“Kallpata qoykanmi pishipaqkunata”
1 Horaqa, llapantsikmi pishipärintsik “kë sasa tiempokunachö” tukï hipakïkunata pasar, manam uryarllatsu o huk rurëkunallapitatsu (2 Tim. 3:1). ¿Imanöraq Diospa nunankuna kallpata tarintsik willapäkïnintsikcho mana pishipänapaq? Jehovaman markäkurninmi, “alläpa kallpayoq” kaptin (Isa. 40:26). Pëqa rikëkämunmi llapan wananqantsikkunata y munanmi yanapamënintsiktapis (1 Ped. 5:7).
2 Yanapamänantsikpaq Jehová qomanqantsikkuna: Jehovaqa kallpata qomantsikmi espíritu santonwan, hina tsë kallpanllawanmi llapanta kamashqa. Tsë espiritunwanmi, pishipashqa këkashqapis Diosqa yanapamantsik ‘kallpata tarinapaq’ (Isa. 40:31). Kikintsik tapukurishun: “¿Imëtaq mañakushqa kä Jehovapa espiritunta, cristiano kënïta cumplinäpaq?” (Luc. 11:11-13).
3 Llapan hunaq Diospa Palabranta leirnin, leinqantsikman yarparar, hina publicacionkunatapis alleq leirnin espiritual kaqta mikorqa, kashun “yaku kuchuncho plantaraq y tiemponchö wayoq y raprampis mana tsakeq montinömi” (Sal. 1:2, 3).
4 Hina Jehovaqa inshinmi nunankunata, pëkunapis mana ‘haqimarnintsik yanapamänantsikpaq’ (Col. 4:10, 11). Kallpata tarinapaqqa yanapamantsik reunionkunachö parlakïninkunawan, comentarionkunawan y shumaq discursonkunawampis (Hech. 15:32). Ancianokunam puntataqa shumaq parlapämärnintsik yanapamantsik alli kanapaq (Isa. 32:1, 2).
5 Willapäki: Pishipashqa këkarpis ama willapäkitaqa haqitsu. Wakin rurëkunapitaqa, alli willapäkicho karnin masmi kushikïta tarintsik (Mat. 11:28-30). Alli willapäkiqa yanapamantsik Diospa Reinonta puntaman churanapaqmi, hina wiñeypaq kawëta y tsëchö shumaq bendicionkunatapis mana qonqanapaqmi.
6 Atskaraqmi ruranantsik kan kë mana alli mundo manaraq ushakaptin. Tsëta musyarmi imëpis utishwantsu willapäkurnin, “Diosnintsik kallpata qomashqa” (1 Ped. 4:11). Diospa yanapëninwanqa ushashunmi kë ruranantsikta, Jehovaqa “kallpata qoykanmi pishipaqkunata” (Isa. 40:29).