¿Imanötaq shuyarar sïguikashwan?

1. ¿Imanirtaq pacienciantsikta oqrarishwan?

MUSHOQ Gobiernuta 1914 watachö Jehovä patsäratsinqampita patsëmi, Satanaspa mana alli mundunqa ushakëninman chëkanna. Ciëluchö guërra kariptinmi Jesusqa Satanastawan demoniunkunata Patsaman weqaparkamurqan (leyi Apocalipsis 12:7-9). Bibliaqa willakun ‘pocu tiempullachöna’ Satanas ushakänampaq kaqtam (Apoc. 12:12). Tsënö kaptimpis, tsë tiempuqa cäsi pachak watakunanönam pasarishqa. Tsëmi Diosta sirweqkunaqa wakinqa itsa pensayanman ushakë tiempuqa alläpa demorëkanqanta. ¿Pacienciantsikta oqrarquntsikku ushakëta Jehovä apamunampaq kaqta shuyararnin?

2. ¿Imatataq kë yachatsikïchö rikäshun?

² Pacienciannaq këqa mana alli rurëkunamanmi chätsimashwan. ¿Imaraq yanapamäshun pacienciawan shuyarëkänapaq? Kë yachatsikïmi contestanqa kë tapukïkunata: 1) ¿Imatataq yachakushun Miquëas pacienciayoq kanqampita? 2) ¿Imakuna pasakunqantaq rikätsimäshun manana shuyaränapaq kaqta? 3) ¿Imanötaq agradecikushwan Jehovä pacienciayoq kanqanta?

¿IMATATAQ MIQUËASPITA YACHAKUNTSIK?

3. ¿Imanötaq israelïtakuna këkäyarqan Miquëaspa tiempunchö?

³ Miquëasqa rikarqanmi mana alli rey Acaz mandakuptin israelïtakuna pasëpa mana alli tikrakuriyanqanta (Miq. 7:2-6). Y nirqanmi Diospita rakikaq israelïtakunaqa imëka kashanö tikrakurishqa kayanqanta. Imanöllam yataqnin kaqkunataqa kasha tukshir ushan, tsënöllam kë mana alli israelïtakunapis pëkunaman junta kaqkunataqa mana allita rurayaq. Hasta familian kaqkunatapis mana kaqpaqmi churayaq. Tsënö kayanqan manana altsakänanta musyarmi Miquëasqa Jehoväta willarqan y pacienciawan shuyararqan imatapis ruramunampaq kaqta. Y segürum karqan imë höra karpis Jehovä juzgamunampaq kaqta.

4. ¿Ima mana allikunapataq pasantsik

⁴ Miquëaspa tiempunchönöllam, kanampis kikinkunallapaq imatapis munaq nunakunawan juntu kawantsik. Atskaqmi “agradesiquita mana yachaq, Teyta Diospa yachatsiquininta mana cäsoq” y mana llakipäkoq kayan (2 Tim. 3:2, 3). Llapantsiktam llakitsimantsik vecïnuntsikkuna, estudiaq y trabajaq mayintsikkuna imatapis kikinkunallapaq munayanqanta rikëqa. Peru Jehoväpa wakin sirweqninkunaqa mas mana allikunapam pasayan. Jesusmi nirqan qateqninkunataqa familiankuna chikiyänampaq kaqta, y Miquëas 7:6 textuchö ninqannömi kënö nirqan: “Noqaman marcäcuyanqanrecurmi papäninpa contran tsurin canqa, warmi wawanmi mamanpa contran y llumtsininnam suegranpa contran canqa. Tseno chiquishqam cayanqui castequicunapita qallecur” (Mat. 10:35, 36). ¡Mana creikoq familiakuna burlakuyaptin tsarakïqa manam fäciltsu! Tsënö pruëbakunapa pasarqa ama familiantsikkuna niyanqankunata cäsushuntsu. Tsëpa rantinqa, Jehovällapaq imëpis këkäshun y pacienciawan shuyaräshun Jehovä imata karpis rurananta. Yanapamänapaq mañakushqaqa alli tsarakunapaqmi kallpata qomäshun.

5, 6. ¿Mëqan profecïa cumplikaqtataq Miquëas rikarqan, y mëqantataq rikarqantsu?

⁵ Miquëas pacienciawan shuyaranqanqa allipaqmi karqan. Acaz y mana alli mandakïnin imanö ushakanqantam rikarqan, jina rikarqanmi kë reypa tsurin Ezequïas mandakoq yëkurir rasumpa kaq adoracionta yapë patsätsinqanta. Jinamampis Samaria ushakänampaq willakunqanqa cumplikärirqan Israelpa chunka kastankunaman asiriukuna yëkuriyaptinmi (Miq. 1:6).

⁶ Peru Miquëasqa Dios revelaptin willakunqankuna cumplikaqtaqa wakin wakinllatam rikarqan. Kënö nir qellqanqanman pensarishun: “Ushanan junaqkunachömi Jehoväpa wayin këkaq jirka alleq patsakashqa kanqa llapan jirkakuna janampa, y ichisaq jirkakuna janampam kanqa, y tsëmanmi markakuna ëwayanqa. Më tsë nacionkunapitam nunakuna ëwayanqa y niyanqa: ‘Shayämï y witsäshun Jehoväpa jirkanman[’]” (Miq. 4:1, 2). Kë profecïa cumplikaqta manana rikashqa karpis y wakinkuna imëkata rurakuyaptimpis, Jehoväta mana jaqipa sirwinampaqmi Miquëasqa decidishqa karqan. Tsëmi kënö nirqan: “Llapan markakunam diosninkunapa jutinchö puriyanqa, peru noqantsikqa Jehovä Diosnintsikpa jutinchömi purishun imëkamayaqpis” (Miq. 4:5). Miquëasqa, Jehovä llapan awnikunqanta cumplinanman markäkurmi pacienciawan shuyararqan. Awmi, kë profëtaqa Jehovämanmi markäkurqan.

7, 8. a) ¿Imanirtaq Jehoväman markäkushwan? b) ¿Imata rurashqataq tiempu raslla pasarinqa?

⁷ ¿Noqantsikpis pënöku Jehoväman markäkuntsik? Alleqmi musyantsik Miquëas willakunqankunaqa llapan cumplikanqanta. Kë ‘ushanan junaqkunachöqa’, më tsë nacionkunapita y kastakunapitam imëka idiöma parlaq nunakuna “Jehoväpa wayin këkaq jirka[man]” shayämushqa. Mëtsikaqmi chikinakoq nacionkunapita kayashqa, peru tsënö këkarpis ‘espädankunatam takllapa puntanman tikratsiyashqa’ y manam guërrapaq yachatsiyänanta munayashqatsu (Miq. 4:3). ¡Rasumpa kuyanakoq Jehoväpa sirweqninkunawan këqa alläpa kushikïpaqmi!

⁸ Kë mana alli munduta Jehovä ushakätsinanta munanqantsikqa allillam. Peru tsë junaq chämunqanyaq pacienciawan shuyaränapaqqa, kikin Jehovä rikanqannömi rikëta yachakunantsik. Pëqa juk junaqtam patsätsishqa nunakunata Jesus juzganampaq (Hëch. 17:31). Peru tsëta manaraq rurarmi, “rasonpa caq yachatsiquicunata” musyarir yachakuyanqanmannö kawayänampaq nunakunata tiempun qoykan (leyi 1 Timoteu 2:3, 4). Rasumpa kaqkunata nuna mayintsikta yachatsirnin ocupädu kashqaqa, tiempuqa rasllam pasarinqa. Itsa ichikllachöna Jehoväpa piñakïnin junaq chäramunqa. Y tsënö kaptinqa, Diospita yachatsikurnin ocupädu kashqa kanqantsikta musyarnin imaraq kushikïkushun

¿IMAKUNATAQ RIKÄTSIMÄSHUN MANANA SHUYARÄNAPAQ KAQTA?

9-11. ¿Cumplirishqanaku 1 Tesalonicensis 5:3 textuchö willakunqan?

⁹ (Leyi 1 Tesalonicensis 5:1-3a.) Ichikllachönam, “¡yamënam y segürunam kawakuntsik!” niyanqa. Tsënö niyänampaq kaqta alkäbulla këkänapaqqa 1 Tesalonicensis 5:6 textuchö Pablu kënö ninqantam wiyakunantsik: “Mäcoq mäcoq[mi] quecanantsic, y manam punucashqa nunacunanotsu canantsic”. Tsëta niyänampaq puntata imakuna pasakïkanqanta yapë yachakunqantsikmi yanapamäshun mäkoq mäkoqlla këkänapaq.

¹⁰ Ishkan jatusaq guërrakuna cada ushariptinmi nacionkunaqa yamëna kawakïta munayanqanta niyarqan. Punta kaq guërra ushariptinmi Liga de Nacionis nishqanta patsätsiyarqan guërra mana kananta munar. Ishkë kaq guërra ushariptinnam, Nacionis Unïdas nishqanman nunakuna markäkuyarqan (yärakuyarqan). Mandakoq autoridäkuna y pushakoq religiösukunam, kë ishkan organizacionkuna alli kawakïta apamunampaq kaqman alläpa markäkuyashqa. Tantiyarinapaq, Nacionis Unïdasmi, bombukunata y platïllukunata tocar 1986 watapaq niyarqan, Llapan Nacionkuna Yamë Kawakuyanqan Wata kanqanta. Tsë watachömi, mëtsika nacionpa pushaqninkuna y religiösukuna juntakäyarqan Italiapa Asis nishqan markanchö Catölicukunapa pushaqninwan yamë kawakïpaq llapankuna Diosman mañakuyänampaq.

¹¹ Yamënam y segürunam kawakushun niyanqan o maskunata niyanqampis, 1 Tesalonicensis 5:3 textu willakunqanqa manaran cumplikashqaraqtsu. ¿Imanir? Porqui “illaqpita chipyëpa ushakëqa” manaran pasakushqaraqtsu.

12. ¿Imatataq musyantsik “Yamënam y segürunam kawakuntsik” niyanqan willakïpita?

¹² ¿Pikunaraq “yamënam y segürunam kawakuntsik” niyanqa? ¿Imataraq rurayanqa mana alli religionkunapa pushaqninkuna? ¿Imanöraq yanapakuyanqa llapan nacionpa pushaqninkuna tsë willakïchö? Bibliaqa manam willakuntsu. Peru musyantsikmi, rasumpatanö willakuyaptimpis ulikïlla (llullakuylla) kanampaq kaqta. Kë mana alli munduqa Satanaspa makinllachömi sïguikanqa. Tullunpa urusninyaqmi (toqshunyaqmi) ismushqa këkan y tsënöllam sïguikanqa. Tsëmi alläpa llakinëpaq kanman mëqantsikllapis Satanaspa engäñunman y mundun ninqanman ishkirinqantsikqa.

13. ¿Imanirtaq angelkuna ushakätsikoq vientukunata tsaparëkäyan?

¹³ (Leyi Apocalipsis 7:1-4.) 1 Tesalonicensis 5:3 textu cumplinqanta shuyaranqantsikyaqqa, puëdeq angelkunam tsaparëkäyan alläpa jipakï (ñakay) tiempu apamoq vientukunata. ¿Imanirtaq tsaparëkäyan? Ciëlupaq akrashqakuna chipyëpa segurakärir ciëluta ëwakuyänantam shuyarëkäyan, y tsëtam Juanqa willakurqan.b Tsëpitanam angelkunaqa ushakätsikoq vientukunata kachëkayämunqa. ¿Imaraq tsëpitaqa pasakunqa?

14. ¿Imataq rikätsimantsik Jatungarë Babiloniapa ushakënin këllachöna kanqanta?

¹⁴ Jatungarë Babilonia o llapan mana alli religionkunaqa chipyëpam ushakärinqa. Rikëkantsiknam ushakënin këllachöna këkanqanta, y ‘jinantin marcacunaman y tuquilaya idioma parlaq nunacunaman’ markäkuptimpis manam ni imanöpa yanapayanqatsu (Apoc. 16:12; 17:15-18; 18:7, 8, 21). Rasumpam, religionkunapaq y pushaqninkunapaqpis pasëpa mana allitanam noticiakunachö parlayan, tsëmi rikätsikun yanapaqninkuna ushakëkäyanqantana. Tsënö këkaptimpis, Jatungarë Babiloniapa pushaqninkunaqa manam ni ichikllapis yarpakachäyantsu. ¡Imanö pantakashqam këkäyan! “¡Yamënam y segürunam kawakuntsik!” nishpa willakarayämuptinmi, Satanaspa makinchö këkaq gobiernukunaqa illaqpita mana alli religionta chipyëpa ushakätsiyanqa. Tsëkuna cumplikänampaq kaqta pacienciawan shuyaranqantsikqa allipaqmi kanqa (Apoc. 18:8, 10).

¿IMANÖTAQ AGRADECIKUSHWAN JEHOVÄ PACIENCIAYOQ KANQANTA?

15. ¿Imanirtaq Jehoväqa jutinta rasllaqa santuyätsishqatsu?

¹⁵ Nunakuna jutinta alläpa rakchatashqa kayaptimpis, Jehoväqa pacienciawanmi shuyarashqa jutinta santuyätsinampaq kaqta. ¿Imanir? Porqui manam munantsu ni jukllëllapis alli shonquyoq nunakuna wanuyänanta (2 Pëd. 3:9, 10). ¿Tsënöllaku noqantsikpis rikantsik? Manaraq ushakë chämuptin, pacienciayoq kanqampita agradecikunqantsiktaqa rikätsikushun kë qateqnin kaq pärrafukuna ninqanta rurarninmi.

16, 17. a) ¿Imanirtaq Jehoväpa kaqchö qelanëkaqkunata yanapashwan? b) ¿Imanirtaq precisan Jehoväpa kaqchö qelanashqakuna Jehoväman kutiyänan?

¹⁶ Jehoväpa kaqchö qelanashqakunata yanapashun. Oqrakashqa üshata taririyaptin, ciëluchö alläpa kushikuyanqantam Jesusqa nirqan (Mat. 18:14; Lüc. 15:3-7). Rasumpam, Jehoväqa alläpam yarparan jutinta kuyaq kaqkunapaqqa, hasta kanan tiempu mana sirwikaqkunapaqpis. Diospa markanman kutiyämunampaq yanaparqa, yanapakïkantsik Jehoväwan angelninkuna kushikuyänampaqmi.

¹⁷ ¿Qampis Jehoväpa kaqchö qelanashqaku këkanki? Itsa juk cristiänu mayiki piñatsishushqa kashuptiki reunionkunam ëwankinatsu. ¿Atska watanaku tsëpita pasarishqa? Tsënö kaptinqa tapukï: “¿Kananqa mas allinaku kawakö? ¿Mas kushishqaku këkä? ¿Jehoväku piñatsimarqun o juk jutsasapa nunaku? ¿Imëllapis Jehoväqa mana allipaku tratamashqa?”. Rasumpa kaqchöqa, Jehoväqa alläpam kuyamantsik. Pëllata sirwinapaq awninqantsikta mana cumplishqapis imëkata qomarnintsikmi kushitsimantsik (Sant. 1:16, 17). Peru ama qonqashuntsu, Jehoväpa piñakïnin junaqqa këllachöna kanqanta. Kananmi kuyakoq Teytantsik Jehoväman y markanman kutinantsik tiempuqa, tsëllam tsapämäshun ushanan junaqkunachö (Deut. 33:27; Heb. 10:24, 25).

18. ¿Imanirtaq congregacionta pushaqkunata yanapashwan?

¹⁸ Congregacionta pushaqkunata yanapashun. Kuyakoq Mitseq karmi Jehoväqa pushamantsik y tsapämantsik. Tsëmi üshankunapaq juk Precisaq Mitseqnin churashqa, Jesusta (1 Pëd. 5:4). Mëtsikaq anciänukunam, pachak waranqapitapis mas congregacionkunachö cristiänu mayinkunata cada ünuta entëru Patsachö cuidëkäyan (Hëch. 20:28). Congregacionta pushaqkunata yanaparninqa, Jehoväwan Jesus noqantsikpaq imëkata rurayämunqanta agradecikunqantsiktam rikätsikïkantsik.

19. ¿Imanirtaq mas juntu këkashwan?

¹⁹ Imëpis juntu këkäshun. ¿Imanötaq rurashwan? Alli yachatsishqa tröpata chikeqninkuna ushakätsita munayaptinqa, llapan soldädukunam chipyëpa juntakäriyan. Tsënöpam chikeqninkunaqa yëkïta mana puëdir ushakätsita puëdiyannatsu. Jina tsënöllam, Diospa markantapis Satanasqa ushakätsita mas procuran. Tsëmi kananqa, pipis piñaratsimashqa piñashqa kakunantsik tiemputsu, sinöqa juntu kanantsik, perdonanakunantsik y Jehoväpa markan pushamänata jaqinantsik tiempum.

20. ¿Imatataq kanan witsan rurëkänantsik?

²⁰ Llapantsikmi Diospa kaqchö mäkoq mäkoq y ‘salvamaqnintsik Diosllaman shuyarar’ këkänantsik. Pacienciawan shuyarëkäshun, “¡Yamënam y segürunam kawakuntsik!” neq willakïta y ciëlupaq akrashqakuna chipyëpa segurakärir ciëluta ëwakuyänanta. Tsënam chuskun angelkuna ushakätsikoq vientukunata kacharayämunqa y Jatungarë Babiloniam chipyëpa ushakärinqa. Tsëkuna pasakunanta shuyaranqantsikyaqqa, Jehovä markanta pushanampaq churanqan nunakunata casukïkäshun. Diablupita y demoniunkunapita defendikunapaq, imëpis juntu këkäshun, y Salmu qellqaqpa consëjunta sïguikäshun: “Qamkuna llapëki Jehoväta shuyarëkaqkuna kallpata tsariyë, y shonqïkikuna sinchi katsun” (Sal. 31:24).