QARANCHÖ YACHATSIKÏPITA | ¿VENCISHWANTSURAQ ALLÄPA YARPACHAKÏTA?
Alläpa yarpachakïqa entëru Patsachömi kan
Zimbäbue nacionpita Paulmi kënö nin: “Mikï ranteqmi ëwarqä, peru gallëtallam karqan, ¡y alläpa chaniyoq! Y waräninqa manam karqannatsu”.
Estädus Unïduspita Janetmi kënö nin: “Jaqirayämänampaq kaqtam qowä nimarqan. Alläpam llakikurqä. ¿Imanöraq wamräkunata wätashaq?”.
Israelpita Alonam kënö nin: “Patrullërukuna waqaptinqa, rasmi ratakoq (tsinkakoq) ëwä y patsamanmi lätakïkö illapanakuyaptin. Pasariptimpis mantsakashqallam karkaryar këkä”.
Kanan witsanqa mas problëmakunam mirëkan. “Allapa sasa cawaqui tiempucuna” kaptin (2 Timoteu 3:1). Mëtsikaqmi yarpachakuyan qellërëkur, guërrakunarëkur, tukï qeshyakunarëkur y imëka desgraciakunarëkur. Wakinnam mantsayan, cancer qeshyayoq kayanqanta doctorkuna niyänanta. Y wakinqa wamrankunapa y willkankunapa kawëninkunarëkurmi yarpachakuyan.
Peru höraqa yarpachakï allillam. Tantiyarinapaq, exäminta rurar, nunakunapa puntanchö parlar y trabajanapaq patronwan parlarqa mantsapakuntsikmi. Jina alläpa yarpachakunqantsikqa peligrukunaman mana ishkinapaqmi yanapamantsik. Peru alläpa yarpachakïqa mana allimampis chätsimashwanmi. 68.000 mayor nunakunata doctorkuna exäminta rurayanqanchömi musyakashqa alläpa yarpachakïqa wanïman ras chätsikunqanta. Tsëchi Jesusqa nirqan: ‘¿Meqequicunataq yarpacachacur juc junaq mas cawarcuyanquiman!’. Awmi, manam yarpachakunqantsikrëkurtsu mas kawashun. Tsëmi, “ama yarpacachäyëtsu” neq consëju alläpa alli (Mateu 6:25, 27). Peru ¿alläpa yarpachakïnintsiktaqa vencita puëdintsikku? Awmi.
Tsëpaqqa këkunatam ruranantsik: Diostam mañakunantsik y änikïninkunamanmi markäkunantsik. Qateqninchömi rikäshun këkunata rurayanqan Paulta, Janetta y Alonata, alläpa yarpachakïninkunachö imanö yanapanqanta. Kanan höra tsë sasa tiempukunapa mana pasarpis, itsa shamoq tiempukunachöqa tsëkunapa pasashun.