Diospaq y Jesuspaq Bibliachö ima ninqan

¿Imanötaq Kamakoq Yayantsik?

Jutin. Diosnintsikmi nirqan: “Noqaqa Jehovämi kä. Tsëmi jutï” (Isaïas 42:8, TNM). 7 mil kutipitapis masmi Bibliachöqa Diospa jutinta tarintsik, peru wakin Bibliakunachöqa jutinta churayänampa rantinmi Señor nirlla qellqayashqa. Peru Diosnintsikqa amïguntsik këta munarmi jutimpa qayanantsikta munan (Salmus 105:1).

Jehovätaqa kënöpis reqintsikmi. Llapanta Puëdeq, Kamakoq, imëpita imëyaqpis Rey. Kënö reqiyanqanmannö o jutimpam atska sirweqninkunapis mañakuyan (Daniel 9:4).

¿Diostaqa rikantsikku? Diostaqa manam rikantsiktsu (Juan 4:24). Tsëmi Bibliapis nimantsik “Diostaqa manam ni pï nunapis ni imë rikashqatsu” (Juan 1:18). Tsënö kaptimpis, Palabranchömi willakun mana alli ruranqantsikkunaqa Diosnintsikta llakitsinqanta y cäsukunqantsikqa alläpa kushitsinqanta (Salmus 78:40, 41; Proverbius 27:11).

¿Imanö Diostaq Jehoväqa? Më nacionpita karnimpis o imata rurashqa kashqapis, Diosqa llapantsiktapis igualpam rikämantsik (Hëchus 10:34, 35). Pëqa ankupäkoq, llakipäkoq, pacienciakoq, alläpa kuyakoq, y rasumpa kaqllata parlaq Diosmi (Exodu 34:6, 7). Diospa imanö kënimpitaqa këkunam mas reqishqaqa kayan:

Puëdeq. Pëllam “Llapanta puëdeq” Diosqa. Tsëmi rikätsikun llapan änikunqankunata cumplimunampaq kaqta (Genesis 17:1, TNM).

Yachaq. Pëllam llapampitapis yachaq Dios. Tsëmi Bibliachö Diosnintsik Jehoväpaq nin “Pëlla yachaq Dios” kanqanta (Romänus 16:27).

Allita ruraq. Llapanta alli ruraq Diosmi. “Imatapis allillatam ruran” y “Leyninkunapis allim” (Deuteronomiu 32:4).

Kuyakoq. Kuyakoq Dios kanqantam Bibliaqa yachatsikun (1 Juan 4:8). Llapan ruranqankunachö y imanö ruranqankunachömi Jehovä Diosqa rasumpëpa kuyakoq kanqanta rikätsikun.

Diosqa reqiyänantam munan. Jehovä Diosqa ciëluchö këkaq Teytantsikmi (Mateu 6:9). Diospa amïgun kanapaqqa pëmanmi creinantsik (Salmus 25:14). Pëqa imëka pasamanqantsikkunapitam yarpachakun, tsëmi mañakurnin problëmantsikkunata willanantsiktapis munan (1 Pëdru 5:7; Santiägu 4:8).

¿Jesusqa Dioswan jukllëllaku kayan?

Jesusqa Diospa Tsurinmi. Jesusta kamanampaqqa Jehovätaqa manam pipis yanaparqantsu, tsëmi Bibliaqa nin Diospa Tsurin kanqanta (Juan 1:14). Jesustaqa manaraq imatapis kamarninmi Jehovä Diosqa kamarqan. Tsëmi ‘punta kaq Tsurin’ kanqanta nin. Y pëmi llapan kamanqankunachö yanaparqan (Proverbius 8:30, 31; Colosensis 1:15, 16).

Manam Teytannö kanqantatsu Jesusqa nirqan. Tsëpa rantinqa “pëpa jutinchömi shamurqö, y Pëmi kachamashqa” nirqanmi (Juan 7:29). Juk warmiwan parlarnam Jehoväpaq kënö nirqan “Teytä y qamkunapa Teytëkikuna” y “Diosnï y qamkunapa Diosnikikuna” (Juan 20:17). Wanuriptimpis, Jehovämi kawariratsirqan y ciëluchö derëcha kaq lädunman täratsirmi yanapakunampaq juk carguman churarqan (Mateu 28:18; Hëchus 2:32, 33).

Teytanta reqinapaqmi Jesusqa yanapamantsik

Teytampita yachatsikunampaqmi Patsaman shamurqan. Jesuspaqmi Jehovä Diosnintsikqa kënö nirqan: “Këmi Tsurï, kuyë Tsurï. Pëta wiyayë” (Marcus 9:7). Diostaqa Jesusllam alli reqin, tsëmi kënö nirqan: “Teyta pï kanqantaqa manam pipis reqintsu, sinöqa Tsurillam, y pitapis Tsuri reqitsita munanqan kaqllam” (Lücas 10:22).

Teytan imanö kanqantam rikätsikurqan. Teytan ruranqannölla imatapis rurarninmi Jesusqa kënö nirqan: “Noqata rikämashqa kaqqa, Teytatapis rikashqam” (Juan 14:9). Parlanqankunawan y ruranqankunawanmi Jesusqa nunakuna Teytanta reqiyänampaq yanaparqan y kuyakoq kanqantam rikätsikurqan. Tsëmi nirqan: “Noqam näni, rasumpa kaq y kawë kä. Mana noqawanqa, manam ni pipis Teytaman shamïta puëdintsu” (Juan 14:6). Y këtapis nirqanmi: “Rasumpa adoraqkunaqa santu espïritupa yanapakïninwan y rasumpa kaqwan Teytata adorayänampaq, rasumpa kaqchöqa, tsënö kaqkunatam Teytaqa pëta adorayänampaq ashin” (Juan 4:23). ¿Imëllaqa pensarqunkiku Teytantsik Jehovä, pëta reqita y sirwita munaq nunakunata ashikanqanta?