wanunqanwan jutsampita pagakunqantam. Tsënö këkaptinqa, ¿pensashwantsuraq wanushqakuna jutsankunapita sufrikäyanqanta?

Teytantsik Jehoväqa alläpa kuyakoqmi, tsëmi alli musyantsik wanushqakunata mana sufritsinqanta. Leyiyë Deuteronomiu 32:4 y 1 Juan 4:8 ima ninqanta y këkunapaq parlayë:

• Diosnintsik alli kaqllata ruraq y kuyakoq këkarqa, ¿wanushqakunata sufritsinmantsuraq?

• Wanushqakunata ima pasanqanta musyanqantsikqa, ¿imanötan yanapamantsik?

KËTAM YACHAKURQUNKI

Nuna wanuptinqa manam alman yarquntsu ni sufrintsu, y manam ni pitapis mana allita rurantsu.

¿Yarpankiku?

• ¿Imatan wanukushqa pasamantsik?

• ¿Imanötan yanapamantsik wanushqakunata ima pasanqanta musyanqantsik?

• Wanushqakunata ima pasanqanta musyanqantsikqa, ¿imanötan yanapamantsik mana alläpa llakikunapaq?

MASTA YACHAKUY

Bibliachö almapaq parlar imapaq parlëkanqanta yachakuy.

“¿Imatan almaqa?” (jw.org päginachö yarqamoq)

¿Rasuntsuraq Diosnintsikqa nunakunata infiernuchö castigan? Tsëta musyanëkipaq rikë.

¿Rasumpatsuraq mana alli nunakuna infiernuchö sufriyan? (3:07)

¿Wanushqakunata mantsashwantsuraq?

Wanushqa nunapa, ¿alman kanku? ¿Puëdiyanku pitapis yanapëta o sufritsita? (Follëtu)

Wanukushqa ima pasamanqantsikta yachakunqan juk nunata imanö yanapanqanta leyï.

“Alläpam gustamarqan Bibliawan cläru y alli respondiyämanqan” (Täpakoq, 1 de mäyu 2015)