Yarpakachashun kuyëllawan llapanta igualpa willaparnin
1 Jehová Diosmi apóstol Juanta rikätserqan cielupa huk ángel volekaqta, y alli noticiakunatam willapäkikarqan llapan nunakunata, “llapan nacionkunata, kastakunata, markakunata, y tukilaya parlaqkunata” (Rev. 14:6). ¿Ángel nenqannöku rurëkantsik y llapantaku igualpa willapëkantsik? Horaqa mana cuentata qokushpam mana allikunata pensëkantsik wakinkunapaq. Nunakunapita pensanqantsikmi, yanapamashun allipa o mana allipa Reinupita yachatsikunapaq. Tsemi razumpa interesanantsik willapäkurnin tukilaya nunakuna kayaptimpis.
2 Rikë markekita: ¿Huk markakunapita markekiman chayämushqaku? Horaqa facil-llam pekunata qonqarintsik. Noqantsikmi qallanantsik pekunata ashirnin y más alli reqita procurashun. ¿Imakunatataq necesitayan, yarpachakuyan, gustayan, chikiyan, mantsayan y imakunapaqtaq mana allipa pensayan? Kekunaman pensekar Reinupita willapäkonqekita pekunapaqno tumatsi (1 Cor. 9:19-23). Noqantsikpis apóstol Pablonomi alli noticiapita willapäkita munashwan, llapan nunakunata, huk naciompita kayaptimpis, huk markakunacho winashqa kayaptimpis, huklayata parlayaptimpis y atska qelleyoq kayaptimpis (Rom. 1:14, nota).
3 ¿Imanötaq willapäkushwan huklaya parlaqkunata? Tsepaqmi inshishun folletu Buenas nuevas para gente de todas las naciones nishqanta. Hinamampis puritsinkimanmi tratadukunata o folletukunata huklaya parlekunacho, markëkicho pekuna parlayanqanmanno (rikäriki Nuestro Ministerio del Reino de julio de 2003, pág. 4, párrs. 2, 3). Wakin publicadorkunaqa shumaqmi kallpachakuyashqa saludellatapis yachakurnin, y facil-lla willapäkur qallayänampaqpis huklaya parlekunacho yachakuyashqam. Casi llapan nunakunam kushikuyan pipis huklaya parlakïnincho parlapäriptenqa, ichikllata yachëkarpis, y keqa interesatsinmanmi Reinupita más wiyayänampaq.
4 Jehovano kë: Tukilaya nunakunaman chänapaq shumaq kallpachakurqa, Diosnintsiknomi kantsik, Jehovaqa manam imano kanqantsiktapis rikantsu “pepa voluntanenqa tukilaya nunakuna salvakunanmi y razumpa kaqta yachakuyänanmi” (1 Tim. 2:3, 4).