Bibliam yanapashqa jukläyana kawakuyänampaq

“Kananqa mas alli qowanam o runanam kä” (RIGOBERT HOUETO)

• YURIKUNQAN WATA: 1941

• NACIONNIN: BENIN

• MAS REQINAPAQ: ATSKA WARMIYOQMI KARQAN Y JEHOVÄPA TESTÏGUNKUNATAM CHIKEQ

PUNTA KANQÄ:

Benin nacionchö këkaq Cotonou niyanqan jatun markachömi yurirqä. Catölicu kanäpaqmi yachatsiyämarqan, peru misamanqa manam ëwaqllatsu kä. Tsë tiempuqa allilla kaptinmi, wakin catölicu nunakunaqa atska warmiyoq kayaq. Noqapis chusku warmiyoqmi karqä.

1970 watam Benin nacionchö juk grüpu nunakuna gobiernupa contran sharkuyarqan. Nacionnïpaq alli kanqanta pensarmi, noqapis llapan shonqüwan yanapakurqä y polïticaman mëtikurqä. Nunakuna rurayanqanman mana mëtikuyaptinmi, gobiernupa contran këkaqkunaqa, Jehoväpa testïgunkunata mana allipa rikäyaq, y imëkata rurar sufritsiyanqanchömi yanapakurqä. 1976 wata Testïgu misionërukunata nacionnïpita qarquriyaptinqa, manana imëpis kutiyämunampaq kaqtam pensarqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

Gobiernupa contran kayanqanqa 1990 watam usharqan, y Testïgu misionërukunata kutimoqta rikarqä alläpam espantakurqä. Tsëmi “capazchi pëkunataqa Teyta Dios yanapan” nir pensar qallëkurqä. Tsë witsanmi jukchöna trabajar qallëkurqä. Juk kaq trabajaq mayïqa Testïgum karqan, y creinqampitam parlapämarqan. Bibliachömi rikätsimarqan Jehoväqa alli kaqta ruraq y kuyakoq Dios kanqanta (Deuteronomiu 32:4; 1 Juan 4:8). Dios tsënö kanqanqa alläpam gustamarqan, tsëmi masta musyëta munar Bibliapita yachakur qallëkurqä.

Jehoväpa testïgunkuna rurayanqan reunionkunamanmi ëwar qallëkurqä, y rasumpa kuyanakuyanqanta rikarmi alläpa espantakurqä: ima color kayaptimpis y imanö kayaptimpis llapankunatam igual tratayaq. Pëkunawan mas juntakurmi, Jesuspa rasumpa qateqninkuna kayanqanta cläru rikarqä (Juan 13:35).

Jehoväta sirwita munarqa, Iglesia Catölicata dejanäpaq kaqtam cuentata qokurqä. Jukkuna imata niyänampaq kaqman alläpa yarpachakuptïmi, tsëta rurëqa fäciltsu karqan. Tsëta ruranäpaq atska tiempuraq pasashqa kaptimpis, Jehovä yanapamaptinmi valienti karqä y Iglesia Catölicata dejarqä.

Juk mastaran ruranä karqan. Bibliachömi yachakurqä juk nuna atska warmiyoq kanqanqa, Jehoväta mana gustanqanta (Genesis 2:18-24; Mateu 19:4-6). Pëpa rikëninchöqa punta kaq warmïwan casakunqällam välirqan, tsëmi tsëta legalizätsirqä. Wakin warmïkunataqa wayïpita ëwakuyänampaqmi nirqä, peru manam wanayanqantaqa faltatsirqätsu. Tiempuwanqa ishkaqmi Jehoväpa testïgun tikrayarqan.

¿IMAKUNACHÖTAN YANAPAMASHQA?

Catölicaraq karpis, warmïqa Jehoväta sirwinäpaq decidinqätam respetan, y ishkämi cuentata qokuyarqö kananqa mas alli qowana o runana kanqäta.

Unëqa polïticaman mëtikur nunakuna mas alli kawakunapaq yanapakuyta puëdinqätam pensarqä, peru mana tsënötsu karqan. Kananqa allim musyä, Diospa gobiernunlla kë munduchö problëmakunata ushakätsimunampaq kaqta (Mateu 6:9, 10). Jehovätam agradecikü rasumpa kushishqa kawanäpaq yanapamanqampita.

“Cambianäqa manam fäciltsu kashqa” (ALEX LEMOS SILVA)

• YURIKUNQAN WATA: 1977

• NACIONNIN: BRASIL

• MAS REQINAPAQ: PENTECOSTAL IGLESIACHÖMI PASTOR KARQAN

PUNTA KANQÄ:

São Paulo markachö Itu niyanqan barriuchömi winarqä. Tsë barriuqa alläpa peligrösu kanqampitam reqishqa karqan.

Jukwan jukwanmi kakurqä, alläpa lïsum karqä y drögakunatam rantikoq kä. Tsënö sïguirqa, carcelchö o pantionchö ushanäpaq kaqtam cuentata qokurqä, tsëmi tsë llapanta dejarqä. Tsëpitanam Pentecostal Iglesiaman yëkurqä, y tiempuwanqa pastormi tikrarqä.

Iglesiächö ruranqäwan nunakunata yanapëta puëdinqätam pensarqä, tsëmi radiupa parlar qallëkurqä y tsë sitiuchömi alläpa reqishqa tikrarqä. Peru ichikllapa ichikllapam cuentata qokurqä, Iglesiata dirigeqkunaqa iglesiaman ëwaqkunapaq mana yarpachakuyanqanta y Teyta Diosta mana respetayanqanta. Qellëllapaq yarpachakoqnö kayaptinmi, iglesiata dejarirqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

Jehoväpa testïgunkunawan Bibliapita yachakur qallarllam, wakin religionkunapita jukläya kayanqanta cuentata qokurqä. Kë ishkanta rurayanqanta rikarmi alläpa espantakurqä: juk kaq, pëkunaqa manam niyanllatsu Diosta y nuna mayintsikta kuyanapaq, sinöqa rurayanqanwanmi rikätsikuyan. Ishkë kaq, pëkunaqa manam polïticaman mëtikuyantsu ni guërrakunaman ëwayantsu (Isaïas 2:4). Tsëkunata rurayanqanta rikarmi, rasumpa kaq religionta, awmi, kawëman chätsikoq llanu nänita tarishqa kanqäta cuentata qokurqä (Mateu 7:13, 14).

Teyta Diospa rikëninchö alli këta munarqa, cambianäpaq kaqtam cuentata qokurqä. Mas humildim kanä karqan y familiäwanmi mas tiempu pasanä karqan. Tsëkunata rurë mana fäcil kaptimpis, Jehovä yanapamaptinmi logrëta puëdirqä. Warmïqa alläpa espantakurmi, Diospa kaqchö mas ras o sas alliyänäpaq yanapamarqan (pëqa mas puntatam Bibliapita yachakur qallashqa karqan). Tsëpita ichik tiempullatam Jehoväpa testïgun kayänäpaq decidiyarqä, tsëpitanam ishkäkuna juntu bautizakuyarqä.

¿IMAKUNACHÖTAN YANAPAMASHQA?

Warmïwan noqaqa, Jehoväwan alli amïgu kayänampaqmi kiman wamräkunata kushishqa yanapayä, y pitsqäkunam kushishqa kawakuyä. Teyta Diostam agradecikü Bibliapita rasumpa kaqta yachakunäpaq yanapamanqampita. Bibliachö ninqanqa vïdankunata cambiayänampaqmi nunakunata yanapan, y noqawan pasanqanmi tsënö kanqanta rikätsikun.

“Kananqa alli, yamë y kushishqam sientikü” (VICTORIA TONG)

• YURIKUNQAN WATA: 1957

• NACIONNIN: AUSTRALIA

• MAS REQINAPAQ: WAMRA KËKARMI IMËKATA SUFRIRQAN

PUNTA KANQÄ:

Papänïkunaqa qanchis wamrayoqmi kayarqan y noqam mayor kaq karqä. Nueva Gales del Sur niyanqanchömi Newcastle markachö winarqä. Papänïqa borrächu y alläpa lïsum karqan. Mamänïpis alläpa lïsam karqan. Imëkata nimar y maqamarmi alläpa maltratamaq. Cada junaqmi mana alli kanqäta y infiernuchö ushakänampaq kaqta nimaq. Tsënö nimanqanqa alläpam mantsakätsimaq.

Qarä herïdayanqanyaq mamänï seguïdu maqamaptinmi, höraqa escuëlata ëwëta puëdeqtsu kä. Onci watayoq këkaptïmi, autoridäkuna noqapita cargutsakuyarqan, y papänïkunapa cargunchö manana kanäpaqmi decidiyarqan. Tsëpitanam conventuman apayämarqan, peru catorci watayoq këkarmi tsëpita ëwakurqä. Wayïmanqa manam kutita munarqänatsu, tsëmi Sydney markachö Kings Cross niyanqan barriupa cällinkunachö kawar qallëkurqä.

Cällikunachö kawëkarmi, drögakunata utilizar, machakur, pornografïata rikar y jukwan jukwan kakur qallëkurqä. Juk kutiqa alläpam mantsakätsiyämarqan. Discotëcayoq nunapa cuartunchömi quedakuykarqä, y juk paqasmi ishkaq nunakuna watukaq chäyarqan. Tsë wayiyoq nunaqa pununqan cuartumanmi mandamarqan, tsënö kaptimpis pëkuna parlayanqantam wiyarqä. Pëqa watukaqnin nunakunatam rantikamëta munarqan. Tsë nunakunaqa washkuta rantikuyänan wayichö trabajanäpaqmi, Japon nacionman barcuchö apakamëta munayarqan. Tsëmi alläpa mantsakarnin balconpa yarqurir, yanapëkayänampaq rogakur cörripa ëwakurqan.

Tsënö cörripa ëwëkarmi, tsë markachö visïta këkaq nunawan tinkurqä, y qellëta qaramänanta munarmi pasëkämanqanta willarqä. Peru pëqa quedakuykanqan cuartuta bañakoq y mikoq ëwanäpaqmi invitamarqan. Tsëpitaqa pëwanmi quedakurqä, y juk wata pasariptinmi casakuyarqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

Jehoväpa testïgunkunawan Bibliapita yachakurqa, kë munduchö imëka mana allikunapita Diablu culpayoq kanqanta musyarmi alläpa cölerakurqä. Noqataqa Teyta Dios sufritsimanqantsiktam imëpis niyämashqa kayarqan. Peru wamra kanqä witsampita alläpa mantsakätsiyämashqa kaptinmi, Teyta Dios infiernuchö mana castigamanqantsikta musyarqä alläpa kushikurqä.

Imatapis decidiyänampaq Testïgukuna Bibliachö ninqanta cuentaman churayanqanta y creiyanqannö rurayanqanta rikarmi, alläpa espantakurqä. Noqaqa manam yachanëpaqtsu karqä, peru imata niptïpis o ruraptïpis pëkunaqa shumaq y respëtuwanmi tratayämarqan.

Imanö pensanqäta cambiëmi noqapaqqa fäciltsu karqan. Imapaqpis mana välinqätam pensarqä y kikïllam alläpa chikikoq kä. Jehoväpa testïgun kanäpaq bautizakurpis, atska tiempuran tsënö sientikurqä. Teyta Dios kuyamanqantaqa musyarqämi, peru noqanö warmitaqa mana imëpis kuyamänampaq kaqtam pensarqä.

Bautizakunqäpita quinci watanö pasariptinmi, noqapaqqa imëka cambiarirqan. Jehoväpa Testïgunkuna Yachatsikuyänan Wayichö yachatsikamoqmi, Santiägu 1:23 y 24 ninqampita yachatsikamurqan. Tsëchömi Diospa Palabranta espëjutawan igualatsin, y tsëchöqa Jehovä rikämanqantsiknömi rikäkuyta puëdintsik. “¿Jehovä rikämanqannötsuraq rikäkuykä?” nirmi tapukur qallëkurqä. Qallananllachöqa Jehovä kuyamänampaqnö mana kanqäta pensarmi, Jehovä rikämanqannölla rikäkuykanqäta pensarqä.

Tsëpita juk ishkë junaq pasariptin, Isaïas 1:18 ninqanta leyinqämi alläpa yanapamarqan. Tsë textuchöqa Jehovämi këta nin: “Parlanapaq shayämuy [...]. Jutsëkikuna yawarnö puka kaptimpis, rashtanömi yuraq tikranqa, puka tëlanö kaptimpis, yuraq millwanömi tikranqa”. Jehovä kënö nir parlapëkämanqantanömi rikarqä: “Vicky, parlanapaq shamuy. Qamtaqa allim reqeq, musyämi jutsata ruranqëkita y shonquykichö imanö kanqëkita, tsënö kaptimpis kuyaqmi”.

Tsë paqasqa manam punuyta puëdirqätsu. Dios kuyamanqantaqa manam següruraqtsu karqä, peru Jesus noqantsikrëkur wanunqanmanmi pensar qallëkurqä. Cuentatam qokurqä Jehoväqa atska tiempupa noqawan pacienciayoq kanqanta y imëkata rurar kuyamanqanta rikätsimanqanta. Tsënö kaptimpis, noqaqa kënö neq cuentam këkashqa karqä: “Manam noqataqa kuyamëta puëdinkitsu. Alläpa jutsata rurashqa kaptïmi, Tsuriki Jesus wanunqampis jutsäpita perdonashqa kanäpaq yanapamantsu”. Jesus wanunqantam mana kaqpaq churëkarqä. Peru noqantsikrëkur tsurin wanunanta permitinqanman pensarmi, Jehovä kuyamanqanta cuentata qokur qallëkurqä.

¿IMAKUNACHÖTAN YANAPAMASHQA?

Kananqa alli, yamë y kushishqam sientikü. Casädu vïdächöpis mas allinam kawakuyä, y vïdächö pasanqäwan jukkunata yanapëta puëdinqäpitam kushikü. Cada junaqmi Jehoväwan mas amïgu kä.

“Teyta Diosqa mañakunqätam contestamurqan” (SERGEY BOTANKIN)

• YURIKUNQAN WATA: 1974

• NACIONNIN: RUSIA

• MAS REQINAPAQ: HEAVY METAL NIYANQAN MÜSICATAM WIYAQ

PUNTA KANQÄ:

Vótkinsk markachömi yurirqä, y familiäqa waktsallam karqan. Tsë markachömi Piotr Ilič Chaikovski reqishqa nunapis yurirqan. Papänïqa alli nuna karpis borrächum karqan, tsëmi wayïchöqa tranquïlutsu kayaq kayä.

Noqaqa mana estudiupaq allitsu karqan, y tiempuwanqa wakinkuna noqapita mas alli kayanqantam pensarqä. Manam alläpatsu parlaq kä y manam fäciltsu pimampis confiakoq kä, y escuëlaman ëwëqa manam fäciltsu karqan. Cläsichö imatapis yachatsikunä kaptinqa, musyarpis manam entienditsikuyta puëdeqtsu kä. Secundariachö këkaptïmi, juk wata ushë librëtäman kënö nir qellqayarqan: “Manam alli parlëta yachantsu; manam musyanqanta entienditsikuyta puëdintsu”. Tsëta qellqayanqanqa alläpam llakitsimarqan, y mana imapaqpis väleqnömi sientikurqä. Tsëmi imapaq kawanqäman pensar qallëkurqä.

Jövin kanqä witsanqa upurmi qallëkurqä. Qallananllachöqa allim sientikoq kä, peru alläpa upuptïqa concienciämi acusamaq. Manam imapaq kawanqäta musyaqtsu kä. Tiempu pasanqanmannömi masraq llakikurqä, y höraqa atska junaqmi wayïpita yarqoqtsu kä. Kikï wanutsikuytapis pensarqämi.

Veinti watata cumpliriptïqa, heavy metal niyanqan müsicata wiyanqämi yanapamarqan. Tsë müsicata wiyëqa puëdeq kanqätam pensatsimaq, tsëmi tsënö müsicata wiyaqkunawan juntakurqä, aqtsätam rututsirqätsu, rinrïkunatam uchkutsirqä y tsë müsicata tocaqkunanömi vistikurqä. Ichikllapa ichikllapam lïsu y mantsëpaq tikrarqä, tsëmi familiäwan alläpa pleytuyaq kayä.

Jukläya nunam tikrëkarqä. Tsë müsicata wiyarqa kushishqa kanäpaq kaqtam pensarqä, peru manam tsënötsu karqan. Y gustamanqan müsicata tocaqkuna mana allikunata rurayanqanta musyarqa, alläpam cölerakurqä.

Yapëmi kikïta wanutsikuyta munarqä, y kë kutiqa rasumpam rurëta munarqä. Peru mamänï alläpa kuyamanqanta y noqapaq imëkata ruramunqanta yarparmi wanutsikurqätsu. Tsëqa alläpa llakikuypaqmi karqan: manam kawëta munarqänatsu, peru manam wanutsikuytapis munarqätsu.

Pasamanqanman mana alläpa yarparänäpaqmi, rüsu idiömachö qellqayanqan reqishqa librukunata leyir qallëkurqä. Juk kaqchömi iglesiata dirigeq nunapaq willakoq. Derepentitam Diospaq y nunakunapaq imallatapis rurëta munarqä. Mana imëpis rurashqa këkarmi llapan shonqüwan Teyta Diosman mañakurqä, y shumaq kawëta yachatsimänampaqmi rogakurqä. Tsënö mañakuykarmi tranquïlu sientikur qallëkurqä. Peru tsëpita ishkë hörata pasanqanmi espantakuypaqqa karqan: juk Testïgum wayïman qayakamurqan, y Bibliapita yachatsimänampaqmi nimarqan. Tsënömi Teyta Diosqa mañakunqäta contestamurqan. Tsë junaqpitaqa kushishqa y jukläyanam kawakurqä.

¿IMANÖTAN BIBLIA YANAPAMASHQA JUKLÄYANA KAWAKUNÄPAQ?

Mana fäcil kaptimpis heavy metal niyanqampita llapan kapamanqantam basüraman jitarirqä. Tsënö kaptimpis, wiyanqä müsicataqa atska tiempupam yarpararqä. Tsë müsicata tocayanqan sitiupa pasarqa, mana allikunata yarparmi qallëkoq kä. Yachakunqäkunata peqäman o umäman y shonqüman churëkanqäwan mana juntakänanta munarmi, tsë sitiukunapaqa pasarqänatsu. Unë ruranqäkuna pensënïman chämuptinqa, llapan shonqüwanmi mañakoq kä. Tsëmi “nunakuna mana entiendita puëdiyanqan, Teyta Diospita” chaskinqantsik yamë këta tarinäpaq yanapamarqan (Filipensis 4:7).

Bibliapita yachakuykarmi entiendirqä, cristiänukunaqa creiyanqampita nuna mayinkunata yachatsiyänampaq kaqta (Mateu 28:19, 20). Tsëtaqa mana rurëta puëdinäpaq kaqtam pensarqä, peru Bibliapita yachakunqäqa yamë y kushishqa kanäpaqmi yanapëkamarqan. Wakin nunakunapis Bibliapita yachakuyta wanayanqanta musyarmi, mantsakuykarpis yachakunqäpita jukkunata parlaparqä. Tsëmi mas allina sientikunapaq y Bibliapita yachakunqäta yarpänäpaq yanapamarqan.

¿IMAKUNACHÖTAN YANAPAMASHQA?

Kananqa warmïwanmi kushishqa kawakuyä, y panïta, mamänïta y mas nunakunatam yanaparqö Bibliachö ninqampita yachakuyänampaq. Diosta sirwir y pëta reqiyänampaq nunakunata yanaparmi, kananqa kushishqana kawakü.