¿Imakunataraq Diospa Gobiernunqa ruramunqa?

RURANQANKUNA

Diospa Gobiernun patsakänampaq ima pasakunampaq kaqta Jesus willakunqantam yachakurquntsik, tsëmi musyantsik ciëluchö Jesus gobernar qallashqana kanqanta.

Jesus gobernar qallëkurmi, Diabluta y demoniunkunata ciëlupita qarqamunqanta Biblia willakun. Tsëmi 1914 watapitaqa imëka mana allikuna mirashqa, nunakunata Diablu engañaptin (Revelacion 12:7, 9).

Imëka mana allikuna këkaptimpis Diosnintsik churanqan gobernaq Jesusqa, Biblia willakunqannöllam mëtsika nunakunata yanapashqa yamë kawakuyänampaq (Isaïas 2:2-4). Diospita yachakuyanqanmi familiankunawan kushishqa kawayänampaq y qellëllapaq mana yarparäkur ima trabäjutapis kushishqa rurayänampaq yanapashqa. Dios munanqannö kawayanqanmi Jesus gobernaptin tsëchö kawayänampaq yanapanqa.

¿IMAKUNATATAQ DIOSPA GOBIERNUN USHAKÄTSINQA?

Ciëluchö Jesus gobernëkarpis, Patsachöqa nunakunallaraqmi gobernëkäyan. Tsëmi Jesusta Jehovä kënö nirqan: “Gobernë chikishoqnikikunapa rurinchö” (Salmus 110:2, TNM). Jesusqa, ichikllachönam llapan mana allikunata y chikeqninkunata ushakätsinqa, y Diospa sirweqkunaqa yamënam kawakuyanqa.

Këkunatam ushakätsinqa:

• Mana alli religionkunata. Jukwan jukwan kakoq warmitawanmi Bibliaqa mana alli religionkunata igualatsin. Nunakunata mana rasumpa kaqta y Diospaq mana kaqta yachatsikuyanqanrëkurmi ushakätsishqa kayanqa. Mëtsikaq nunam creiyanqatsu imanir ushakätsiyanqanta (Revelacion 17:15, 16).

• Llapan gobiernukunata. Diospa Gobiernunqa llapan gobiernukunatam ushakätsinqa (Revelacion 19:15, 17, 18).

• Mana alli nunakunata. Diosnintsik ninqanta mana wiyakur, mana allita ruraq nunakunaqa, manam Patsachö kawayanqatsu, chipyëpa ushakätsishqam kayanqa (Proverbius 2:22).

• Diabluta y demoniunkunata. Diabluwan demoniunkunapis mananam ‘nacionkunata pantatsiyanqanatsu’ (Revelacion 20:3, 10).

Y Dios ninqankunata wiyakoqkunapaqqa, ¿imataraq gobiernun ruramunqa?

DIOSPA GOBIERNUN RURAMUNAMPAQ KAQKUNA

Mëqan gobernantipis mana ruranqantam, Jesusqa ciëlupita gobernar ruramunqa y 144.000 Jesuswan gobernayänampaq Patsapita Jehovä akranqankunam yanapayanqa (Revelacion 5:9, 10; 14:1, 3). Y Patsachömi Dios munanqannö llapampis rurakanqa, tsëqa, ¿imataraq Jesus gobernar ruramunqa?

• Qeshyata y wanuyta ushakätsinqa. Patsachö “täraq nunaqa manam mëqanpis ‘qeshyëkämi’ ninqatsu” y “wanïqa mananam masqa kanqanatsu” (Isaïas 33:24; Revelacion 21:4).

• Yamë y mana mantsakushpam kawakushun. Kënömi Jehovä nimantsik: “Kikïmi wamrëkikunatapis yachatsishaq. Yanapaptïmi pïmëwanpis alli kawayanqa” y “üvas montipa y hïgus montipa chakinchö yamënam jamakuriyanqa” (Isaïas 54:13; Miquëas 4:4).

• Trabäjupis kanqam. “Uryakuyashqanwanmi [trabajayanqanwanmi] akrashqä nunakuna kushishqa kawayanqa. Manakaqllapaqqa manam uryakuyanqatsu [trabajayanqatsu]” (Isaïas 65:22, 23).

• Shumaqmi Patsapis kanqa. “Mana yaku kanqanchö y tsaki pampakunachöpis imëka plantakunam shumaq wëtanqa” (Isaïas 35:1, TNM).

• Diospa Gobiernunchö kawayänampaqmi nunakunata yachatsiyanqa. “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki, y qam kachamunqëki Jesucristuta reqikäyanqan” (Juan 17:3).

Kë llapantam nunakunapaq Jehovä ruranqa (Isaïas 48:18). Y qamqa, ¿imataraq rurankiman, Diospa Gobiernunchö shumaq y yamë kawakunëkipaq?