Ishkë hunaq asambleapa mushoq progräman

¿Imanöraq tsarakushwan Diospa adoracionninta chikeqkunapa puntanchö? Kë hutsasapa mundoman kutinantsikrëkur mana alli espïritukuna tukïta ruramashqa, ¿imanöraq tsarakushwan? Kë alläpa preciso tapukïkunapitam yachatsimäshun 2009 watachö ishkë hunaq kaq asambleantsik. Këmi tëmanqa kanqa: “Mana allita, alliwan vencishun” Romanos 12:21 textopita. Mä rikärishun yachakunapaq kaq tëmakunata.

Superintendente de distritom kë discursokunata qonqa: “Mana allita, alliwan vencinapaq kallpachakushun”, “Kikintsikmanqa ama alläpa confiakushuntsu”, “Mana allikuna ushakänampaq ichikllanam pishin”, y “Mundota vencinapaqqa, fënintsiktam chachaqyätsinantsik”. Superintendente de circuitonam kë discursokunata qonqa: “Kë tiempoqa mäkoq mäkoqllana këkänapaqmi” Romanos 13:11-13 textokunapita, y “Kë mana alli tiempochoqa ama qepapa kutishuntsu” Proverbios 24:10 textopita. Hina wiyëta munëkantsiknam “Shumaq wiyakurishun circuitochö wananqantsikta” discursotapis. Huk shumaq discursopa tïtulonnam kanqa “‘Yachatsicushun’ precursor karnin”. Chuskuman rakishqa discursokunapa tïtulonnam kanqa: “Diablupa munëninta mana ruranapaq alli tsarakushun”. Tukïläya mäquinakunawan, profesional kanapaq estudiokunawan y tiempo kapamanqantsikchö ruranqantsikkunawampis, Diabluqa ishkitsimashwanmi, tsëmi kë discursokuna yanapamäshun imanö ishkitsikonqanta musyanapaq y tsëpita qeshpinapaq. Hina huknin chuskuman rakishqa discursopa tïtulonnam kanqa: “Satanaspa chikikïnimpita ‘mana alli hunaqchö tsarakunapaq’ kallpata tsarishun”, këqa yanapamäshun Efesios 6:10-18 nenqanta wiyakunapaqmi.

Diospita yachatsikorqa, mana allitam paqwë vencïkantsik (Rev. 12:17). ¡Rasuntachi Satanasqa Jehovapa testigonkunata imëkata ruramarnintsikpis utintsu! (Isa. 43:10, 12.) Churakarqontsiknam ‘mana allita, alliwan vencinapaq’, tsëta rurashqaqa pëtam penqakïman churëkantsik. Kananllapitana ishkan hunaq asambleaman ëwanëkipaq kallpachakurëkë.