Paqwëmi ushakäratsimunqa llapan nunakunapa hipakïninkunata

ME TSËCHÖMI ollqukuna, warmikuna imëkata rurayan tukïpa pasar hipëkaqkunata o ñakaykaqkunata yanapayänampaq. Doctorkuna, ambulaciawan trabajaqkuna, bomberokuna, policiakuna, y wakin yanapakoqkunam hipëkaqkunata tsaparnin, salvarnin, y hampirnin atska hora trabajayan. Tsënö yanapakuyanqanqa alläpa allim. Tsënö karpis, nunakuna alläpa hipayanqantaqa manam ni pï nuna, ni ima apoyo rurayanqampis ushakätsinqatsu. Pero Diosqa paqwëmi ushakäratsimunqa, y tsëtaqa awnikushqanam.

Bibliapa ushanan kaq librochö rikäri nunakunapaq Dios ruramunampaq kaqta, kënömi nin: “Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam” (Apocalipsis 21:4). ¿Cuentata qokunkiku tsë kawë imanö kanantapis? Llapan hipakïkunata paqwë ushakätsimunampaqmi Diosqa awnikushqa. Tsëpaqqa guërrakunata, mallaqëkunata, qeshyakunata, mana alli rurëkunata, y mana alli nunakunatam ushakätsimonqa. ¿Piraq këtanöqa rurëkamunman?

Diospa Gobiernonllam tsë llapanta altsamunqa

Diosqa llapan awnikonqankunatam Jesucristuwan cumpliramunqa y pëmi Jehoväpa qateqninman más poderösoqa. Ichikllanam pishin ciëlopita Diospa tsurin hinantin Patsata Gobernamunampaq. Tsëqa manam presidentekunapa, ni ministrokunapa, ni wakin polïticokunapa mandakïninchö pipis kanqanatsu. Jesusllam gobernamaqnintsik kanqa, huk gobiernolla, y tsëqa Diospa Gobiernonmi.

Diospa Gobiernon Patsachö gobiernokunata ushakäratsimunampaqqa, unëpitanam Biblia kënö willakushqa: “Ciëlochö Dios[mi], mana ushakaq reinota churamonqa. Kë reinopa rantinqa mananam hukqa yëkonqanatsu. Y chipyëpam ushakätsenqa patsachö gobiernokunata, y kikinmi imëyaqpis mana ushakashpa kanqa” (Daniel 2:44). Tsënöpam hinantin Patsachö llapan markakuna Kamakoq Diosnintsikpa alli gobiernonchö shumaq kawakuyanqa.

Kikin Jesusmi tsë Gobiernopaqqa kë Patsachö këkar atska kuti parlarqan. Mañakuyänampaq qateqninkunata yachatsirmi kënö nirqan: “Reynïki shamutsun. Muneyniki rurakätsun syeluchownow, tseynowlla patsachowpis” (Mateo 6:10, QKW). Jesucristu, Diospa Gobiernompaq parlarqa, Patsachö Diospa munënin cumplikänampaqwanmi parlëkarqan. Y tsë munëninqa cumplikäramunqa hipakïkunata paqwë ushakäratsimuptinmi.

Mana ni pï nunapa gobiernon altsamunqantam Diospa Gobiernonqa altsaramunqa. Jehoväqa noqantsikpaqrëkur Tsurin wanunanta haqirmi rikätsikorqan, nunakuna imëyaqpis shumaq Patsachö kawakuyänampaq kaqta. Diosqa kuyamarnintsikmi ‘wanïta limpu ushakäratsenqa, y weqinkunatam nawinkunapita pitsaraponqa’ (Isaías 25:8).

Tsëqa itsa kënö tapukunki: “¿imanirtaq tsënöqa ruramushqanatsu? ¿Imanirtaq kananyaq rikaräkun?” Jehoväqa unë tiempollachönam këkunata altsarämunman karqan. Pero noqantsikpa biennintsikpaqmi ichik tiempolla hipakïkuna kananta haqirishqa. Imanömi alli teytakuna tsurin imëkawampis hiparir, tsëpita alliyärinanta musyar haqiriyan, tsënöllam Diospis rurëkan. Y Bibliapis willakunmi teytantsik Jehová imanir hipanantsikta permitenqanta. Y këwanmi rikätsikun noqantsik Diosta servinapaq o mana servinapaqpis libre kanqantsikta, hutsasapa kanqantsikta y Jehovälla llapanta gobernaq kanqanta. Hina kë mundota ichik tiempolla Satanás gobernanampaq Diosnintsik haqirinqantam Bibliaqa willamantsik.a

Mana allikuna pasanqantaqa manam llapantatsu kë tëmakunachö yachakushun, pero ishkë yachatsikïkunam kan yarpachakunapaq, tsëqa kushiratsimäshunmi, y Diosnintsik paqwë hipakïkunata altsaramunantam musyaratsimäshun. Puntataqa, tukïta pasar hipanqantsikmannömi Jehoväqa bendecimäshun. Y pëqa kënömi nin: “Punta kaqkunaqa qonqashqanam kanqa, y manam pipis shonqunkunachö yarpäyanqanatsu” (Isaías 65:17). Kanan witsan tukï mana allikunapa pasar hipëkarnimpis, paqwë ushakäratsimunampaq kaqta musyarintsikmi.

Hina tsëpitanam, Diosnintsik musyan imë hora o imë hunaq kë llapan hipakïkunata ushakäratsimunampaq kaqta. ¿Yarpankiku profeta Habacuc mana allikuna kaptin y maqanakïkuna kaptin imëyaqtaq këkuna kanqa nir Jehoväta taponqanta? Kënömi Jehová contestarqan: “Kë revelación, shamoq tiempopaqra[n] [...]. Manam tardetsu chämonqa” (Habacuc 2:3). ¿Imëraq chämunqa tsë ‘shamoq tiempo’? Qateqninchömi kë tapukïpa respuestanta yachakurishun.

[Päginapa ura kuchunchö willakï]

[7 kaq päginachö recuadru]

Shumaq kawakïtam Bibliaqa awnikun

GUËRRAKUNA MANANAM KANQANATSU

“Shamur rikäyë Jehová rurashqankunata, Patsachö mantsakëpaq imëkatam rurashqa. Pëqa paqwëmi patsapita ushakätsimonqa guërrakunata.” (Salmo 46:8, 9.)

WANUSHQAKUNAM KAWARIYÄMONQA

‘Alli ruraqtapis y mana alli ruraqtapis Teyta Dios cawaritsimonqam’ (Hechos 24:15).

LLAPAN NUNAKUNAPAQMI MIKÏ KANQA

“Patsachöqa alläpa atska granom kanqa, hirkakunapa puntanchöpis sobrakonqam.” (Salmo 72:16.)

QESHYAKUNAM USHAKÄRENQA

“Manam ni pï: ‘Qeshyämi ninqanatsu’.” (Isaías 33:24.)

MANANAM KANQANATSU MANA ALLI NUNAKUNA

“Mana alli nunakunaqa, wallushqam kayanqa kikin patsapita; traicionerokunanam llupishqa kayanqa tsëpita.” (Proverbios 2:22.)

ALLI GOBIERNOM KANQA

“Justicia kanampaqmi huk rey [Jesucristu] gobernanqa, y mandakoqkunapis alli kaqta rurarmi gobernayanqa.” (Isaías 32:1.)

[7 kaq päginachö dibüjukuna]

Patsata Dios gobernamuptinqa, llapan hipakïkunata manam ni pï yarpanqanatsu