Kushishqam awnikuyarqan yanapakuyänampaq​—Filipïnaschö

CHUNKA watakunanam pasarishqa Gregoriuwan Marilou Manila markachö täräyanqampita, y tsë witsampaqqa kima chunka watayoqpitapis masnam kayarqan. Precursor regularmi kayarqan, peru llapan tiempunkunawanmi trabajayaq. Manam fäciltsu kaq, peru precursor këninkunataqa cumpliyaqmi. Trabajanqan bancuchömi Mariloutaqa precisaq carguman churariyarqan. Pëmi yarpan: “Kawakuyänäpaqqa llapan munayanqäkunam kapayämaq”. Alli trabäjuyoq karmi, Manila markapita 19 kilömetruchö këkaq chaniyoq sitiuchö gustunkunamannö juk wayinkuna ruratsiyänampaq pensariyarqan. Wayikunata ruraq emprësawanmi conträtuta rurayarqan y chunka watachö pagar ushayänampaqmi awnikuyarqan.

“SUWËKANQÄTAM CUENTATA QOKURIRQÄ”

Mariloumi willakun: “Kë mushoq trabäjuchöqa alläpam trabajaq kä y manam tiempu kapamaqtsu Jehoväpa kaqta ruranäpaq, tsëmi yachatsikoq yarqïtapis pasëpana qelanärirqä. Jehoväpa kaqta suwëkanqätam cuentata qokurirqä. Jehoväpaqqa ichikllatanam rurëkarqä”. Tsënö këkäyanqampita mana alli sientikurmi qowan Gregoriuwan parlayarqan imata rurëkäyanqampita. Gregorium nin: “Jukläyana kawëtam munayarqä, peru manam musyayaqtsu kayä imanö rurayänäpaq kaqta. Jehoväpaq masta rurayänäpaqmi parlayarqä, porqui wamräkunapis manam karqantsu, tsëmi Jehoväta mañakuyarqä pëta mas sirwiyänäpaq yanapëkayämänampaq”.

Y tsë witsankunachöqa atska discursukunatam wiyayarqan mas yachatsikoqkunata wanayanqan sitiukunachö yanapakuyänampaq. Gregorium yarpan: “Mañakuyanqäta Jehovä contestëkamunqanmi karqan”. Ishkanmi mañakuyarqan mas kallpata y mas markäkïta Jehovä qoykunampaq, peru rurëkätsiyanqan wayinkunam impidirqan. Kima watapanam paguëkäyarqan. ¿Imataraq rurayanman karqan? Mariloumi willakun: “Conträtu rurayanqäta manana pagarninqa pagayanqä kaq qellëtam perdiriyänä karqan, y tsëqa atska qellëmi karqan. Peru pensayarqä Jehoväpa munëninta rurayänäpaq kaqta o kikïkunapa munëninkunata rurayänäpaq kaqtam”. Jehoväpa gobiernunrëkur Pablu imëkankunata jaqinqankunaman yarparmi, trabäjunkunata y rurëkätsiyanqan wayipita pagakïtapis jaqiriyarqan, cäsi llapan cösasninkunatam rantikïkuyarqan, tsëpitam Manila markapita 480 kilömetruchö këkaq Palawan islapa juk sitiunman ëwakuyarqan (Filip. 3:8).

“SENCÏLLULLA KAWËTAM YACHAKUYARQÖ”

Manaraq ëwakurninmi Gregoriuwan Marilouqa sencïllulla kawakïta yachakïkäyarqan, peru manam musyayarqantsu rasumpa sencïllu kawakï imanö kanqäta. Mariloumi nin: “Chärirqa manam creirirqätsu. Manam karqantsu luz y ni ima wanayanqä kaqkunapis. Cocinakurnin arroz secana mankäkunata luzman conectayänäpa rantinmi yamtawan, tullpachö cocinayänä karqan. Mercäduman rantipakoq ëwëta y restaurantikunachö mikupakïta y maskunatam pasëpa llakïkoq kä”. Tsënö këkarpis imarëkur ëwayanqanman yarparmi ichik tiempullachö yachakäriyarqan. Mariloumi nin: “Kananqa alläpam kushikö shumaq sitiukunata y chipapaq qoyllurkunata rikar... Peru mas kushikïpaqqa yachatsiyanqä nunakunata yachakuyanqampita kushikoqta rikëmi. Këchö kawarmi sencïllulla kawëta yachakuyarqö” (Filip. 4:12).

Gregorium willakun: “Chäyänäpaqqa chuskoqllam Testïgukuna kayarqan. Llapan semänakuna reunionchö discursar qallëkuptï y cantayäna höra guitärrata tocaptïqa alläpam kushikïkuyaq”. Kë parëjaqa rikarqanmi, kë ichikllëlla grüpu, juk watallachö 24 publicadorkunayoq congregacionman tikranqanta. Gregorium nin: “Cristiänu mayïkuna kuyayämanqanqa shonqükunayaqmi chärishqa”. Joqta watapana yanapakurmi kënö niyan: “Mëtsikaq nunakunata Jehoväpa markanman yëkoqta rikarnin kushikunqantsikwanqa manam ni imapis igualantsu. Kananmi sïqa Jehovä munanqannö kawënïkunata provechëkäyä”.

“RIKARQÖMI JEHOVÄ ALLI KANQANTA”

Filipïnas nacionchöqa, Diospita yachatsikoqkunata mas wanayanqan markakunamanmi, cäsi kima waranqanö Testïgukuna ëwayashqa. 500 kaqqa soltëram kayan. Kärenpita parlarishun.

Kärenqa 25 watayoqmi, Baggao (Cagayan) markachömi winashqa. Jövin këninman chärirmi Jehoväpaq masta rurëta munanqanman pasëpa yarparaq. Kënömi willakun: “Nunakuna Jehoväpita yachakuyänampaq tiempu ushakëkanqantana musyarmi, yachatsikoqkunata mas wanayanqan sitiukunachö yanapakïta munaq kä”. Wakin familiankunaqa niyarqan, Diospita yachatsikoq juk lädu sitiukunapa ëwanampa rantin universidäman ëwanampaqmi, peru Kärenqa Jehovämanmi mañakurqan y karu sitiuchö yanapakoq cristiänu mayinkunawanmi parlarqan. Tsëpitanam akrarirqan wayimpita 64 kilömetru caruchu këkaq sitiuman yanapakoq ëwakunampaq. Tsë witsampaqqa 18 watayoqmi karqan.

Kären ëwanqan takshalla congregacionqa, Filipinaspa Inti yarqamunan kaq läduchö kekaq costa markakunachömi yachatsikun. Kärenmi yarpan: “Baggao markapita mushoq congregacionnïman chayänäpaqqa kima junaqtaran chakipa ëwayarqä. Jirkakunata witsarkur urarkurmi ëwayarqä, y kima chunkapitapis mastam mayukunatapis tsimpayarqä. Bibliata estudiaq wakin nunakunamanqa joqta hörataran yachatsiyänapaq ëwayäna, tsëchömi quedakuyä y waräninran kutiyämö”. ¿Allitaku rurëkäyan? Kärenmi asikur kënö nin: “Höraqa chakïkuna alläpam nanäman, peru hasta 18 nunakunatam Bibliapita yachatsishqa kä. Rikarqömi Jehovä alli kanqanta” (Sal. 34:8).

“JEHOVÄMAN MARKÄKÏTAM YACHAKURQÄ”

Chusku chunka watayoqpita ichik maslla Sukhi jutiyoq panim Estädus Unïduspita Filipïnasta ëwakurqan. ¿Imanirtaq markanta jaqirir ëwakurqan? 2011 watachömi ishkë junaq kaq asamblëaman ëwarqan y tsë asamblëachömi juk casädu parëjata tapuyarqan. Tsë parëjaqa willakurqan, Mëxicuchö yachatsikuyänanrëkur cäsi llapan kayäpunqankunata rantikïkuyanqantam. Sukhim yarpan: “Willakayämunqanqa pensaratsimarqan Jehoväpaq rurëta mana pensanqäkunamanmi”. Filipïnas nacionchö panjabï idiömachö yanapakïta wanayanqanta musyarirmi, yanapakoq ëwakurqan, porqui pëqa india kastapitam karqan. ¿Imakunatataq ruranan karqan ëwakunampaq?

Sukhim nin: “Cösasnïkunata rantikur imakunawan quedakunäpaqmi decidinä karqan. ¡Tsë rurananqa alläpa sasam (ajam) karqan! Jinamampis, 13 watapa alli wayichö kawarirmi, familiä kaqta ëwakurqä y tsëchöqa alläpa kichkichömi tärarqä. Manam fäciltsu karqan, peru sencïllulla kawakunäpaqmi yanapamarqan”. ¿Filipïnasman chärir imakunapataq pasarqan? Kënömi nin: “Kurukunatam alläpa mantsarqä y familiatam alläpa llakirqä. Peru imëpitapis masmi Jehoväman markäkïta yachakurqä”. ¿Allipaqtsuraq karqan? Sukhiqa kushishqam kënö nin: “Jehovämi awnimantsik: ‘Probaralläyämë, mä manakush ciëlupa punkunkunata kichar mana imapis pishipuyäshunqëkiyaq qamkunaman bendicionta ramamushaq’ nir. ¡Tsënö ninqanqa rasun kaqllam! Tsëtaqa rikä tapukïninkunata contestanäpaq nunakuna kutimï niyämaptinmi. Nunakuna Jehoväta reqiyänampaq yanapëta puëdinqäpitaqa alläpam kushikö” (Mal. 3:10). Tsëpitanam nin: “Rasumpa kaqchöqa mas sasaqa (ajaqa) karqan wayïpita yarqunanmi. Tsëta rurarirqa, rikärirqä Jehovä imanö llapanta ruranqantam”.

“TRABÄJÜTAQA JAQIRIRQÄMI”

Cäsi chusku chunka watayoqnöna Sime jutiyoq wawqim Filipïnaspita ëwakurqan Asiapa sur este kaq lädumpa alli trabäjuta taririrnin. Tsëchö këkarmi congregacionkunata watukaq wawqipa yanapakïninta chaskirqan y Jehoväpa Testïgunkunata Pushaqkunachö yanapakoq wawqipa juk discursunta wiyarqan. Kawëninchöqa Jehoväpa kaqta puntaman churëtam munarirqan. Simem nin: “Trabäjüta jaqitaqa pasëpam mantsaq kä”. Tsënö këkaptimpis trabäjunta jaqirirmi Filipïnasta kutikurqan. Kananqa warmin Haideewan ishkanmi tsë nacionpa sur kaq lädunchö këkaq Davao del Sur nishqanchö yanapakuyan, tsëchöqa alläpam wanëkuyan Diospita yachatsikoqkunata. Simem nin: “Punta kawënïman yarparqa, alläpam kushikö, porqui trabäjütaqa jaqirqämi y Jehoväpa kaqtam puntaman churarirqä. ¡Tsë rurënöqa manam imapis kantsu!”.

“KUSHISHQATAM KATSIYÄMAN”

Kima chunkapita ichik mas watayoq, Ramïluwan Juliet casädu precursorkunam musyariyarqan wayinkunapita 30 kilömetruchö këkaq congregacion yanapakïta pasëpa wanëkanqanta. Llapan semänakunam tamyaptin o räyukuna pashtëkaptimpis mötunkunawan reunionman y yachatsikoqpis ëwayan. Warkuraq tsakakunapa tsimpayänan kaptin y alläpa feyu carretërakunapa ëwayänan kaptimpis manam rurëkäyanqampita arrepentikuyantsu. Ramïlum nin: “Ishkäkunam 11 nunakunata Bibliapita yachëkätsiyä. Yachatsikoqkunata wanayanqan sitiukunachö yachatsikïqa alläpa sasaraqmi (ajaraqmi) peru alläpa kushishqatam katsiyäman” (1 Cor. 15:58).

¿Musyëta munankiku mëchö yachatsikoqkunata mas wanayanqanta y ëwanëkipaq imata ruranëkipaq kaqta? Tsëqa congregacionkunata watukaq wawqiwan parlë, y leyi Diospita Yachatsikunapaq 2011 watapa agostu killanchö yarqamoq “¿Macedoniaman yachatsikoq ëwankimantsuraq?” nishqan yachatsikïta.