¿Imanötaq cristiänokuna yachatsikuyanqan marka mayinkunata yanapan?
KËYAQMI rikarquntsik rasumpa cristiänokunaqa polïticaman mana mëtikuyanqanta. Tsëqa, ¿imanötaq rikätsikuyan marka mayinkunata yanapëta munayanqanta? Tukïnöpam, pero masqa Jesus kënö ninqanta wiyakurninmi: “Tsemi qamcunata cachayaq jinantin nasioncunapa ewar, noqaman creyicuyänanpaq nunacunata willapäyänequipaq, y creyicoq caqtana bautisayanqui Dios Yayapa, Tsurin Jesucristupa y Santu Espiritupa jutincho. Y qamcunata llapan yachatsiyashqaqcunata yachatsiyanqui pecunapis alli cäsucoq cayänanpaq” (Mateo 28:19, 20).
Precisanmi musyanantsik yachatsikuyänampaq Jesus qateqninkunata mandanqan y nunakunapaq aktsi y kachi cuenta kayänampaq ninqan imachö igualanqanta (Mateo 5:13, 14). ¿Imachötaq igualayan? ¿Y imachötaq nunakunata yanapan Diospita yachatsikï?
Cristupa yachatsikïninqa kachi cuenta y aktsi cuentam
Kachiqa ëtsa ismur mana ushakänampaqmi yanapakun, tsënöllam cristiänokuna alli willakïta llapan nunakunaman chätsiyanqampis wiyakoqkuna mana ushakäyänampaq yanapakun. Jesuspa yachatsikïninta wiyakoqkunaqa imëka ismutsikoq cuenta mana alli rurëkunapitam tsapashqa kayan. Kukanö y washkunö qeshyatsikoq viciokunatam jaqiyan. Jina nuna mayinkunawan alli kawakoq, kuyakoq, mana ras piñakoq, llakipäkoq y maskunachö alli nuna kayänampaqmi kallpachakuyan (Galatas 5:22, 23). Awmi, kë llapanmi rikätsikun cristiänokunaqa marka mayinkunata alli yanapayanqanta. Tsëqa, ¿manaku Diospita yachatsikurqa cristiänokuna markankunapaq allita rurëkäyan?
Pero ¿imachötaq Diospita yachatsikïqa aktsiwan igualan? Imanömi Intipa o Rupaypa aktsinwan Killa chipapan, tsënöllam cristiänokunapis Jehoväpa “aktsinwan” chipapaq cuenta, Diospa alli yachatsikïninkunata willakuyan y alli portakïninkunata rikätsikuyan (1 Pedru 2:12).
Jina qateqninkunapa portakïninwan aktsi igualanqantaqa Jesus más claro rikätsikurqan kënö nirmi: “Lamparinta sendircur[qa], manam manca rurinmantsu churecuntsic; sinoqa raramanmi churantsic llapan wayicho caqcunata actsinanpaq. Tse lamparin actsicoq cuenta qamcunapis allicunata rurar cawacuyë”. Rasumpa cristiänokunapa yachatsikïninkuna y alli portakïninkunaqa llapan nunakunapaqmi rikakänan, imëka lamparinta raraman o junishman churarkuyaptin aktsin rikakaqnö. Tsënöpam alli rurëninkunata rikaq nunakunaqa cristiänokunatatsu alabayanqa, sinöqa Jesus ninqannöpis, Diostam alabayanqa (Mateo 5:14-16).
Atskaqmi rurayänan karqan
¿Pikunapaqtaq Jesus yarpëkarqan ‘qamcunaqa imeca actsi cuentam cayanqui’ y “actsicoq cuenta [...] cawacuyë” nirnin? (Noqakunam kinkishätsiyarqö.) Llapan qateqninkunapaqchi nikarqan, porque tukï religionkunachö juk ishkë qateqninkuna karqa manachi tsëta rurëta puëdeyanmantsu karqan. Tsëmi llapan creikoqkuna “aktsi” cuenta chipapäyanman. 235 nacionkunapita maschö këkaq qanchis millonnö Jehoväpa testïgonkunam alli musyayan, Cristu ninqan yachatsikïkunata marka mayinkunaman chätsiyänan alläpa precisanqanta.
¿Y imapita yachatsikurtaq puriyan? Jesusqa manam nunakuna imanö más alli gobernayänampaq kaqta, religionwan política takukäyänampaq kaqta, ni tsë asuntopaq nunakuna imata pensayanqanta yachatsikuyänampaqtsu mandarqan. Antis pëqa kënömi nirqan: “Llapan nunacunata alli willaquinïta willayänequi[m] presisan; tsenopa nunacuna Diospa mandaquininman yecuyänanpaq” (Mateo 24:14, noqakunam kinkishätsiyarqö). Y tsëtam kanan witsan cristiänokunaqa yachatsikïkäyan. Jesus mandakunqanta wiyakurninmi pëkunaqa Diospa Gobiernonlla Satanaspa gobiernonta ushakätsinampaq kaqta y kë Patsachö alli nunakunallana täräyänampaq kaqta willakuyan.
Pero Bibliaqa willakun Jesus Patsachö kanqan witsan ishkë precisaq rurëkunata ruranqantam. Qateqnin kaq yachatsikïchömi rikärishun mëqankuna kanqanta y kanan witsan rasumpa kaq cristiänokuna tsëta imanö rurëkäyanqanta.
[8 kaq päginachö ninqan]
¿Imachötaq cristiänokuna yachatsikuyanqan kachi cuenta?
[9 kaq päginachö ninqan]
¿Imanirtaq cristiänokuna yachatsikuyanqanqa imëka paqaschö aktsi cuenta?