¿Imëyaqraq këkuna kanqa?
Hinantin cuerponta canser ushaptinmi imëpitapis más alläpa nanatsikorqan. “¡Mananam masqa aguantëta puedënatsu! ¡Imëkanöpapis kë nanëta pärëkatsilläyämï!”, nirmi Jayne alläpa waqar qayarillarqan. Tsëmi kastankunawan amïgonkuna imanö këta mana puëdernin Diosman mañakuyarqan yanapëkunampaq. ¿Wiyarqantsuraq Dios mañakïninkunata?
NUNAKUNA alläpa hipëkäyanqanta o ñakaykäyangantaga Dios rikëkämunmi. Tsëmi Palabran Biblia kënö nin: ‘Dios llapan camashqancunam imeca juc qeshyaq warmi qeshpicur nanatsiconqanno jipaquicayan’ (Romanos 8:22). Pëqa musyanmi Jaynenö kaqpis atska millón nunakuna qeshyar o imëkata pasarpis hipëkäyanqanta. Hina pëqa rikëkanmi 800 millones nunakuna waran waran mallaq punuriyanqanta, mëtsika warmikunata y wambrakunata wayinkunachö hipatsiyanqanta, y warë warätin wambrankuna imanö kayänanta teytakuna yarparar llakikuyanqantapis. Pero, ¿tsë llapanta altsamunampaq Dios imallatapis ruramunqatsuraq? Llapantsikmi imanöllapapis kastantsikkunata yanapëta munantsik, ¿tsëqa manatsuraq Diosnintsikpis tsënö yanaparamänata shuyarashwan?
Manam nonqantsikllatsu tsënö tapukuntsik. 2.600 watakuna masnam pasarishqa tukï pasakoqta rikar, profeta Habacuc Diosta kënö ninqan: “¿Imëyaqraq yanapamänëkipaq qayakallämushaq Teyta Dios, y qamqa manataq wiyëkallämankitsu? ¿Imëyaqraq qayakallämushaq maqanakïkuna kaptin salvëkayämänëkipaq? ¿Imanirtaq hipakïkunata rikäman? ¿Imanirtaq kë mana allikunata rikätsimanki? Hinantinchömi pleitokunata, maqanakïkunata, wanutsinakïkunata y ushakätsinakïkunata rikä”. (Habacuc 1:2, 3). Kanan witsampis tsënöllam tukï mana alli rurëkunata y hipakïkunata më tsëchöpis rikantsik.
¿Diosqa Habacuc mañakonqanta mana kaqpaqtsuraq churarqan? Manam. Antis llapan hipakïkuna paqwë ushakänampaq kaqta rikätsirmi, shumaq parlaparqan kushikurinampaq. Kanan witsampis tsënöllam shamoq tiempochö hipakïkunata, y llakikïkunata Dios ushakäratsimunanta musyar alläpa kushikuntsik. Tsënömi kayarqan Jaynewan familian, y qampis tsëkunata musyarir kushikurinkim. Tsëmi kë revistapa qateqnin kaq yachatsikïkunata leirinëkipaq niriyaq, tsëchömi kë tapukïkunapa respuestanta tarinki: ¿Imanötaq musyantsik Diosnintsik kuyamanqantsikta? ¿Imë y imanöraq hipakïkunata ushakäratsimonqa?