¿Imëtan Diospa gobiernunchö Jesus gobernar qallarqan? (1 kaq)

MASTA MUSYANËKIPAQ YACHAKUR SÏGUI

Juliu: Buenos dias Ernestu, Bibliapita qamwan parlëqa alläpam gustaman.a ¿Yarpankiku pasaq semänachö Diospa Gobiernumpaq tapumanqëkita? “¿Imanirtan Jehoväpa testïgunkunaqa niyanki 1914 watachö gobernar qallanqanta?” nirmi tapumarqëki.

Ernestu: Awmi, qarayämanqëki revistachömi Diospa Gobiernunqa 1914 watachö gobernar qallanqanta leyirqö, tsëmi tsëpita masta musyëta munä. Qamkunaqa llapan creiyanqëkipis Bibliachö këkanqantam niyanki.

Juliu: Awmi, llapan creiyanqäpis Bibliachömi këkan.

Ernestu: Noqapis llapan Bibliatam leyirqö, peru manam tsë watata Bibliachö tarirqötsu. Tsëmi Internetchö Bibliaman “1914” nir churarqö, peru tsëchöpis manam ima yarqamushqatsu.

Juliu: Ishkëchö allita ruranqëkipitam felicitäreq. Puntataqa, llapan Bibliata leyinqëkipita. Qamqa alläpam Bibliata valoranki.

Ernestu: Awmi, noqapaqqa manam Biblianöqa ima librupis kantsu.

Juliu: Tsëqa rasunmi. Ishkë kaqchönam, musyëta munanqëkita Bibliachö ashinqëkipita felicitaq. Qamqa Bibliachö ninqannömi masta musyanëkipaq yachakur sïguirqunki.b ¡Tsëta ruranqëkiqa alläpa allim!

Ernestu: Gracias Juliu. Noqaqa imatapis masmi yachakuyta munä. Masta musyëta munarmi yachakuykanqantsik libruchö 1914 watapaq willakunqanta tarirqö. Tsëchömi leyikarqö juk jatun montita o qeruta mutuyanqampaq, tsë monti yapë winanqampaq... y maskunapaq willakunqanta.

Juliu: Awmi, tsëchöqa Daniel librupa 4 kaq capïtulunchö willakunqampaqmi parlan. Y tsëchöqa Babiloniachö gobernaq Nabucodonosor suëñunqampaqmi willakun.

Ernestu: Awmi, tsëtam rikëkarqö. Peru atska kuti leyirpis, Diospa Gobiernumpaq willakunqanta y 1914 watapaq willakunqantaqa manam allillaqa entiendirqötsu.

Juliu: Ama yarpachakuytsu. Tsëta qellqaq Diospa willakoqnin Danielpis manam ima ninan kanqanta entiendirqantsu.

Ernestu: ¿Rasumpa?

Juliu: Awmi. Tsëta rikärinapaq Daniel 12:8 ninqanta leyirishun, kënömi nin: “Peru noqaqa manam tsënö ninqanta entiendirqätsu”.

Ernestu: Noqaqa, noqalla mana entiendinqätam pensarqö. Kananqa mas tranquïlunam sientikü.

Juliu: ¿Musyankiku Danielpis imanir mana entiendinqanta? Tsë witsanqa, manam tiempuraqtsu karqan tsëkunata entiendiyänampaq. Peru tsëqa cambiashqanam. Kananqa puëdintsiknam Daniel willakunqanta entiendita.

Ernestu: ¿Awku?

Juliu: Awmi, leyinqantsikpa qateqninchömi tsëta willakun. 9 kaqchömi kënö nin: “Tsë wiyanqëkikunaqa ushanan tiempuchöraqmi musyakanqa y tsë tiempuyaqmi alli segurashqa kanan”. Këchö ninqannöpis, Daniel willakunqantaqa ushanan tiempuchöran entiendiyänan karqan. Y imëka pasëkanqanmi rikätsikun ushanan tiempuchöna kawëkanqantsikta. Kë yachakuykanqantsik libruchömi tsëpita masllata yachakushun.c

Ernestu: ¿Entiendiratsimankimanku Daniel willakunqanta?

Juliu: Awmi, shumaq entienditsinaqpaqmi kallpachakamushaq.

NABUCODONOSOR SUËÑUNQAN

Juliu: Puntataqa gobernanti Nabucodonosor suëñunqampita parlarishun, tsëpitanam ima ninan kanqanta yachakurishun. ¿Alliku kanman?

Ernestu: Allim kanqa.

Juliu: Nabucodonosorqa ciëluyaq chaq jatun montitam o qerutam suëñurqan. Y suëñunqanchömi wiyarqan Diospa willakoqnin tsë montita mutuyänampaq mandakunqanta. Tsëmi tsë montipa watsinllana o matsunllana y troncunllana quedarqan. ‘Qanchis tiempukuna’ pasariptinnam tsë montiqa yapë winarqan.d Tsë willakunqanqa kikin Nabucodonosorchömi puntata cumplikarqan. Pëqa alläpa puëdeq gobernanti karmi ciëluyaq chaq montinö karqan. Peru tsë montita mutuyanqannömi, pëpis ‘qanchis tiempukunapa’ mutushqanö karqan. ¿Yarpankiku tsë ima ninan kanqanta?

Ernestu: Mmm... manam yarpätsu.

Juliu: Bibliachömi willakun löcu tikranqanta, y capazchi qanchis watapa o ‘qanchis tiempukunapa’ tsënö karqan. Tsënö këkarqa manachi gobernanti këta puëdirqantsu. Tsënö kaptimpis, qanchis wata pasariptinqa, juiciunman kutirmi yapë gobernarqan.e

Ernestu: Mmm... entiendikänam. Peru Diospa Gobiernumpaq y 1914 watapaq parlëkarqa, ¿imanirtan tsëkunapaq parlëkantsik?

Juliu: Daniel willakunqanqa ishkë kutim cumplikarqan. Puntataqa Nabucodonosor manana gobernanqan witsanmi cumplikarqan. Ishkë kaqchönam, Teyta Dios manana gobernanqanchö y Diospa Gobiernunchö cumplikan.

Ernestu: ¿Imanötan musyanki Daniel willakunqanqa ishkë kuti cumplikanqanta?

Juliu: Daniel willakunqanmi tsëta musyanapaq yanapamantsik. Teyta Dios imanir tsëta musyatsikunqampaqmi Daniel 4:17 kënö willakun: “Tsënöpam nunakuna musyayanqa Llapanta Gobernaq Poderösu Dioslla Gobernanti kanqanta. Pëqa munanqan kaqtam pitapis gobernanampaq churan”. ¿Cuentata qokurqunkiku “Dioslla Gobernanti kanqanta” ninqanta?

Ernestu: Awmi, tsëchömi nikan “Llapanta Gobernaq Poderösu Dioslla Gobernanti kanqanta”.

Juliu: Awmi. Tsëmi rikätsikun Daniel willakunqanqa Nabucodonosorllachö mana cumplikanqanta. Sinöqa ‘Dioslla Gobernanti kanqanchö’ o nunakunata gobernanqanchöpis cumplikanqanta. Tsë willakunqampa qepanchö y puntanchö ninqampita yachakunqantsikmi, tsëta maslla entiendinëkipaq yanapashunki.

Ernestu: Tsëqa wiyarishqëki.

DANIEL LIBRUCHÖ IMAPAQ WILLAKUNQAN

Juliu: Daniel libruchöqa Diospa Gobiernun gobernar qallanqantam kutin kutin willakun. Juk cäsullata rikärishun. Tsëqa Daniel 2:44 ninqanchömi këkan. Tsëchö ninqanta leyirallämuy.

Ernestu: Yä, kënömi nin: “Tsë gobiernukuna gobernëkäyanqan witsanmi, ciëluchö Teyta Diosqa juk gobiernuta churamunqa. Tsë gobiernutaqa manam ni pï ushakätsinqatsu, ni manam pëpa rantin juk markakunapita gobernantikuna gobernayanqatsu. Tsë gobiernuqa, wakin gobiernukunatam llapanta ushakätsinqa y pëllam imëyaqpis gobernanqa”.

Juliu: ¿Ima ninkitan? ¿Tsëchöqa Diospa Gobiernumpaqtsuraq parlëkan?

Ernestu: Mmm... Manam allillaqa musyätsu.

Juliu: Leyimunqëkichömi willakun tsë gobiernuqa ‘imëyaqpis gobernanampaq’ kaqta. Mana Teyta Dios karqa, ¿piraq tsënö atska tiempupa gobernëta puëdinman?

Ernestu: Manachi pï nunapis puëdinmantsu.

Juliu: Rasunmi. Diospa Gobiernumpaq juk masta willakunqanta rikärishun. Tsëqa Daniel 7:13, 14 ninqanchömi këkan. Tsëchömi willakun juk nuna gobernanti tikranampaq kaqta. Kënömi nin: “Pëtam churarqan mëtsë markakunachö y nacionkunachö nunakuna respetayänampaq, gobernantinkuna kanampaq y imëkatapis poderninchö katsinampaq. Pëllam imëyaqpis gobernanqa y [gobiernunqa] manam imëpis ushakanqatsu”. Kë leyinqantsikchöqa yapëmi puntata parlanqantsikllapaq parlëkan.

Ernestu: Awmi, juk gobiernupaqmi parlëkan.

Juliu: Rasunmi. Peru manam lluta gobiernullapaqtsu parlëkan. Leyinqantsikchömi willakun tsë gobiernuqa, “mëtsë markakunachö y nacionkunachö nunakuna[ta]” gobernanampaq kaqta. Juknöpa nishqaqa, entëru Patsata gobernanampaq kaqta.

Ernestu: Manam cuentata qokurqötsu, peru rasunllatam ninki. Tsënömi nikan.

Juliu: Yapë rikärishun tsëchö ninqanta: “Pëllam imëyaqpis gobernanqa y [gobiernunqa] manam imëpis ushakanqatsu”. ¿Manaku këchö ninqanqa Daniel 2:44 ninqanwan igualan?

Ernestu: Awmi, tsëchö ninqannöllam këkan.

Juliu: Kananqa këyaq yachakunqantsikta yarpärishun. Daniel librupa 4 kaq capïtulunchö willakunqanqa, “Llapanta Gobernaq Poderösu Dioslla Gobernanti kanqanta” nunakuna musyayänampaqmi. Tsëmi rikätsikun Daniel willakunqanqa Nabucodonosorpita mas puëdeq gobernantichö cumplikanqanta. Manam tsëllatsu, Daniel libruchö wakin willakunqampis Diospa Gobiernun imë gobernar qallanqantam rikätsikun. ¿Ima ninkitan? ¿Manaku tsë llapanqa rikätsikun Daniel librupa 4 kaq capïtulunchöqa Diospa Gobiernumpaq parlëkanqanta?

Ernestu: Awmi, tsënömi. Peru manam entiendiraqtsu 1914 watachö gobernar qallanqanta imanir niyanqëkita.

QANCHIS TIEMPUKUNA PASAN

Juliu: Gobernanti Nabucodonosorpaq yapë parlarishun. Punta cumplikanqanchöqa pëmi Daniel willakunqanchö jatun monti karqan. Tsë montita mutuyanqannömi Nabucodonosorqa löcu tikrarnin qanchis tiempukunapa gobernarqantsu. Peru tsë tiempu pasariptinqa juiciunman kutirmi yapë gobernarqan. Ishkë kaqchönam, Teyta Dios gobernar sïguirqannatsu, peru tsëqa manam mana allita rurashqa kaptintsu pasarqan.

Ernestu: ¿Imanötan tsëqa karqan? Manam entiendïtsu.

Juliu: Unë witsanqa, Israelchö gobernaqkunapaqmi niyaq Jehoväpa “gobernar täkunanman jamëkur” gobernayanqanta.f Tsënöqa niyaq Diospa jutinchö gobernayaptinmi. Juknöpa nishqaqa, pëkunapa gobiernunmi Dios gobernëkanqanta rikätsikoq. Tsënö kaptimpis, atskaq gobernaqkunam Diospa contran churakäyarqan y wakin israelïtakunapis pëkunanöllam rurayarqan. Tsëmi Teyta Diosqa, Jesus manaraq shamuptin 607 watachö Babiloniapita nunakuna Israelta duëñutsakuyänanta permitirqan. Tsë tiempupitam Jerusalenchöqa Jehoväpa jutinchö gobernaqkuna karqannatsu. Juknöpa nishqaqa, manam Teyta Dios gobernarqannatsu. ¿Entiendikanku?

Ernestu: Awmi, entiendikämi.

Juliu: Tsë qanchis tiempukunaqa Jesus manaraq shamuptin 607 watachömi qallarqan. Tsë tiempuchöqa manam Teyta Diospa jutinchö pï nunapis gobernarqantsu. Peru tsë tiempu cumpliriptinqa, jutinchö gobernanampaqmi ciëluchöna juk gobernaqta churarqan. Daniel libruchö wakin willakunqampis tsë tiempuchömi cumplikarqan. Peru ¿imëtan tsë qanchis tiempukunaqa usharqan? Tsëta musyarqa, Diospa Gobiernun imë gobernar qallanqantam musyashun.

Ernestu: Mmm... ¿1914 wataku karqan?

Juliu: Awmi Ernestu, tsë watam usharqan.

Ernestu: Peru ¿imanötan musyayanki tsë wata kanqanta?

Juliu: Mmm... Jesus Patsaman shamurqa tsë qanchis tiempukuna manaraq ushanqantam nirqan.g Tsëmi rikätsikun qanchis tiempukunaqa wallka tiempulla mana kanqanta. Tsë tiempuqa Jesus Patsaman shamunampaq atska tiempuraq pishikaptinmi qallarqan, y Jesus ciëluta kutikunqampita atska tiempu pasanqanchöran usharqan. Manam tsëllatsu, yachakunqantsiknöpis Daniel libruchö willakunqantaqa “ushanan tiempuchöraqmi” entiendiyänan karqan.h Y 1880 wata witsanmi Bibliata estudiaq juk grüpu nunakuna Daniel willakunqanta y Bibliachö mas willakunqanta alli estudiar qallëkuyarqan. Ichikllapa ichikllapam entiendiyarqan tsë qanchis tiempukuna 1914 watachö ushanampaq kaqta. Tsë witsampita imëka pasanqanmi rikätsikun tsë watachö Diospa Gobiernun gobernar qallanqanta y ushanan tiempu qallanqanta. Tsë llapanta entiendinanqa manam fäciltsu.

Ernestu: ¡Awmi! Tsëkunata alli entiendinäpaqqa yapëraqchi rikäshaq.

Juliu: Allim kanqa. Tsëkunata entiendinanqa manam noqapaqpis fäciltsu karqan. Peru ojalä kanan parlakunqantsik yanaparishunkiman Diospa Gobiernumpaq yachatsikuyanqäqa llapampis Bibliachö këkanqanta musyanëkipaq.

Ernestu: Awmi. Qamkunaqa Bibliachö ninqanmanmi alläpa confiakuyanki.

Juliu: Qampis Bibliachö ninqanmanmi tsënö confiakuyta munanki. Ninqaqnöpis tsë llapanta entiendinanqa manam fäciltsu y capazchi maskunataraq musyëta munanki. Kananmi yachakurquntsik qanchis tiempukunaqa Jesus manaraq shamuptin 607 watachö qallanqanta y Diospa Gobiernun imë gobernar qallanqanta musyanapaq yanapamänapaq kaqta. Peru ¿imanötan musyantsik tsë qanchis tiempukuna 1914 watachö ushanqanta?i

Ernestu: Tsëtaqa noqapis musyëta munämi.

Juliu: Bibliachö ninqanmi yanapamantsik tsë qanchis tiempukuna ëka tiempu kanqanta musyanapaq. ¿Allitsuraq yapë kutimuptï tsëpita parlakurishwan?j

Ernestu: Allim kanqa. Shuyëkashqëkim.