¿Mana alli rurëkunata chikintsikku?
“Chikirqonki[m] mana allita.” (HEB. 1:9, QKW.)
1. ¿Imanö kuyanakuyänampaqtaq Jesus qateqninkunata mandarqan?
JESUSMI qateqninkunata imanö kayänampaq kaqtapis willarqan kënö nishpa: “Cananmi si juc mushoq mandamientuta qoyaq: Llapequicuna jucniqui jucniqui cuyanacuyanqui. Qamcunata noqa imanomi cuyayarqoq, tsenolla jucniqui jucniqui cuyanacuyanqui. Sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” (Juan 13:34, 35). Kënö parlanqanwanmi kikinkunapura rasumpa kuyanakuyänampaq mandëkarqan, tsënöpa qateqninkuna kayanqanta rikätsikuyänampaq. Huk kutichöpis këta rurayänampaqmi mañarqan: “Chiquiyäshoqniquicunata cuyayanqui, y mana allita rurayashoqniquicunapaq Teyta Diosta mañacuyanqui” (Mat. 5:44).
2. ¿Imataraq cristiänokuna chikinantsik?
2 Pero Jesusqa manam qateqninkunata këta wakta kuyayanki nirqanllatsu, sinöqa mana alli rurëta chikiyänampaqpis yachatsirqanmi. Huk profecïam Cristupaq kënö willakurqan: “Kuyarqonkim justisyata, i chikirqonki[m] mana allita”, o “mana alli kaq rurëkunata” (Heb. 1:9, QKW; Sal. 45:7). Jesus ruranqanqa, manam alli rurëta kuyanallapaqtsu yachatsimarquntsik, sinöqa hutsata chikinapaq o Jehová llapan chikinqanta chikinapaqwanmi. Hina apóstol Juanpis kënömi nirqan: “Llapanpis jutsa ruraqcunaqa Dios mandacushqanta manam cäsucuyantsu. Y jutsa rureqa Dios mandacushqancunata mana cäsuquimi” (1 Juan 3:4).
3. ¿Ima chusku rurëkunata chikinapaqtaq yachakushun?
3 Llapantsikmi kënö tapukunantsik: “Diospa Leynin huk rurëpaq mana alli kanqanta willakuptinqa, ¿tsë rurëta chikïku?”. Kananmi yachakurishun chusku rurëkunata imanö chikinapaq kaqtapis: 1) Washku alläpa upïta, 2) brujerïata, 3) warmiwan ollquwan melanëpaq rakcha rurëkunata y 4) hutsa rurëta kuyaqkunawan parlëtapis.
Ama alläpaqa washkuta upyashuntsu
4. ¿Imanirtaq mana machakuyänampaq Jesusqa consejakurqan?
4 Atska kutichömi Jesusqa vïnota upyarqan Diospa qarënin kanqanta musyarnin (Sal. 104:14, 15). Tsënö kaptimpis manam machakurtsu kakurqan (Pro. 23:29-33). Tsëmi mana penqakushpa alläpa washkuta upyë mana alli kanqanta parlarqan (lei Lucas 21:34). Washkuta alläpa upyëqa huk hutsa rurëkunamampis ishkitsimashwanmi. Tsëmi Pablu kënö qellqarqan: “Ama machaquicayëtsu; tseno carqa mana allitam rurecuyanqui. Antis Santu Espiritu munashqanno cushi cushi cawacuyë” (Efe. 5:18). Hina mayor cristiänakunatapis “mana machacoq cayänanpaq[mi]” consejarqan (Titu 2:3).
5. ¿Imataraq tapukunman huk cristiano washkuta upyë gustaptinqa?
5 Washkuta upyanapaq concienciantsik haqimashqaqa, këtam tapukunantsik: “¿Alläpa washkuta upyë mana alli kanqanta Jesusnöku pensä? Washkuta upyëpaq huk cristiänota consejëta munarqa, ¿mana penqakushpatsuraq consejashaq? ¿Llakikïkunata qonqanäpaqku o kushikunäpaqku upyä? ¿Ëka kutitaq semänachö washkuta upyä? Alläpa upyëkanqäta pipis nimaptinqa, ¿imanötaq tikrarï? ¿Piñaköku o tsapäkurninku qallëkö?”. Washkuta alläpa upyëman ishkishqaqa, manam allinatsu pensashun, ni alli rurëta yarpäshunnatsu. Tsënö pasanantaqa manam haqinantsiktsu, cristiano karmi imëpis pensënintsiktaqa shumaq tsapänantsik (Pro. 3:21, 22).
Brujerïaman ama ishkishuntsu
6, 7. a) ¿Imataraq Jesus nirqan Satanaspaq y brujerïapaq? b) ¿Imanirtaq hinantin Patsachö brujerïakuna kan?
6 Jesus Patsachö kawarpis Satanaspa y supëkunapa contranmi churakarqan. Hina Diablu hutsaman imëkanöpa ishkitsita tïraptimpis, manam pëpa munëninkunaman ishkirqantsu (Luc. 4:1-13). Hina mana mäkatsishllapa pensëninchö y portakïninchö ishkitsita munaptimpis, allim tsarakurqan (Mat. 16:21-23). Hinamampis, atskaq hipëkaq nunakunapitam supëkunata qarqurqan (Mar. 5:2, 8, 12-15; 9:20, 25-27).
7 Jesus 1914 watachö corönata chaskirirmi, ciëlopita Satanastawan supëkunata qarqurirqan. Tsërëkurmi Diabluqa mana imëpis ruranqannö hinantin ‘marcacho nunacunata engañaquican’ (Apo. 12:9, 10). Rasuntachi atskaq nunakuna brujerïakunaman yarpachakuyan. Këqa muyakoq qeshyanömi hinantin Patsachö këkan, tsëmi tsapäkushwan. Pero ¿imanöraq tsapäkushwan?
8. ¿Imakunataraq tapukushwan kushikunapaq ruranqantsikkunapita?
8 Bibliachöqa alleqmi rikätsimantsik tukïläya brujerïakunaman mana ishkinapaq (lei Deuteronomio 18:10-12a). Satanasqa tukïnöpam kanan witsan nunakunapa pensëninkunata mana alliman ishkitsita munan brujerïapaq parlaq pelïculakunawan, librokunawan y videöjuëgokunawampis. Tsëmi imata ruranapaqpis puntataraq akranantsik. Tapukurishun: “¿Kë qepa killakunachö magiapaq y brujerïapaq parlaq pelïculakunata, pukllakunata, librokunata, revistakunata o imëkakunatapis rikarqöku o leirqöku? ¿Brujerïakunapita witikunä alläpa preciso kanqanta musyäku, o mana kaqpaqku churarï? ¿Kushikunäpaq ruranqäta Jehová allitanö o mana allitanö rikanqanta pensarqöku? ¿Ichikllapaqku churëkä Satanaspa kënö rurëninkunata? Tsënö kashqa kaptinqa, ¿kanampita witsëpa churapakarqöku tsëkunata mana ruranäpaq, tsënöpa Jehoväta y Leyninkunata kuyanqäta rikätsikunäpaq?” (Hech. 19:19, 20).
Mana alli rurëkunapaq Jesus parlanqanta wiyakushun
9. ¿Imanötaq shonquntsikllachö mana alli rurëkunata kuyar qallëkushwan?
9 Jesusqa warmipaq ollqupaq Dios mandakunqantam kënö nir yachatsikurqan: “¿Manacu Diospa palabranta leyiyashqa cayanqui ‘que patsata camarnin, warmita ollquta camanqanta’? Jina nerqanmi: ‘Tsemi, ollqu jaqirenqa mamanta yayanta warmiwan juntacäyänanpaq. Y ishcancunapis jucnollanam cayanqa’ [...]. Tsemi ishcaqnatsu cayan, sinoqa jucllellanam. Tseno captinmi, Dios juntashqantaqa mana pipis raquinmantsu” (Mat. 19:4-6). Hina Cristuqa musyarqanmi nawintsikpa yëkoq shonquntsikyaq chanqanta. Tsëmi Hirkapita Yachatsikurnin kënö nirqan: “Qamcuna, musyayanquim une awiliquicuna queno yachatsicuyanqanta, ‘Majayoq quecar ama jucwan jucwan pununacuyanquitsu’ nishpa. Peru noqanam niyaq: Pipis juc warmita riquecur munapäreq caqqa, jucwan pun[unacureqnonam] carishqa” (Mat. 5:27, 28). Këchö Jesus ninqanta mana wiyakoq kaqqa, shonqunchömi mana alli rurëta kuyar qallëkan.
10. Warmipis ollqupis qalapächu mana alli rurëkaqkunata rikëta haqirï alläpa sasa mana kanqanta willakaramï.
10 Rakcha rurëkuna más miranampaqmi Satanasqa warmipis ollqupis qalapächu mana alli rurëkaqkunata imëkachöpis yarqatsimun. Këkunata rikëkushqaqa, peqantsikpita horqë alläpa sasam, hina mastapis rikarë munëmanmi heqarkushwan. Tsënömi huk cristiänota pasarqan, pëmi kënö willakun: “Pakëllapam warmipis ollqupis qalapächu mana alli rurëkaqkunata rikaräkoq kä. Jehoväta servirpis, kikïpa pensënïchömi mana alli rurëkunaman pensakoq kä. Rurëkanqä mana alli kanqantaqa musyaqmi kä, pero adoracionnïta Dios chaskinqantam pensaq kä”. ¿Imataq tsënö pensëninta haqinampaq yanaparqan? Pëmi willakun: “Ima ruranqäpitapis anciänokunawan parlë alläpa sasa kaptimpis, pëkunawanmi parlarqä”. Tiempowanqa tsë rakcha rurëkunata haqirirqanmi. Hina ninmi: “Tsë hutsa rurëkanqäta haqiriptïraqmi, concienciä rasumpa limpio kanqanta mäkurirqä”. Këchömi rikantsik mana alli rurëkunata chikïqa, warmipis ollqupis qalapächu mana alli rurëkaqkunata mana rikëmi.
11, 12. ¿Imanötaq mana alli rurëta chikinqantsikta rikätsikushwan müsicata wiyanqantsikchö?
11 Música wiyanqantsik y cantayanqanqa, pensënintsikman y shonquntsikmampis charkunmi. Rasumpa kaqchöqa, müsicaqa Diospa qarëninmi, y unëpitam Diosta adorayaq müsicawan (Éxo. 15:20, 21; Efe. 5:19). Pero kë mundochö llapan cancionkunanömi warmiwan ollquwan rakcha rurëkunallapaq parlayan (1 Juan 5:19). ¿Imanötaq musyashwan wiyëkanqantsikkuna peqantsikta mana rakchatëkanqanta?
12 Itsa kënö tapukurishwan: “¿Imapaqtaq parlan wiyanqä cancionkunapa letran? ¿Wanutsikïpaqku, majanwannö hukwan punukïpaqku, manaraq casakushqa këkar punukïpaqku y rakchakunapaqku parlan? Tsë cancionkunapa letrankunata hukpaq leirapuptïqa, ¿mana alli rurëkunata chikinqätatsuraq o rakcha shonquyoq kanqätatsuraq pensanman?”. Mana alli letrayoq cancionkunata wiyakurqa, manam hutsatam chikï nishwantsu. Ama imëpis Jesus kënö ninqanta qonqashuntsu: “Nunacunataqa shonqunpita mana allicunata parlanqanmi melanepaqta ticratsin. Tsemi mana allicunata shonquncunacho yarpar quecunata rurayan: nunacuna wanutsinacuyan, majayoq quecarmi jucwan jucwan yachacuyan, mana majäcushpam jucwan jucwan puricuyan, suwacuyan, ulicuyan y ashanacuyan” (Mat. 15:18, 19; igualaratsi Santiagu 3:10, 11).
Mana alli ruraqkunata Jesusnö rikäshun
13. ¿Imanötaq Jesus rikarqan hutsa rurëta mana haqi munaqkunata?
13 Jesusqa kë Patsaman shamurqan mana alli nunakunata Diospita yachatseqmi, tsënöpa hutsankunata haqiyänampaq (Luc. 5:30-32). Pero ¿imanötaq Jesus rikarqan hutsa rurëta mana haqita munaqkunata? Wiyaqninkunatam nirqan tsënö nunakuna mana alli yanasakuna kayanqanta (Mat. 23:15, 23-26). Hina nirqanmi: “Manam llapan ‘Teytallä, Teytallä’ nimaqnïtsu gloriaman yecuyanqa; sinoqa sielucho quecaq Dios Yayä munashqanno cawacoqcunallam. Juisiu junaqmi atscaq niyämanqa: ‘Teyta, Teyta, noqacunam jutiquicho yachatsicushqa cayä; jutiquichomi nunacunapita supëcunata qarquyarqä; y jutiquichomi atsca milagrucunatapis rurayarqä’ nir”. Hutsankunapita mana arrepentikoqta, ni hutsankunata mana haqeqkunataqa, Cristum kënö ninqa: “[¡]Nopapita witicuyë!” (Mat. 7:21-23). ¿Imanirtaq tsë nunakunata mana ankupashpa tsënö ninqa? Mana alli rurëninkunawan Diosta penqakïman churayashqa kayaptin y nuna mayinkunata hutsaman ishkitsiyashqa kayaptinmi.
14. ¿Imanirtaq congregacionpita qarquriyan hutsampita mana arrepentikïta munaqkunata?
14 Diospa Palabranqa mandakun hutsankunapita mana arrepentikoqkunata congregacionpita qarquyänampaqmi (lei 1 Corintios 5:9-13). Kënö rurëqa alläpa precïsom, ¿imanir? 1) Jehová Diosnintsikpa shutin mana rakchatashqa kanampaq, 2) congregacionnintsik mana rakchatashqa kanampaq y 3) hutsa ruraq hutsampita arrepentikunampaq.
15. Jehovällapaq kawëta munaqkunaqa, ¿ima preciso tapukïkunataraq tapukushwan?
15 Diospa Leyninta mana wiyakoqkunata, ¿Jesusnöku rikantsik? Llapantsikmi kënö tapukushwan: “Pillatapis congregacionpita qarquriyaptin o Testigo këta manana munar kikin rakikäkuriptin, ¿pëta parlapëkämanraqtsuraq? Y, ¿wayïchö manana täraq kastä kaptinqa?”. Këchömi rikätsikushun rasumpa alli rurëta kuyanqantsikta y Jehovällapaq kawanqantsikta.b
16, 17. ¿Ima rurëtaq huk cristiänapaq sasa karqan, y imataq yanaparqan Jehová mandakunqanta wiyakunampaq?
16 Huk congregacionchö pasakunqanta rikärishun. Huk cristiänam rikarqan ollqu wawan ichikllapa ichikllapa Jehoväta manana kuyanqanta, tsëpita hutsaman ishkirir hutsampita mana arrepentikuptin congregacionpita qarquriyanqanta. Kë cristiana Jehoväta alläpa kuyarpis wambrantaqa kuyaqmi, tsëmi congregacionpita qarqushqakunawan manana parlanapaq Jehová mandakunqanta wiyakïqa, alläpa sasa pëpaq karqan.
17 ¿Imaraq nishwan karqan kë cristiänata? Llakikïninta Jehová musyanqantam huk anciano rikätsirqan. Hina Jehoväpa ciëlochö wakin tsurinkuna mana wiyakuyaptin pëpis llakikunqanman pensanampaqmi nirirqan. Hina yarpätsirqanmi, hutsankunata mana haqeqkunata congregacionpita qarquyänampaq alläpa llakikïpaq kaptimpis, Diosnintsik tsënö rurayänampaq mandakunqanta. Kë anciano kënö consejanqantam kë cristiänaqa wiyakurqan y Jehová mandakunqantam respetarqan.c ¡Tsënö rurëqa Jehoväta alläpam kushitsin! (Pro. 27:11.)
18, 19. a) Hutsata ruraqkunawan manana parlarqa, ¿imata chikinqantsiktataq rikätsikuntsik? b) ¿Imataraq tarishun Diosllapaq kawarnin, y ninqankunata wiyakurninqa?
18 Kë cristiana pasanqannö imëllapis pasamashqaqa, llakikunqantsikta Jehová musyanqantam yarpänantsik. Congregacionpita qarqushqakunawan o kikinkunapita Testigo këta mana munar rakikäkurishqakunawan manana parlashqam, rikätsikuntsik portakïninkunata y mana alli rurëninkunata chikinqantsikta. Hina rikätsikuntsikmi pëkunata kuyanqantsikta, y qarquyanqan kikinkunapaq kanqanta. Awmi, Jehová mandakunqannö rurashqaqa, itsa hutsanta haqirir rasumpa kaq näniman raslla kutiramunqa.
19 Huk cristiänam congregacionpita qarqushqa karqan, y tiempowan congregacionman kutiramurnam kënö nirqan: “Kushikömi Jehová markanta alläpa kuyar limpio kananta munanqanta. Diosta mana reqeq nunakunapaqqa, itsa kë rurë mana alli kanman, pero alläpa precïsom y Jehová kuyakoq kanqantam rikätsikun”. ¿Tsënötsuraq pensanman karqan Testigo kaq kastankunawan amïgonkuna congregacionpita qarquriyanqanchö parlaparlla kayaptinqa? Hutsa ruraqkunapaq Biblia ninqanta wiyakurqa, alli kaq rurëkunata kuyanqantsikta y Jehovälla imanö kawanapaq mandamanqantsikta respetanqantsiktam rikätsikushun.
“Mana alli rurëta chikiyë”
20, 21. ¿Imanirtaq alläpa preciso mana alli rurëta chikinantsik?
20 Apóstol Pëdrum kënö nir consejamantsik: “Alli penseniquicunawan cabal nunana car, mäcoq mäcoq cayë”. ¿Imanirtaq tsënöqa nirqan? ‘Porqui chiquimaqnintsic diabloqa, imeca mallaqashqa leonnomi qaparir qayarir, purican marcäquinintsicta ushacäratsinanpaq.’ (1 Ped. 5:8.) ¿Noqantsikpis mikunampaq prësan cuentatsuraq këkantsik? Tsënö mana kanapaqqa, alläpa precïsom llapan shonquntsikwan mana alli rurëkunata chikinantsik.
21 Mana alli rurëkunata chikïqa sasam. Hutsasapam kantsik y munëninkunallata ruraq mundochömi kawantsik (1 Juan 2:15-17). Pero Jesus ruranqannö rurashqa y Jehová Diosta kuyanapaq más sinchikushqaqa, hutsa rurëtam pasëpa melanäshun. Alläpa precïsom llapan cristiänokuna ‘mana alli rurëta chikiyänan’. Jehová tsënö mandakunqanta wiyakïta tïrashqaqa, noqantsikchömi kënö ninqan cumplikärinqa: “Pëqa alli kaqta kuyaq kaqkunapa kawënintam täpëkan, y chikikoqkunapa makimpitam salvan” (Sal. 97:10).
[Päginapa ura kuchunchö willakïkuna]
a Deuteronomio 18:10-12: “Manam qamchö kanmantsu, ollqu o warmi tsurinta ninapa pasatseq, ni adivinaq, ni magia ruraq, ni suerte qateq, ni hechicero, ni brüjakoq, ni brüjota tapoq, ni shamoq tiempopaq willakoq ni wanushqakunata tapukoq. Kë llapan ruraqkunataqa alläpam Jehová chikïkun, y kë melanëpaq rurëkunata rurayanqanrëkurmi, Jehová Diosniki puntëkipita qarqurinqa”.
b Këpaqqa más parlëkan La Atalaya 15 de noviembre de 1981, 20 a 25 päginankunachömi.
c Rikäri La Atalaya 15 de enero de 2007, 17 a 20 päginankunata.
¿Imatataq yachakurquntsik?
• ¿Imaraq yanapamäshun alläpa washkuta mana upyanapaq?
• ¿Imataraq rurashwan brujerïakunaman mana ishkinapaq?
• Warmipis ollqupis qalapächu mana alli rurëkaqta rikarëqa, ¿imanirtaq alläpa mana alli?
• Pitapis kuyanqantsikta congregacionpita qarquriyaptinqa, ¿imanötaq rikätsikuntsik mana alli rurëkunata chikinqantsikta?
[27 kaq päginachö dibüju]
¿Imamantaq huk cristiano yarpachakunman washkuta upyëta munarqa?
[28 kaq päginachö dibüju]
Imata rurëchöpis Satanaspa makinman ama ishkishuntsu
[29 kaq päginachö dibüju]
Warmipis ollqupis qalapächu mana alli rurëkaqta rikaräkoqqa, ¿imatataq shonqunchö kuyar qallëkan?