¿Yarpankiku?

2019 wata Täpakoq revistakunachö yachatsikïkunata yarpar, ¿kë tapukïkunata contestëta puëdinkimantsuraq?

“Imëka armapis contrëki churakaqqa manam imanäshunkitsu” nir Dios änimanqantsikqa, ¿ima ninantaq? (Is. 54:17).

Imëka fuerti vientunö ushakätsikoq armakunapita Jehovä tsapämänapaq kaqtaqa segürum këkantsik (Is. 25:4, 5). Chikimaqnintsikkunaqa manam puëdiyanqatsu para siempri mana allikunata ruramënintsikta (w19.01, päginakuna 6, 7).

Cananeukunata y mana wiyakoq israelïtakunata tratanqanchö, ¿imanötaq rikantsik Diosqa llapantapis igualpa tratanqanta?

Melanëpaq lluta oqllanakïkunata rurayanqampita, warmikunata y teytannaq wamrakunata sufritsiyanqampitam Diosqa nunakunata castigarqan. Peru Pëta wiyakoqkunata y alli kaqta ruraqkunataqa bendicirqanmi (w19.02, päginakuna 22, 23).

Pipis mana Testïgu nuna nöpantsikchö Diosman mañakamuptinqa, ¿imatataq rurashwan?

Respëtuwanmi upälla quedakunantsik, peru manam “amen” nishuntsu ni manam mañakuyanqan höra makinkunata tsaräshuntsu. Mañakuyanqanyaqqa noqantsikpis shonquntsikllachömi mañakïta puëdintsik (w19.03, pägina 31).

¿Imanirtaq wamrakunata violëqa alläpa melanëpaq jutsa?

Wamrakunata violaqkunaqa wamratam mana allita rurayan, congregaciontam mana allichö quedatsiyan y autoridäkunapa y Diospa rikëninchömi alläpa melanëpaq jutsata rurayan. Wamrakunata violayanqanta autoridäkunaman denunciakïta puëdiyanqan nacionkunachöqa, anciänukunaqa tsë leyta wiyakurmi denunciakuyan (w19.05, päginakuna 9, 10).

¿Imatataq ruranantsik pensanqantsikta cambianapaq?

Kë precisaq rurëkunatam ruranantsik: Jehovämanmi mañakunantsik, imakunachö alliyëta wananqantsikman pensëkurmi Diospa Palabran ninqanman alli pensanantsik y alli amïgukunatam akranantsik (w19.06, pägina 11).

Chikir sufritsimänantsik tiempupaq alistakunapaqqa, ¿imatataq ruranantsik?

Jehoväwan mas alli amïgu kanapaqmi kallpachakunantsik, kuyamanqantsikta y imëpis mana jaqimänapaq kaqtam següru kanantsik, cada junaqmi Bibliata leyinantsik y Diosmanmi imëpis mañakunantsik. Änimanqantsik bendicionkunata Jehovä cumplimunampaq kaqtam següru kanantsik y gustamanqantsik textukunata y Jehoväpaq cantanqantsik cancionkunatam dememoria yachakunantsik (w19.07, päginakuna 2-4).

Familiantsikkuna salvakuyänampaqqa, ¿imata rurartaq yanapanantsik?

Imanö sientikuyanqanta entiendita procurashun, alli portakunqantsikta rikäyätsun y pacienciakoq y shumaq tratakoq kashun (w19.08, päginakuna 15-17).

Mateu 11:28 textuchö ninqannö, ¿imanötaq Jesusqa ankashyäratsimantsik?

Mas alli pushamaqnintsikkuna, trabäjuchö mas alli kaq yanaqintsikkuna y imawampis mana igualaq rurënintsikmi kapamantsik (w19.09, pägina 23).

¿Imanötaq rurëta munënintsikta y ruranapaq kallpantsikta Dios yuritsinqa? (Filip. 2:13).

Bibliata leyishqa y leyinqantsikman pensashqaqa, Diosqa rurëta munënintsikta y ruranapaq kallpantsiktam yuritsin. Pëqa poderninwanmi rurëta yachanqantsikchö mas alli yachaqta tikratsimantsik (w19.10, pägina 21).

Imatapis ruranapaq manaraq churapakarqa, ¿imatataq ruranantsik?

Pitsqa cösaskunatam: Bibliata y publicacionnintsikkunata alli estudiashun, yachaqta tikratsimänapaq Diosta mañakushun, imatapis imarëkur rurëta munanqantsikta rikäshun, churapakanqantsikta imanö ruranapaq patsätsishun y llapanta rurëta mana puëdinqantsikta yarpäshun (w19.11, päginakuna 27-29).

¿Ëvata Satanas parlapanqanchöku nunakuna mana wanoq almayoq kayanqan yachatsikï qallëkurqan?

Manatsunchi. Satanasqa manam cuerpunlla wanunampaq kaqtatsu Ëvata nirqan, sinöqa chipyëpa mana wanunampaq kaqtam. Mana allita creeqkunaqa Apäkï Tamyachömi ushakäriyarqan. Itsa Babel markachö törrita rurëkäyaptin, tukïläya idiömakunata nunakunata Dios manaraq parlatsiptin, mana wanoq almayoq kayanqanman nunakuna creir qallëkuyarqan (w19.12, pägina 15).