Diosqa llakikunmi ¿Imatataq rurashwan kushikunampaq?

¿Imëllapis llakikurnin waqarqunkiku? . . .a Cäsi llapantsikmi tsëpaqa pasarquntsik. Peru höraqa manam chakintsik o makintsik nanaptinllatsu llakikuntsik. Këta shumaq tantiyarishun, pipis noqantsikpaq ulikur (llullakur) parlaptinqa, itsa llakikushwan, ¿rasunku manaku? . . . Diospis ulikurkur pëpaq parlayaptinqa llakikunmi. Tsë asuntupaq y Diosta kushitsinapaq imata ruranapaq kaqpita parlarishun.

Bibliam willakun wakin nunakuna Diostam alläpa kuyä nikarnimpis, rurëninkunawan ‘shonqunta nanatsiyanqanta’ o llakitsiyanqanta. Pensari, Diostam ‘pasëpa llakitsiyarqan’. Peru ¿imanötaq tsëqa kanman? Rikärishun mana wiyakushqa Dios imanir llakikunqanta.

Diosqa Patsachö punta ishkaq nunakunatam kamarqan, y pëkunam alläpa llakitsiyarqan. Pëqa juk ‘shumaq Eden huertamanmi’ churarirqan. ¿Musyankiku jutinkuna ima kanqanta? . . . Awmi, Adan y Ëvam. Rikärishun imata rurayanqanta.

Eden huertaman Adantawan Ëvata churarirmi, Jehoväqa mandarqan cuidayänampaq. Jina nirqanmi wamrankuna kanampaq y tsëchö imëyaqpis kawakuyänampaq. Peru manaraq wamrankuna kaptinmi, juk alläpa llakikïpaq pasakurqan. ¿Musyankiku ima pasakunqanta? . . . Juk angelmi Ëvata creiratsirqan Diosta mana wiyakunampaq. Jina Adanpis manam wiyakurqantsu. Rikärishun imanö pasakunqanta.

Juk angelmi Ëvawan parlarqan, peru juk culebra parlapëkanqantam creitsirqan. “Diosnö” këta puëdinkim ninqanqa, Ëvata gustarirqanmi. Tsëpitanam, culebraqa imata ruranampaq kaqta Ëvata nirqan y pënam cäsurirqan. ¿Musyankiku ima kanqanta? . . .

Jehovä michanqan plantapitam mikurirqan. Manaraq Ëvata kamarninmi Diosqa Adanta kënö nirqan: “Huertachö llapan plantakuna wayunqantam mikïta puëdinki, pachëki juntanqanyaq. Peru tsë alli kaqta y mana alli kaqta musyatsikoq plantapitaqa, manam mikunëkitsu, tsëta mikurqa, mikunqëki junaqmi wanunki”.

Ëvaqa tsë mandakïta musyarqanmi, peru rikärirqanmi “tsë plantapa frütan mikunapaq alli kanqanta, y rikënimpaq munapëpaq kanqanta [...]. Tsënam plantapa frütanta pallarir mikur qallëkurqan”. Tsëpitanam, Adanta qorirqan y “pëpis mikurmi qallëkurqan”. ¿Imanir-raq tsëta rurarqan? . . . Porqui Jehoväpitapis masqa Ëvatam kuyarqan, tsëmi pë ninqanta rurarqan. Wakinkunata cäsunantsikpa rantinqa Diosta cäsukunantsikmi masqa precisan, ¿manaku tsënö?

¿Yarpankiku Ëvata juk culebra parlapanqanta? Culebra parlëkaqnömi karqan, peru rasun kaqchöqa manam pëtsu parlëkarqan. Jukmi muñikatanö parlëkätsirqan. Tsëqa, ¿pitaq parlëkarqan culebratukurnin? . . . ‘Unë culebram, Diablu y Satanas jutiyoqmi’ parlëkarqan.

¿Musyankiku Diosta imanö kushitsinëkipaq kaqta? . . . Imëpis wiyakïta procurarninmi. Llapan nunakuna Diosta wiyakuyänampa rantin, pëta wiyakuyänampaq logrëta puëdinqantam Satanasqa nin. Tsëmi, Jehovä kënö nir consejamantsik: “Yachaq kë wamrallä y shonqöta kushitsimï, contestanäpaq”. Awmi, Satanasqa Jehovätam ‘qallapar burlapäkïkan’. Llapan nunakuna Diosta mana sirwiyänampaq logrëta puëdinqantam nin. Jehoväta cäsukuptiki y sirwiptikiqa, pëqa kushikunqam. ¿Kallpachakunkiku tsënö ruranëkipaq? . . .