Jesucristu yachatsikunqan, ¿yanapashunkimantsuraq?

“Noqaqa shamushqä nunacunata wiñepa cawatseqmi. Tsemi imepis Diosta cäsucur, cushi cushina cawayanqa.” (JUAN 10:10.)

JESUCRISTUQA Patsaman shamurqan nunakunata sirveqmi y manam nunakuna pëta serviyänampaqtsu. Tsëmi Diospita y Munanqan rurakänampaq kaqta yachatsikunqanqa nunakunapaq alläpa shumaq qarë karqan. Pëpa yachatsikïninwanmi mëtsika millón cristiänokuna shumaq kawakuyan.a Hinamampis yachatsikunqanmi rikätsikun huk alläpa hatun qarëninta: noqantsikrëkur hutsannaq kawëninta qonqanta. Tsëmi imëyaqpis kushishqa kawakunapaqqa alläpa precisan yachatsikunqanta wiyakunantsik.

Diospa y Cristupa qarënin. Jesusqa musyarqanmi chikeqninkuna wanunqanyaq hipatsiyänampaq o ñakatsiyänampä kaqta (Mateo 20:17-19). Tsëta musyëkarpis shamurqanmi Patsaman. Juan 3:16 textochö ninqannöpis, “patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq”. Kikin Jesusmi más qepata nirqan ‘yawarninwan nunacunata rescatananpaq’ shamunqanta (Mateo 20:28). Pero ¿imanirtaq “nunakunata rescatananpaqmi” shamurqan nin y nunakuna wanutsiyänampaqmi nintsu?

Alläpa kuyarninmi Diosqa nunakunata hutsapita y wanïpita salvëta munarqan. Tsënöpam Tsurin Jesusta Patsaman kachamurqan llapantsikpaq kawëninta qonampaq. Y Jesuspis munarqanmi noqantsikrëkur wanïta. Tsë hatun qarëta Diosnintsik qomanqantsiktanöqa manam ni pipis qomashqantsiktsu, tsë qaramanqantsikpitam imëyaqpis kawakïta puëdentsik.b

Imataraq rurankiman yanapashunëkipaq. ¿Yanapashunëkipaq Diospa qarëninta chaskikunkitsuraq? Këman pensari, pipis huk shumaq forashqa cäjachö imatapis qarashuptiki, ¿imataraq rurankiman? Kushishqachi chaskikurinkiman. Tsënöllam kawënintsik qaramaqnintsik cuenta Diosnintsikpis noqantsikrëkur wambran wanunanta haqirqan. Tsë qarë yanapananta munaq kaqqa chaskikïta munanqantam rikätsikunan. ¿Imanöraq tsëta rikätsikunman?

Yachakunqantsiknöpis, imëyaqpis kawakïtaqa tariyanqa Jesusman markäkoq o yärakogkunallam. Y markäkunqantsiktaqa rikätsikuntsik, alli kaqllata rurarmi (Santiagu 2:26). Tsëmi Jesusman markäkoqkunaqa pë yachatsikunqannö y kawanqannö kawayan. Y tsënö kawanapaqqa alliram reqinantsik pëta y Teytanta. Tsëmi Jesus kënö nirqan: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3).

Ishkë waranqa watanam pasasqa Jesus Patsachö yachatsikunqampita, y tsë yachatsikunqanmi yanapakushqa waranqëpayan nunakuna hukläyana kawakuyänampaq. ¿Munankimantsuraq tsë yachatsikunqampita más yachakïta? ¿Musyëta munankimantsuraq tsë yachatsikunqan kanan y shamoq tiempochö, familiëkitawan qamta imanö yanapayäshunëkipaq kaqta? Tsëqa Jehoväpa testïgonkunata ashi, pëkunaqa kushishqam tsëkunata yachatsiyäshunki.

[Päginapa ura kuchunchö willakïkuna]