Imëpis “atskata wayïkäshun”
1 Huk kutim Jesús yachatsikorqan pë rasumpa uvas yura kanqanta, y Teytan Murukoq kanqanta, y cielopaq kaq qateqninkuna wayoq räman kayanqanta. Jesús, Teytampaq Murupakoqpaqno parlarninmi, alleq käyitsikorqan uvas yurapita mana witinapaq (Juan 15:1-4). Këpitam yachakuntsik, Jehovawan alli këkaqkunaqa Jesucristono alli wayoq “uvas yuranömi”, kayanman. “Espiritupa wayïninta” y Reinopa wayïnintawanmi, atskapa mirëkätsinantsik (Gál. 5:22, 23; Mat. 24:14; 28:19, 20).
2 Espiritupa wayïnin: Jehovata alli servita tïrarqa, espiritupa wayïnintam rikätsikushun. ¿Espïritupa wayïninta rurëta tïrantsikku Bibliata leirnin y leinqantsikman alli yarpararnin? (Fili. 1:9-11.) Teyta Diospa espiritunta mañakïta ama mantsakushuntsu, pëpa yanapëninwanqa kallpata tarishunmi shumaq portakunapaq y espiritual kaqcho poqunapaq (Luc. 11:13; Juan 13:35).
3 Kë espiritupa wayïnenqa hina yanapamantsikmi kushishqa willapäkunapaq. Käyirinapaq, kuyakïwan fëmi, yanapamäshun imëpis willapäkoq yarqunapaq mëtsika rurakïnintsik këkaptimpis. Yamë pasakonqantsik, awantanakonqantsik, alli kanqantsik, humilde shonquyoq kanqantsik, munëkunata controlanqantsikmi, yanapamäshun chikïkämashqapis llapanwan shumaq kanapaq. Kushikïmi yanapamäshun shumaq willapäkunapaq nunakuna wiyëta mana munëkäyaptimpis.
4 Reinopa wayïnin: Hina miratsishwanmi Reinopa wayïnintapis, këmi Diosta “alabanqantsik sacrificio”; tsëmi parlakïnintsikpa wayïnenqa, Jehovapa shutimpita willapäkonqantsik (Heb. 13:15). Tsë wayïkunataqa miratsintsik mana utishpa y kuyakushpa alli willapäkurninmi. ¿Kallpachakïkantsikku Reinopa wayïninta alli miratsinapaq?
5 Jesusqa qateqninkunapaq nerqanmi, wakinkuna atskata y wakinkunana ichikllata wayüyänampaq (Mat. 13:23). Tsëmi ni piwampis ruranqantsikkunataqa topatsikïkashwantsu, tsëpa rantenqa Jehovatam qoshwan más alli ruranqantsikta (Gál. 6:4). Kikintsik imanö ruranqantsikta Biblia nenqannö rikëmi, yanapamäshun “atskata wayurnin” Diospa shutinta alabanapaq (Juan 15:8).