Leeqkuna musyëta munayanqan
¿Imanirtaq kikinkuna puralla casakuyänampaq israelïtakunata Dios mandarqan?
▪ Israel markata Dios Leyta qonqanchömi kënö nirqan: “Manam pëkunawan [juk nación kaqkunawan] casakunkimantsu. Manam warmi wamrëkita pëpa ollqu tsurimpaq qonkimantsu, ni warmi wamranta ollqu tsurikipaq ashinkimantsu” (Deuteronomio 7:3, 4). ¿Imanirtaq tsënö micharqan?
Juk lädopaqa, juk dioskunata adorëman Israel nacionta Satanás ishkitsita munanqantam Jehoväqa musyarqan. Diosqa israelïtakunata nirqan pëta mana sirweqkunawan casakurqa, pëpita rakikäkuriyänampaq kaqta y mana alli dioskunata sirwiyänampaq kaqtam. Tsëta wiyakuyänanqa manam ichikllapaqtsu karqan. Diosta piñatsir tsapäkïninta oqrarirqa chikeqninkunapa makinmanmi raslla ishkiriyanman karqan. Y tsënö pasakuptinqa, ¿imanöraq Israel nacionpita Mesias yarqunman karqan? Tsëchi Satanasqa munarqan juk dioskunata sirweq warmikunawan y ollqukunawan israelïtakuna casakuyänanta.
Juk lädopanam, cada israelïtapaq Dios yarpachakoq. Diosqa musyaqmi juk israelita kushishqa y alli kawakunampaqqa pëwan amigo kananraq precisanqanta. ¿Rasumpaku juk dioskunata adoraqkunawan casakïqa alläpa mana alli kanman karqan? Rey Salomonta pasanqanta yarpäri. Pëqa musyarqanmi Diosta mana sirweq warmikunawan casakïqa mana alliman chätsinampaq kaqta, porque Jehoväqa kënömi nishqa karqan: “Diosninkunata qatiyänëkipaqmi shonqïkikunata tumakäratsiyämunqa”. Tsënö nikaptimpis, capazchi Salomonqa pensarqan alläpa yachaq karnin tsëman mana ishkinampaq kaqta. Tsëchi Dios ninqanta wiyakurqantsu. ¿Imamantaq charqan? “Ichikllapa ichikllapam warminkunaqa shonqunta tumakäratsiyarqan [...] juk dioskunata sirwinampaq.” ¡Imanö llakikïpaqmi! Salomonqa Diospa rikëninchö alli këtam oqrarirqan y mana wiyakunqampitam ishkëman gobiernon rakikärirqan (1 Reyes 11:2-4, 9-13).
Quizás pipis ninman wakintaqa Salomontanötsu pasanqanta. Këman yarpärishun, Mahlonqa casakurqan Rut jutiyoq moabïtawanmi, y tsë warmiqa tiempowanqa Diospa sirweqninmi tikrarirqan. Pero rasumpa kaqchöqa, juk moabïtawan casakïqa alläpa peligrösom karqan. Jinamampis, Mahlón tsënö ruranqantaqa manam Biblia alabantsu. Pëqa jövenllam wanukurqan, capazchi Rut Diosnintanö Jehoväta manaraq rikaptin. Wawqin Kilionnam, Orpá jutiyoq moabïtawan casakurqan, y tsë warmiqa manam “diosninkunata” dejarqantsu. Pero Boazqa Rutwan casakurqan Diospa sirweqnin tikranqampita atska tiempo pasashqanchöran. Y tiempowanqa “judïokunapa Diosninta alli sirweq warmitanömi” judïokuna rikäyarqan. Rutwan Boaz casakurirqa mëtsika bendiciontam chaskiyarqan (Rut 1:4, 5, 15-17; 4:13-17).
Pero Mahlonwan Rut casakuyanqan allichö ushashqa kaptinlla Jehoväpa consëjonta wiyakï mana precisanqanta pensëqa, ¿allitsuraq kanman? Tsënö pensëqa, imëka juk nuna apuestachö atska qellëta ganashqa kaptin, qampis alli kawakunëkipaq apuestata rurar kakunqëki alli kanqanta pensënöchi kanman. Y tsëqa, ¿manatsuraq upa kë kanman?
Kanan witsan cristiänokunatapis “Jesucristuman creyicoq[llawan]” casakuyänampaqmi Bibliaqa nin. Jinamampis “Teyta Jesusman mana creyicoqcuna[pita]” cuidakuyänampaqmi nin. Kë consëjoqa casakïta munaq rasumpa cristiänokunapaqmi. Tsënö kaptimpis, Diosta mana sirweq majayoqkunapaqpis Bibliachöqa consëjokuna kanmi sasaraq o ajaraq kaptimpis alli kawakïta procurayänampaq (1 Corintios 7:12-16, 39; 2 Corintios 6:14). Kë llapan consëjokunam rikätsikun casado kawakïta patsätseq o kamakätseq Jehoväqa, casado kar o soltero karpis sirweqninkuna alli kawakuyänanta munanqanta.