Abrahanqa kuyakoq nunam karqan
Abrahanqa shonqun paqwë ushakärishqanömi sientekun. Alläpa kuyanqan warmin Säram wanukïkushqa. ¡Imanö llakishqaraq llapan pasayanqankunata yarpärin pampanqan hora! Alläpa llakikurmi waqar qallëkun (Génesis 23:1, 2). Manam penqakuntsu weqin ramëta, antis tsënömi rasumpa kuyakoq kanqanta rikätsikun.
¿IMATAQ KUYAKÏQA? Shonqupita patsë yachanar pimampis laqakëmi. Kuyakoq nunaqa rurëninwanmi tsëta rikätsikun, tsë ruranan sasaraq kaptimpis.
¿IMANÖTAQ ABRAHAN TSËTA RIKÄTSIKURQAN? Rurëninwanmi familianta kuyanqanta rikätsikurqan. Tukï ruranankuna këkaptimpis, familian Jehoväpa kaqchö alli kayänanta y imëpis kushishqa kayänantam ashirqan. Kikin Jehoväpis rikarqanmi Abrahan familianta shumaq atiendenqanta y Diospa kaqta puntaman churayänanta ashinqanta (Génesis 18:19). Hasta tsurinta Abrahan alläpa kuyanqantapis Jehoväqa nirqanmi. Huk kutim Isaacpaq parlarnin, “kuyanqëki hapallan wamrëki” nirqan (Génesis 22:2).
Hina familianta alläpa kuyanqantaqa rikätsikurqan warmin Sara wanukïkuptinmi. Pëqa warminrëkur alläpam waqarqan. Manam pensarqantsu huk ollqu llakishqa sientekur waqanqan penqakïpaq kanqanta. Awmi, pëqa rikätsikurqan sinchi y kuyakoq kanqantam.
Diosta kuyanqantam rikätsikurqan. Llapan kawëninchömi tsëta rikätsikurqan. ¿Imanö? Yarpäshun 1 Juan 5:3 kënö ninqanta: “Mandacushqancunata cäsucur[ninmi], Diosta cuyantsic”. Tsëmi, Abrahanqa rikätsikurqan Diosta rasumpa kuyanqanta.
Imatapis Jehová niptinqa hinan höram ruraq (Génesis 12:4; 17:22, 23; 21:12-14; 22:1-3). Manam qelanaqtsu ruranampaq kaq sasaraq kaptin, ni musyëtaraqtsu munaq imatapis ruranampaq imanir Dios mandëkanqanta. Tsëtaqa manam cuentapaqpis Abrahanqa churaqtsu. Imatapis ruranampaq Dios mañanqantaqa wiyakunampaq listom këkarqan; tsënömi rikätsikurqan Diosta kuyanqanta.
¿IMATATAQ YACHATSIMANTSIK? Wakinkunata kuyanapaq y yachanänapaqmi, y masraq familiantsikkuna kaptinnäqa. Manam haqishwantsu kanan witsan imëka rurëkuna kuyashqa familiantsikpaq tiempota rakinata michämänata.
Hina Abrahanpitaqa yachakuntsik Jehoväta shonqupita patsë kuyanantsik alläpa precisanqantam. Tsë kuyakïmi yanapamäshun imanöpis kawanapaq. Diosta kushitsinantsikrëkur portakïnintsikta, pensënintsikta y imanöpis parlanqantsikta cambianapaqmi yanapamäshun (1 Pedru 1:14-16).
Musyanqantsiknöpis, höraqa sasaran Dios nimanqantsikta wiyakunantsik. Pero manam qonqanantsiktsu Abrahanta ‘amïgö’ nir qayaq noqantsiktapis yanapamänantsikpaq kaqta (Isaías 41:8). “Alli firmi tsaracoqta y callpayoqta[m] catsiyäshunqui” ninmi Palabran Bibliaqa (1 Pedru 5:10). Tsënö këkaptinqa, Abrahanpa amïgon Jehová awnimantsikman markäkushun o yärakushun.
[10 kaq päginachö recuadru]
¿Manatsuraq ollqukunaqa waqayanman?
Itsa wakinqa tsënö pensayanman. Tsënö kaptimpis, itsa mantsakäkunkiman Abrahannö wiyakoq y sinchi nunakuna tukï mana allikunata pasarnin waqayanqanta Biblia willakuptin. Tsënömi pasarqan Josëta, Davidta, apóstol Pëdruta, Efeso congregacionchö anciänokunata, y hasta kikin Jesustapis (Génesis 50:1; 2 Samuel 18:33; Lucas 22:61, 62; Juan 11:35; Hechos 20:36-38). Rikanqantsiknöpis, ollqukuna waqayanqan mana alli kanqantaqa manam Biblia yachatsikuntsu.