Wanupakushqakunata shumaq parlapärishun
1. Wanupakushqakuna, ¿imanir-raq shumaq parlapärinata wanayan?
1 Wanupakïqa alläpa llakikïpaqmi, Diospa Reinonman mana confiakoqkunapaqnäqa masraqmi (1 Tes. 4:13). Atskaqmi kënö tapukuyan: “¿Imanirtaq wanukïkorqun? ¿Mëtataq ewkorqun? ¿Imëllapis yapë rikärishaqtsuraq?”. Qateqnin yachatsikïkunam yanaparamäshun wanupukushqakunata shumaq parlapärinapaq (Isa. 61:2).
2. Wanupakushqakunaman charqa, ¿unëtsuraq parlapäkushwan?
2 Wayin wayin: Wayin wayin willapäkïkashqa itsa pillapis kastämi wanurishqa niramashwan. ¿Alläpa llakishqaku këkan o waqëkanku? Wanupakushqata yanaqarnin, ¿atskaqku wayichö këkäyan? Tsënö kaptenqa manam alläpa unëqa parlapashwantsu (Ecl. 3:1, 7). Alläpam llakipëkoq nirirmi, wanushqakunapaq parlaq tratadota, revistata o follëtota qorir ewkushwan. Tsëpeqnachi pasarishqancho kutirishwan, wanushqakunapaq Biblia parlanqampita shumaq willapärinapaq.
3. Wanupakushqa wiyakïta más munaqnö kaptenqa, ¿mëqan textokunataraq rikäratsishwan?
3 Punta visïtallachö wanupakushqa wiyakïta munaqnö kaptenqa, ichik masmi willapärishwan. Mana alli creiyanqanta nimashqapis, manam allitsu creinqëkiqa nishwantsu, tsëpa rantenqa wanushqakuna sharkayämunampaq Biblia nenqantam leirapushwan (Juan 5:28, 29). Allichi willapärishwan wanushqakuna mëcho këkäyanqanta Biblia nenqannö (Ecl. 9:5, 10). Kushikurinampaq, allichi rikäratsishwan unë tiempochö wanushqakuna sharkayämonqampita (Juan 11:39-44). Hina allichi yacharatsishwan Job Jehovaman markäkonqampita o yärakonqampita (Job 14:14, 15). Ewkunapaqnam rikäratsishwan kë follëtokunata: ¿Qué nos sucede cuando morimos?, Cuando muere un ser querido, o mëqanllatapis wanushqakunapaq parlaqta, o mëqan tratädollatapis. Hina allichi haqirapushwan Enseña librota, y rikäratsishwan 6 kaq capïtulonta, tsëpitanam nirishwan yapë kutir más yacharatsinapaq.
4. ¿Imanötaq y mëchöyantaq wanupakushqakunata willapashwan?
4 Imanötaq y mëchöyantaq willapäkushwan: Ëllukäna Wayichö wanupakushqakunapaq discurso kaptenqa, ¿mana Testigo kaqkunapis kayanqatsuraq? Publicacionkunata qorinkimanmi mana alläpa llakikuyänampaq. Wanushqakunapaq caja rantikoqkunapis alläpam agradecikuyashqa, wanupakushqakunapaq publicacionkunata haqiponqantsikpita. Wanuyanqampita parlaqta wiyar, o radiopa wiyar o huknöpapis musyarqa, allichi wanupakushqakunaman cartakurishwan. Huk panim, warmin wanushqa nunapaq y tsurinpaqwan cartata apatserqan atska tratädokunatawan. Tsëpeqnam nunaqa tsurinwan panipa wayinman qayakurir kënö niyarqan: “¿Qamkunaku kë cartata apatsiyämorqunki? Bibliapita más yachakïta munarmi sharayämorqö”. Tsënam tsë nunaqa tsurinwan Bibliapita yachakur y reunionkunaman ëwar qallëkuyarqan.
5. ¿Imanirtaq alkäbu alkäbulla këkänantsik wanupakushqakunata yanapanapaq?
5 Eclesiastés 7:2 textochömi kënö nin: “Atska mikï kaqman ewanqantsikpitapis, más allim wanupakushqakunapa wayinman ëwëqa”. Fiestallata wiyë munaqkunapitapis, wanupakushqakunaqa Diospa Palabrampitam más wiyakïta munayan. Tsëmi alleq rikänantsik pï wanupakushqa këkanqantapis shumaq yanaparinapaq.