¿Puëdintsikku mëqan religionllamampis confiakïta?

Juk religion llakitsishushqa kashuptikiqa, itsa ni mëqan religionkunamampis confiakunkinatsu. Tsënö kaptimpis, kanmi confiakïpaq juk alli religionqa. Patsachö Jesus këkarmi, qateqninkuna kayänampaq nunakunata akrarqan y Dios munanqannö kawakuyänampaqmi yachatsirqan. Cristuta rasumpa qateqkunaqa kanan witsampis kayanraqmi, pëkuna shonqupita patsëmi sinchikuyan Jesus yachatsikunqannö kawayänampaq. ¿Pikunataq kayan?

Punta parlanqantsik Estellem kënö nin: “Jehoväpa testïgunkunawan estudiarninmi, Bibliata entiendir qallëkurqä. ¡Imanö rasunmi Juan 8:32 textu kënö ninqanqa, ‘rason caqta musyariyaptiquim, tse rason caq librariyäshunqui’!”.

Raypis kënömi nin: “Jehoväpa testïgunkunam Bibliawan yachatsiyämarqan sufrimientukuna kanqampita Dios culpayoq mana kanqanta. Jina yachatsiyämarqanmi mana allikuna kananta Dios imanir permitirnimpis, ichikllachöna ushakätsinampaq kaqta awnikunqanta”.

Nunakunapa mana alli rurëninkunapita imatapis jukläya rurëqa sasaraqmi, peru tsë rurëtaqa puëdintsikmi. Mëtsikaq nunakunam Bibliata entiendita y yachatsikunqannölla kawayänampaq yanapayänanta munayan. Tsëmi, cada semäna entëru Patsachö Jehoväpa testïgunkunaqa mëtsika millon nunakunata debaldilla wayinkunachö Bibliapita yachëkätsiyan. Mëtsikaq nunakunam yachakïkäyan Biblia imata rasumpëpa yachatsikunqanta, tsënöpam, Kamakoqnintsikman mas witikäyan y kushishqa kawakïkäyan.a

Pëkunawan yapë tinkurninqa, ¿imanirtaq tapurinkitsu religionninkunaman imanir confiakuyanqanta niriyäshunëkipaq? Imata yachatsikuyanqanta y imanö portakuyanqanta rikë, y kikikilla cuentata qokï confiakïpaq religion kanqanta o mana kanqantapis.