BIBLIAPITA TAPUKÏKUNA

¿Imanötaq Diosqa?

Diosqa mana rikakoq espïritum. Pëmi kamarqan ciëlukunata, Patsata y llapan kawëyoq kaqkunata. Pëtaqa manam pipis kamarqantsu, y imë kawar qallanqampis manam musyëtsu (Salmu 90:2). Llapan nunakuna ashiyänanta, y pëpita rasumpa kaqta musyayänantam Diosqa munan. (Leyi Hëchus 17:24-27.)

Diospaqa jutin kanmi, y imëka kamanqankunata rikarninmi Pë imanö kanqantaqa musyantsik (Romänus 1:20). Peru mas alleq reqinapaqqa, Palabran Bibliatam yachakunantsik. Tsënöpam musyashun Pë imanö kanqanta. (Leyi Salmu 103:7-10.)

¿Imanötaq mana alli rurëkunata rikarnin Dios sientikun?

Jehoväqa mana alli rurëkunataqa chikinmi, y imanö këninta rikätsikuyänampaqmi nunakunataqa kamarqan (Deuteronomiu 25:16). Tsëmi, imëka mana allikunata rurayaptin noqantsikpis piñakuntsik. Diosqa manam culpayoqtsu tsëkuna pasakunqampita. Pëqa imatapis libri akrakuyänampaqmi nunakunata rurashqa. Peru mëtsikaq nunakunam mana cabeqkunata rurarnin libri këninkunata mana allipaq utilisäyan. Tsëkuna pasakoqta rikarmi Jehoväqa alläpa llakikun. (Leyi Genesis 6:5, 6 y Deuteronomiu 32:4, 5.)

Jehoväqa alli rurëkunata kuyarninmi mana alli rurëkuna imëyaqpis kanantaqa permitinqatsu (Salmu 37:​28, 29). Ichikllachöna tsë mana alli rurëkunata ushakätsinampaq kaqtam Bibliaqa willamantsik. (Leyi 2 Pëdru 3:7-9, 13, NM.)