Jehová alistanqan mikïman ëwanapaq
1. ¿Imatataq Jehová rurëkätsin nunankuna mikushqa cuenta kayänampaq?
1 Jehová kaqpita wiyakïta munayanqantaqa, kikinmi kuyakïpa yachëkätsin nunankunata. Jehovata mana reqeqkuna mallaqëwan wanukïkäyaptimpis, noqantsikqa Jehovapa kaqpita alli mikushqam këkantsik (Isa. 65:13). Alli mikushqa kanapaqqa, hatun asambleakunatam Jehová ruratsin. ¿Alistakïkantsiknatsuraq, “Diospa santo espïritunmi yanapamantsik” nishqan asambleaman ëwanapaq? ¡Alläpa shumaq mishki mikï cuentam shuyarëkämantsik!
2. ¿Imakunatataq tiempopita rurashwan?
2 Kanampitanam alistanantsik: “Alli nuna imatapis ruranampaq unëpita yarpakacharqa, allim yarqapukonqa” (Pro. 21:5). Tsëmi, kiman hunaqnimpi asambleachö këta munarqa, kanampitana permisota mañakunman patronninta. Y ¿posädataqa mañakushqankinaku? Mikï höra mirkapantsikta mikunapaqqa, wawqi panikunawanmi parlarishwan local-llachö mikunapaq. Hina llapan hunaq asamblea manaraq qallaptin chänapaqmi alistakunantsik, tsënöpam täkunantsik tarishun, qallanan canticota cantashun y qallanan oraciontapis wiyashun.
3. ¿Imanö vestikushqaraq ëwashwan asambleaman?
3 Hina alleqmi rikänantsik, cristianono shumaq vestikunapaq (1 Tim. 2:9, 10). Asamblea witsankunaqa yanapamantsik markantsikchö nunakunata willapänapaqmi. Asamblea kanan markachö këkar cristianono vestikushqa, asambleapaq targëtatapis röpantsikchö timpirätsishqaqa, wakinkunapita hukläya kanqantsiktam rikäyanqa, y Diospa shutintapis allichömi horqashun.
4. ¿Imataq yanapamäshun asambleapita alleq yachakunapaq?
4 Shumaqmi wiyakunantsik: Manam mëqantsikpis, Jehovapa kaqpita wiyakïta haqita munantsiktsu, ¿rasunku manaku? (Pro. 22:17, 18.) Discursayämonqan höraqa manam imamampis yarparäkïkashwantsu, Biblia leiyämonqantam qatinantsik, y parlayämonqampitam qellqanantsik. Manaraq punurnam noqantsikpaqnö shumaq kanqampita wakinkunawan parlarishwan. Pasaq asambleakunachömi rikäyashqa jovenpura takïkur asamblea hora parlakuyanqanllata o celularninkunapa qellqanakur kakïkäyanqanllata. Wambrantsikkuna kaptenqa, joven mayinkunawan täkuyänanta haqenqantsikpitaqa, allichi pëkunawan täkushwan.
5. ¿Imataraq rurashwan asambleachö kushi kushi kanapaq?
5 Tsëchö këkaqkunawan shumaq parlarishun: Atskaq karnenqa mikïtapis mishki mishkillam mikurintsik (Pro. 15:17). Tsënö kaqllam wawqi panintsikkunawampis asambleantsikta kushishqa wiyakurintsik. Tsëmi, discursokuna manaraq kaptenqa, asambleaman shamoqkunawan shumaq parlarishwan, ¡imanö shumaqmi wakinkunawan reqinakuriqa! (Sal. 133:1.) Asambleata qallamoq wawqi manaraq música qallaptin täkunapaq nimashqaqa, parlëkarpis täkunantsikmannam ewkunantsik y tëkarllanam shuyarëkänantsik asamblea qallananta.
6. Asamblea kanqan markachö willapäkonqëkipita willakarami.
6 Listom këkashwan willapäkunapaq: Kë hatun asamblea witsanqa más allim kanqa willapäkunapaq. Asamblea ushariptinmi wakinkunaqa ëwayan restaurantekunaman, tsëchönam mikï servikoqkuna tapukuyan tarjeta puritsiyanqampita. Y Diospitam shumaq willapäyashqa pëkunata. Tsënöpam wakinkunaqa huk rätollapis shayämushqa asamblea wiyakoq.
7. ¿Imanirtaq shamoq hatun asambleaman mana faltëllata ëwashwan?
7 Alläpa unëtaran llapan discursokuna kanampaq rurayämushqa, asamblea localta alistayashqa, y tsëchö trabajayänampaq disponiyashqa y discursokunata qoyänampaqpis preparakuyashqa. Kuyakïwan llapan alistayämonqanmi rikätsimantsik Jehová markanta kuyanqanta. ¡Llapantsik mana faltëllata ëwashun y alleq yachakïta tïrashun! Tsënö rurarnenqa, Diosta mana reqeq nunakunapitapis: “shonquntsik alli kanqampitam kushishqa cantashun” (Isa. 65:14).
[4 kaq päginachö recuadru]
Hatun asambleapaq yarpätsikïkuna
◼ Asambleapa horarion: Kiman hunaqmi asamblea qallanqa 9.20 qoyapa o wärëpa, punkunam kicharanqa 8.00 qoyapita. Música qallëkuptinllam llapantsik hamakurinantsik, tsënöpa asamblea shumaq respëtowan qallanampaq. Viernes y sabadoqa 4.55 ushanqa, y domingonam 4.00 ushanqa.
◼ Carro cuadrakunan: Manam atska carro cuadrakunampaq sitio kanqatsu, tsëmi huk cärrollachö atskaq ewanapaq tïrashwan.
◼ Asientokuna: Noqantsikwan cärrochö ewaqkunallapaq y wayintsikcho täranqantsikkunallapaqmi asientonqa guardapushwan. Tsënö rurarqa ankupëkäshunmi o llakipëkäshunmi tsatsakunata, qeshyapäkoqkunata, y huk kutillaraq asambleaman shamoqkunatapis.
◼ Mikï hora: Ichik täperkunallacho mikïnikikuna apayë mana kichkipäyäshunëkipaq, y tsënöpa waqtata mikï ranteq mana yarquyänekipaq. Manam asambleaman ëwashwantsu atska mikïnintsik aparipäkushqa, ni manam apashwantsu pakina botëllakunata, ni washkutapis.
◼ Qellë winakï: Hatun asamblea ruranan alläpa chaniyoq kaptinmi, agradecikonqantsikta rikätsikushwan ëkallatapis cäjakunaman hitakurnin, këtaqa rurashun Ëllukäna Wayichö o asambleachöpis, tsënöpa hinantin Patsachö willapäkïta yanapakunapaq.
◼ Imapis pasamashqa y qeshyakurkushqa: Asambleachö këkashqa imapis pasëkuptin, willë tsëchö këkaq acomodadorta, pënam raslla willanqa Primeros Auxilios nishqanta, tsënöpa alli tanteaq wawqi rikänampaq y imata karpis ruranampaq.
◼ Grabadorakuna: Manam ni imanö grabadorakunata enchufashwantsu asamblea këkaq wayimanqa, ni imatapis rurashwantsu wiyakïkaqkunata tsaparnenqa.
◼ Sírvase visitar formulariokuna: Sírvase visitar (S-43) nishqan formulariotam apashwan asambleachö këkanqantsikyaq, willapanqantsikkunapa shutinta y mëcho täranqantapis qellqanapaq. Llapan publicadorkunam apayanman huk o ishkë formulariota asambleaman ëwar. Asambleapita kutirninnam, alli qellqashqa formulariota qoyanki congregacionpa secretarionta (rikäri Nuestro Ministerio del Reino de febrero de 2005, página 6).
◼ Posäda: Posadatsikïta munarqa congregacionpa secretarionwan parlashun, y tsëpita raslla formulariota qellqarkur pëta qoshun. Huk markachö asambleaman ewëta munar y posädata wanarqa, secretariowan parlë y solicitudta qellqarïkur tsë wawqita qoyki, pënam apatsenqa asambleaman ewanëki markaman. Kë formulariota qellqanëkipaqqa ama asamblea chämunantaraqqa shuyarëtsu, tsëqa posäda asheqkunapaqmi sasa o aja kanqa (1 Cor. 14:40). Posadakoqkuna y wambrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, hina manam yëkuyanmantsu cuartonkunamampis. Yarpäshun, posäda wayiqa asamblea hunaqkunallapaqmi. Manam allitsu kanman wakin markakunata reqipakïta munarnin, posädacho unë quedakïta munëqa.