Diosman witi
Jehoväqa kikinmi musyatsikun imanö kanqantapis
¿QAMPAQ imanötaq Jehová Dios? ¿Kikinta tapurishqaqa ima alliraq këkunman aw? Profeta Moisesqa tsëtam rurarqan. Y Diosnintsik qellqatsishqa kaptinmi, kanan musyantsik Jehová imata willanqantapis.
Sinaí hirkachö këkarmi, “rikëkatsillämë imanö kanqëkita” nir Moises Diosta rogarqan (Éxodo 33:18). Waränin hunaqmi, Jehová huk rätulla rikäratserqan imanö kanqantapis.a Llapan rikanqanta mana willakurpis, Moisesqa qellqarqan kikin Dios imanö kanqantapis willanqantam. Éxodo 34:6, 7 textochömi willanqankunaqa këkan.
“Alläpa ankupäkoq [llakipäkoq], y alläpa alli” kanqantam puntataqa Dios willarqan (versículo 6). Tsë palabrakunata reqeq nunam nin, hebreo idiömachö “ankupäkoq” nerqa rikätsikun “huk teyta wambranta ankupaqnö” Diospis nunakunata ankupanqanta. Tsënöllam “alläpa alli” neq palabrakunapis kikin hebreo idiömachöqa, “yanapëpaq këkaqkunata rasumpa yanapëta munëpaq” parlan. Tsënömi Jehoväqa musyatsimantsik huk teyta wambrampaq yarpachakoqnö, pëpis sirveqninkunata alläpa kuyanqanta y alli kayänantapis munanqanta (Salmo 103:8, 13).
Tsëpitanam “mana ras piñakoq” kanqanta willarqan (versículo 6). Jehoväqa manam raslla piñakoq Diostsu. Antis sirveqninkuna llutanta rurayaptimpis pacienciawanmi shuyaran y wanakuyänampaqmi tiempota qon (2 Pedru 3:9).
Hina, “alläpa kuyakoq y paqwë rasun kaq” kanqantapis willarqanmi (versículo 6). Alläpa kuyakoq kar o rasumpa kuyakoq karmi, sirveqninkunata imëpis kuyan y sirveqninkunapis pëta alläpa kuyayan (Deuteronomio 7:9). Hinamampis rasumpa kaqqa Jehoväpitam shamun. Pëqa manam ni pita engañantsu ni pëta pï engañantsu. “Rasun kaqta ruraq Dios” këkaptenqa, pë nenqankunaman paqwëmi yärakushwan o markäkushwan, hina shamoq tiempokunapaq awnikonqanmampis (Salmo 31:5).
Hina “llutan rurëta, mana alli rurëta y hutsata perdonaq” Dios kanqanta musyanatapis munanmi Jehoväqa (versículo 7). Pëqa hutsankunapita wanakoqta ‘perdonanampaqpis listom këkan’ (Salmo 86:5). Tsënö kaptimpis, mana alli imëyaqpis kanantaqa manam rikaranqatsu, antis “mana castïgowanqa manam haqirenqatsu” ninmi (versículo 7). Pëqa alli kaqllata ruraq y santo Diosmi, y hutsankunapita mana wanakoq nunakunataqa manam rikaranqatsu. Rurayanqankunapitaqa imë karpis Diostam cuentata qoyanqa.
Jehoväqa reqinata munarmi imanö kanqanta y imata ruranampaq kaqtapis willakun. Y kë llapankunata musyëkarnaqa, ¿manatsuraq pëpita más yachakïta munashwan?
[Päginapa ura kuchunchö willakï]
a Pï nunapis Diosta rikarqa ushakärinmanmi, y Moisespis kikin Jehovätaqa manam rikarqantsu (Éxodo 33:20). Moisesqa suëñïninchönöllam rikarqan, y angelnintawanmi parlapätserqampis.