Willapäkïcho más rurashun
1 Ciëlochö Teytantsikqa alläpam kushikun, nunankuna más alli cristiano këman chäyaptin y más alli willapäkuyaptin. Superintendente Timoteutam Pablu willaparqan alli rurëta mana haqinampaq, Diospa alli cristianon kanqanta wakinkunapis rikäyänampaq (1 Tim. 4:13-15). Yachaq karpis, llapantsikmi willapäkïnintsikta alliyätsita tïrashun.
2 Willapäkïcho rurëta munanqantsik: Diospa kaqcho poqunapaqqa, Pëpa kaqchömi más rurëta munanantsik. ¿Imakunataraq rurashwan? Bibliawan más alleq yachatsikïtam tïrashwan (Efe. 6:17). Nänikunacho, telëfonopa, rantikuyanqanchöpis willapäkïta itsa pishipantsikraq. O wiyakïta munaqkunaman kutirnimpis más alli yachatsikïta pishipantsikraq. Hina estudio bíblico qallëta y yachatsikïta tïrashwanmi.
3 ¿Imaraq yanapamäshun? Congregacionchö Yachatsikunapaq Diospa Escuelan, Reinopita willapäkïta yachakunapaq reunionkunam más yanapamantsik, alli willapäkoq tikranapaq. Reunionkunaman manaraq ëwar alleq yachakurnin, mana haqishpa ëwar y yachakonqantsiknölla rurarnenqa, atska bendicionkunatam tarishun (2 Cor. 9:6).
4 Hinamampis manam hapallantsikllatsu këkantsik (Pro. 27:17). Yanaqintsik willapäkonqanta wiyarnenqa, más shumaq willapäkïtam yachakushun. Hinamampis Libropita Yachakunapaq reunionta dirigeq wawqim, pillatapis niramonqa yanaparamänantsikpaq. Kushikuntsikmi huk precursor o mëqan yachaq Testigopis yanapamashqa, tsënöpa willapäkïcho más alli y kushi kushi purinapaq. Libropita Yachakunapaq ëllukanqantsikcho o qorikanqantsikchö, ¿kanku tsëraq willapäkïta qallëkaq wawqi panikuna? Noqantsikwan willapäkoq yarqunampaqmi nirishwan.
5 Kanan witsanchöqa, willapäkïmi imëka rurëpitapis más alli. Jehovata ‘llapan shonquntsicwan alabarqa’, allin kaqtam qoykantsik (Heb. 13:15). Imëkanöpapis alli willapäkïta tïrarqa, Timoteunömi kashun, pëqa yachatsikorqan mana penqakushpam; tsëmi Diospis alli trabajaqtanö chaskerqan (2 Tim. 2:15).