¿Imaraq pasanqa Juicio Junaqchö?

1. ¿Imataq Juicio Junaqqa?

¿Imanöraq kanqa Biblia willakunqan Juicio Junaq? Kë derecha kaq lädochö dibüjom rikätsikun nunakuna tsëpaq imata pensayanqanta. Pëkunaqa pensayan mëtsika millón nunakuna Diospa nöpanchö rurëninkunapita juzgashqa kayänampaq kaqtam: wakinkuna ciëlochö kawakïta chaskiyänampaq, y wakinkunana infiernoman ëwayänampaq. Pero Bibliaqa yachatsikun Juicio Junaqchöqa entero Patsachö mana alli rurëkuna ushakänampaq kaqtam (Salmo 96:13). Jesustam juez kanampaq Dios churashqa entero Patsachö justiciata ruranampaq. (Lei Isaías 11:1-5 y Hechos 17:31.)

2. ¿Imanötaq Juicio Junaqchö justicia rurakanqa?

Punta kaq nuna Adanqa Jehová Diospa contranmi churakarqan. Pëpa culpanrëkurmi llapan mirëninkuna jutsa ruraq kayan, sufriyan y wanuyampis (Romanos 5:12). Tsë injusticiata altsamunampaqmi Jesusqa kawaritsimunqa mëtsika millón wanushqa nunakunata. Apocalipsis librom willakun waranqa wata Jesucristu gobernanqan witsan tsëkuna pasanampaq kaqta. (Lei Apocalipsis 20:4, 11, 12.)

Kawarimoqkunaqa manam manaraq wanur rurayanqampitatsu juzgashqa kayanqa, sinöqa mushoq röllokuna yachatsikunqanta wiyakuyanqampita o mana wiyakuyanqampitam, tsëtam rikätsikun Apocalipsis libropa 20 kaq capïtulon (Romanos 6:7). Pëkunapaq parlarmi apóstol Pabluqa nirqan “alli ruraqtapis y mana alli ruraqtapis” Dios kawaritsimunampaq kaqta y, pëkuna Diospita yachakïta puëdeyänampaq kaqta. (Lei Hechos 24:15.)

3. ¿Ima mastataq Juicio Junaq apamunqa?

Jehoväta manaraq reqir y sirwir wanushqa nunakunam puëdeyanqa pëpa munëninta rurëta. Tsëta alli provecharqa “wiñepaq[mi] cawayanqa”. Tsënö karpis, wakin kawarimushqakunaqa manam Diosta wiyakïta munayanqatsu, tsëmi pëkunaqa ‘condenadu cayanqa’. (Lei Juan 5:28, 29 y Isaías 26:10; 65:20.)

Waranqa watakuna Juicio Junaq usharinampaqqa, llapan nunakunatam puntatanö jutsannaq kayänampaq Jehová yanapashqa kanqa (1 Corintios 15:24-28). ¡Imanö shumaq bendiciontam wiyakoq kaqkunaqa chaskiyanqa! Tsë waranqa watam Diabluqa llawiranqa, pero tsëpitaqa ushanan kaq pruëbapaqmi kachashqa kanqa. Satanasqa imëkatam ruranqa Jehoväpita nunakunata rakikäratsinampaq, pero kë ushanan pruëbachö alli tsarakoqkunaqa kë Patsachömi imëyaqpis kawakuyanqa. (Lei Isaías 25:8 y Apocalipsis 20:7-9.)

4. ¿Ima juk juicio junaqtaq nunakunapaq bendicionta apamunqa?

Bibliaqa parlan juk juicio junaqpaqwanmi. Tsë junaqchöqa kë Patsachö imëkapis imanö këkanqanmi ushakärinqa. Tsë junaqqa illaqpitam chäramunqa, Noëpa tiemponchö Apäkï Tamya imëka mana allikunata ruraq nunakunata ushakätsinqannö. Ichikllachönam “mana alli ruraq nunacuna[qa]” chipyëpa ushakäriyanqa, tsënöpam “mushoq patsachoqa allicunata [rurarllana], nunacuna cawayanqa”. (Lei 2 Pedru 3:6, 7, 13.)