¿Imanirtan Jesuspa jutinchö Jehoväman mañakunantsik?

JESUS yachatsikur purinqan witsanqa atska kutim Diosman mañakuypaq parlarqan. Tsë witsanchö dirigeq religiösukunaqa “cällikunapa esquïnankunachö shëkur” mañakuytam gustayaq. ¿Imanirtan tsënöqa rurayaq? Tsënöqa mañakuyaq “wakinkuna rikäyänampaqmi”, Diosta alläpa kuyayanqantanö rikarnin pëkunata alabayänampaq. “Pëkunaqa mëtsika palabrakunata niyaptinraq, Teyta Dios wiyanampaq kaqtam” pensayaq (Mateu 6:5-8). Jesusqa clärum nirqan tsënö mañakuyanqanqa imapaqpis mana välinqanta, tsëpitam alli shonquyoq nunakunaqa yachakuyarqan tsënö mana rurayänampaq. Jesusqa manam tsënö mana mañakuyänanllapaqtsu nirqan, sinöqa mastam yachatsikurqan.

Jesusqa yachatsimarqantsik Teytan Jehoväpa jutin respetashqa kanampaq, Gobiernun shamunampaq y Diospa munënin kë Patsachö rurakänampaq llapan shonquntsikwan mañakunapaqmi. Y yachatsimarqantsikmi imatapis wananqantsikchö Teyta Dios yanapëkamänapaq mañakunantsikpaq (Mateu 6:9-13; Lücas 11:2-4). Y igualatsikuykunawanmi yachatsimarqantsik Teyta Jehovä mañakunqantsikta wiyamänapaqqa kutin kutin mañakunantsikpaq, pëman markäkunantsikpaq y humildi kanantsikpaq (Lücas 11:5-13; 18:1-14). Y kikin Jesusmi Teytanman mañakurnin tsëtaqa cläru rikätsimarqantsik (Mateu 14:23; Marcus 1:35).

Mañakuypaq Jesus tsënö yachatsikunqanqa, mëraq qateqninkunata yanaparqan Jehovä Diosman mas alli mañakuyänampaq. Wanukunampaq ichikllana pishikaptinmi, Jesusqa qateqninkunata yachatsirqan mañakur imanö rurayänampaq kaqta.

“Unë tiempuchö imanöpis mañakuyanqanqa cambiakärirqanmi”

Wanukunan paqasmi Jesusqa apostolninkunata nirqan mana dejëpa mañakuyänampaq. Jesusqa qateqninkunata clärum entienditsirqan imanö mañakuyänampaq kaqta, tsëmi kënö nirqan: “Noqam kä näni, rasumpa kaq y kawë. Mana noqawanqa, manam pï nunapis Teytaman chëta puëdintsu”. Y tsëpitanam pëkunata kënö änirqan: “Jutïchö imatapis mañakuyaptikiqa tsëtam rurashaq, tsënöpa Tsurirëkur Teyta alabashqa kanampaq. Awmi, jutïchö imatapis mañakuyaptikiqa, rurashaqmi”. Y parlapar usharinampaqnam kënö nirqan: “Kananyaqqa manaran jutïchö imatapis mañakuyarqunkiraqtsu. Kushikuyänëkipaq mañakuyë, y chaskiyankim” (Juan 14:6, 13, 14; 16:24).

¡Tsënö ninqanqa alläpa shumaqmi karqan! Bibliapita yachatsikoq juk diccionarium kënö nin: “Unë tiempuchö imanöpis mañakuyanqanqa cambiakärirqanmi”. Jesusqa manam tsë tiempupita patsë pëllamanna mañakuyänampaqtsu nikarqan. Tsëpa rantinqa, mañakunqantsikta Diosnintsik Jehovä wiyamänapaq pë imëka näni cuenta yanapamänapaq kaqtam nirqan.

Awmi, Diosnintsikqa sirweqninkunapa mañakuyninkunataqa imëpis wiyëkashqallam (1 Samuel 1:9-19; Salmus 65:2). Tsënö kaptimpis, Israel nacionwan Dios acuerduta ruranqampitaqa, pï nunapis Diosman mañakurqa Israel nacionta Dios akrashqa kanqantam cuentachö katsinan karqan, tsëran mañakunqanta Dios wiyaq. Y Salomon kawanqan tiempupita patsëqa, Salomon ruranqan templutanam Dios akrarqan ima qarëtapis Pëpaq tsëchö rupatsiyänampaq (Deuteronomiu 9:29; 2 Crönicas 6:32, 33). Diosta tsënö adorayanqanqa cambiananmi karqan. Tsëmi apostol Pablupis nirqan Israelchö Leykunata chaskiyanqan y templuchö Diospaq qarëkunata rupatsiyanqanqa, ‘shamoq tiempuchö imëka allikunapa wäninlla o llantunlla’ kanqanta y mana “kikin rasumpa kaqkunatsu” kanqanta (Hebrëus 10:1, 2). Tsë wäni o llantu pasariptinqa rasumpa kaqmi rikakurinan karqan (Colosensis 2:17). Tsëmi Jesus shamunqanchöna 33 watapita witsëpaqa, Jesus llapan nimanqantsikta cäsukurna Jehoväwan amïgu këta puëdintsik, y manam Moises qellqanqan Leyta cäsukurnatsu. Moises qellqanqan Leyqa Cristuman pushamaqnintsikllam karqan (Juan 15:14-16; Gälatas 3:24, 25).

‘Wakin nunakuna chaskiyanqan cargupita mas väleq carguman churashqa’

Jehoväwan imanö amïgu kanapaq kaqtam Jesusqa patsätsirqan. Pëqa juk alläpa puëdeq amïgutawanmi kikinta igualatsikurqan, nänita kichaq cuentam mañakunqantsikta Dios wiyanampaq y contestamunampaqqa pëlla yanapamënintsikta puëdin. ¿Imanirtan Jesusqa nänita kichaq amïguntsiknö?

Jutsayoqllanam yurikuntsik tsëmi ni imata ruranqantsik ni mëtsika qarëkunata Diospaq ruranqantsikpis jutsantsikpitaqa limpiamënintsikta puëdintsu. Tsëmi Diosnintsik alläpa limpiu kaptin, pëwanqa amïgu këtaqa puëdintsiktsu (Romänus 3:20, 24; Hebrëus 1:3, 4). Tsënö këkashqam, Jesusqa wanurqan llapan nunakunata jutsankunapita libranampaq (Romänus 5:12, 18, 19). Jesus tsëta ruranqampitam pïmë nunakuna Jehovä Diospa rikëninchö limpiu këta y “mana mantsakushpa Teyta Diosman mañakuyta” puëdiyan. Peru tsëtaqa rurëta puëdiyan Jesusman markäkur o yärakurnin y pëpa jutinchö mañakurninllam (Efesius 3:11, 12).

Jesuspa jutinchö mañakurqa, Diosnintsik kë kiman cösaskunachö Jesusta churanqanmanmi markäkuntsik o yärakuntsik: 1) Jesusmi “Teyta Dios mandamunqan Orqu Üsha”, pë wanunqanwanmi jutsantsikpita perdonashqa kantsik. 2) Jehovä kawaritsimunqampitaqa “mas puëdeq mandakoq sacerdötintsik” karmi jutsantsikpita perdonashqa kanapaq yanapamantsik. 3)  Mañakunqantsik Jehoväman chänampaqqa pëllam “näni” cuenta yanapamantsik (Juan 1:29; 14:6; Hebrëus 4:14, 15).

Jesuspa jutinchö mañakurqa pëta respetanqantsiktam rikätsikuykantsik. Jehovä Diosqa munan ‘Jesuspa jutinchö llapankuna qonqurikuyänanta’ y ‘Teyta Dios alabashqa kanampaq Jesucristu Señor kanqanta llapankuna musyayänantam’ (Filipensis 2:10, 11). Awmi, Jesuspa jutinchö mañakurqa Jehovätam alabëkantsik, pëmi jutsantsikpita perdonashqa kanapaq Tsurin wanunanta permitirqan (Juan 3:16).

Jesus alläpa precisaq carguyoq kanqanta cuentata qokunapaqmi, Bibliachöqa atska jutikunapa Jesusta qayan. Tsëkunawanmi cuentata qokuntsik unë tiempuchö ruranqan, kanan tiempu rurëkanqan y shamoq tiempuchö Jesus ruranampaq kaqqa noqantsikpaq juk bendicion kanqanta. (Rikäri 14 kaq päginachö “Jesuspa alläpa väleq cargunkuna” ). Awmi, Jesusqa chaskishqa ‘wakin nunakuna chaskiyanqan cargupita mas väleq cargutam’, ciëluchö y Patsachö mandakoq kanampaqmi (Filipensis 2:9; Mateu 28:18).

Manam juk costumbrillatsu kanman

Këchö yachakurinqantsiknöpis, Jehovä Dios wiyamänapaqqa Jesuspa jutinchömi mañakunantsik (Juan 14:13, 14). “Jesuspa jutinchö” nir mañakunqantsikqa manam lluta mañakuyllatsu kanman, ni manam janan shonqullatsu kanman. ¿Imanirtan tsëtaqa nintsik?

Këman pensarishun. Juk autoridäpa cartanta chaskirinkiman, y tsë cartapa ushananchöqa ninman “kuyashqa wawqilläkuna panilläkuna”. Peru ¿rasumpa kuyashurnikitsuraq tsënöqa nikan, o costumbri kaptinllatsuraq? Jesuspa jutinchö mañakurqa manam juk costumbritanöllatsu ninantsik, sinöqa rasumpa kuyarnin y respetarninmi jutinchö mañakunantsik. Awmi ‘imëpis mañakuykänantsikmi’, peru llapan shonquntsikwanmi mañakushwan y manam janan shonqullatsu (1 Tesalonicensis 5:17; Salmus 119:145).

Jesuspa jutinchö mañakurqa llapan shonquntsikwanmi mañakushwan y manam parlananllaqa parlashwantsu. Jesus kuyanëllapaq, yachanëllapaq kanqanmanmi alli pensanantsik. Pensashun noqantsikpaq Jesus imata ruramushqana kanqanman y imakunata ruramuyta munëkanqanman. Mañakurninqa Jehovä Diosta alabashun y noqantsikrëkur Tsurinta mandamunqampita agradecikushun. Tsënö rurarllam Jesus kënö ninqanman mas markäkushun o yärakushun: “Jutïchö Teytata imatapis mañakurqa chaskiyankim” (Juan 16:23).